ءىس-شاراعا قاتىسۋشىلار زاماناۋي جاعدايدا سالانى دامىتۋعا قاتىستى وزەكتى ماسەلەلەردى تالقىلادى.
دوڭگەلەك ۇستەلگە قر مادەنيەت جانە سپورت مينيسترلىگى مادەنيەت كوميتەتىنىڭ توراعاسى روزا كارىبجانوۆا, «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى رايىمقۇلوۆا, اقتوبە وبلىسى مادەنيەت, ارحيۆتەر جانە قۇجاتتاما باسقارماسىنىڭ باسشىسى التىناي يۋنيسوۆا, اباي وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى نازيرا ىدىرىسوۆا, جەتىسۋ وبلىسى مادەنيەت, ارحيۆتەر جانە قۇجاتتاما باسقارماسى مادەني مۇرا جانە كىتاپحانا ءىسىن ۇيىمداستىرۋ ءبولىمىنىڭ باسشىسى گۇلميرا قالقاباەۆا, ە. راحماديەۆ اتىنداعى مەملەكەتتىك اكادەميالىق فيلارمونيا ديرەكتورى ەرلان داكەنوۆ قاتىسىپ, بايانداما جاسادى. سونداي-اق اتالعان ءىس-شاراعا وبلىستار مەن رەسپۋبليكالىق ماڭىزى بار قالالاردان كەلگەن مادەنيەت باسقارمالارىنىڭ, وبلىستىق فيلارمونيالاردىڭ باسشىلارى جانە شىعارماشىلىق ۇجىمدارى مەن ارتىستەرى قاتىستى.
العاشقى ءسوز كەزەگىن العان مادەنيەت جانە سپورت مينيسترلىگى مادەنيەت كوميتەتىنىڭ توراعاسى روزا ساميدوللاقىزى قاتىسۋشىلاردى كاسىبي مەرەكەلەرىمەن قۇتتىقتاپ, بۇگىنگى كەزدەسۋ مادەنيەت قايراتكەرلەرىنە شىعارماشىلىق تۇرعىدان ءوزىن-ءوزى تانىتۋعا مۇمكىندىك بەرەتىنىن اتاپ ءوتتى.
«كاسىبي مەرەكە قارساڭىندا, ەلوردامىز استانادا ەڭ ۇزدىك مادەنيەت قايراتكەرلەرىن جينادىق. بۇگىنگى باس قوسۋىمىزعا سەبەپ بولعان وسى ءتول مەرەكەمىز ەكەنى بەلگىلى. ەكى كۇن قاتارىنان وتكىزىلگەن شەبەرلىك ساباقتارىنان سىزدەر ءبىراز تاجىريبە جينادىڭىزدار دەگەن ويدامىز. ءوز باعالارىڭىزدى بەرىپ, جۇمىس ورىندارىڭىزدا بولىسە جاتارسىزدار. بۇل سىزدەرگە ۇلكەن تاجىريبە», دەدى ر. كارىبجانوۆا.
كەلەسى ءسوز كەزەگىن العان «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى راحمەتوللاقىزى وڭىرلەردەن كەلگەن ارىپتەستەرىن كاسىبي مەرەكەلەرىمەن قۇتتىقتادى. سونداي-اق «قازاقكونتسەرت» باسشىسى مەكەمە ارتىستەرىنىڭ سوڭعى كەزدەرى رەسپۋبليكالىق جانە حالىقارالىق ءىرى جوبالارعا بەلسەنە قاتىسىپ كەلە جاتقانىن ايتتى.
«جاقىندا ءبىز «گۇلدەر» ءانسامبلىنىڭ تۇساۋكەسەر-كونتسەرتىن ەلوردامىز استانادا جانە الماتى قالاسىندا وتكىزدىك. ودان بولەك ونەر ۇجىمى الەمدىك تۋرنە بويىنشا اقش, فرانتسيا, شۆەيتساريا, بەلگيا, حورۆاتيا, سلوۆەنيا, اۆستريا, ماجارستان ەلدەرىندە ارنايى كونتسەرت بەرىپ قايتتى. تاعى ءبىر جاقسى جاڭالىعىمىز بار. بۇيىرتسا, 2-3 ماۋسىم كۇندەرى «Astana Musical» تەاترى 17-ءشى حالىقارالىق ميۋزيكل فەستيۆالىندە (DIMF) «روزا باعلانوۆا» ميۋزيكلىمەن ونەر كورسەتۋ ءۇشىن گاسترولدىك ساپارعا شىعادى», دەدى ا.رايىمقۇلوۆا.
سونداي-اق مەكەمە باسشىسى «ەل بىرلىگى – جاڭا قازاقستان» جوباسى بويىنشا بىلتىر جاڭادان قۇرىلعان اباي, ۇلىتاۋ, جەتىسۋ وبلىستارىنا, قىزىلوردا وبلىسىنا, پاۆلودار, قاراعاندى, الماتى, پەتروپاۆل قالالارىنا, بيىل ماڭعىستاۋ, باتىس قازاقستان, اتىراۋ, اقتوبە وبلىستارىنىڭ ورتالىعى مەن مونوقالالارىندا, بىرقاتار اۋدان مەن ەلدى مەكەننىڭ حالقىنا «قازاقكونتسەرت» ونەر ۇجىمىنىڭ ارنايى گاسترولدىك ساپاردا بولىپ قايتقانى جونىندە دە تىلگە تيەك ەتتى. اتالعان جوبا بويىنشا 2025 جىلعا دەيىن 28 اۋدان, 29 مونوقالا, 20 وبلىس ورتالىعىنىڭ تۇرعىندارى كەزەڭ-كەزەڭمەن قامتىلادى.
كەزدەسۋ سوڭىندا روزا كارىبجانوۆا دوڭگەلەك ۇستەلگە قاتىسۋشىلاردىڭ سۇراقتارىنا جاۋاپ بەردى. مادەنيەتتى مەملەكەت تاراپىنان قولداۋدىڭ ءتيىمدى ادىستەرى تۋرالى ايتا كەلە:
«بۇگىندە مەملەكەتتىك ورگاندار مادەنيەتكە كوپ كوڭىل بولۋدە. ايتا كەتەرلىگى, حالىقتىڭ مادەني ونىمدەرمەن قامتاماسىز ەتۋ دەڭگەيىنىڭ ارتۋى 74 پايىزدى قۇراسا, بۇل كورسەتكىشتى 80 پايىزعا جەتكىزۋ جوسپارلانۋدا. وسىعان وراي, بايقاۋلار مەن فەستيۆالدەر وتكىزۋ بويىنشا شىعارماشىلىق باستامالاردى جۇزەگە اسىرۋعا قاتىستى ۇسىنىستارىڭىزدى قولداۋعا دايىنبىز. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, دارىندى شىعارماشىل جاستاردى قولداۋ ءۇشىن حالىقارالىق فەستيۆالدەردى ۇيىمداستىرۋ ءىسى قولعا الىندى. ودان كەيىن ءداستۇرلى حالىق مۋزىكاسىن جىرشىلار مەن تەرمەشىلەر اراسىندا كەڭىنەن ناسيحاتتاۋ ماقساتىندا دا جوبالاردى بەلسەندىرەك ۇيىمداستىرعان ءجون», دەدى.
سونداي-اق ر.كارىبجانوۆا مەكەمەلەردەگى شتاتتىق قۇرىلىم, ەڭبەكاقى ماسەلەسى, جاڭا مادەنيەت ساياساتىنىڭ تۇجىرىمداماسىنىڭ بەكىتىلۋى, گونورار تولەۋ, ەسكەرتكىشتەردى تۇرعىزۋ, وڭىرلەردەگى رەجيسسەرلەردى شىعارماشىلىق جۇمىستارعا تارتۋ, ۇلتتىق بي, ءازىل-ىسقاق جانرىن جانداندىرۋ جانە ت.ب. ماسەلەلەر جونىندە ايتىپ ءوتتى. ەركىن فورماتتا وتكەن ديالوگ الاڭىندا قوناقتار ءوزارا پىكىر الماسىپ, جان-جاقتى جاۋاپتارىن الدى.
مادەنيەت جانە ونەر قىزمەتكەرلەرى كۇنىنە ارنالعان ءىس-شارالار مادەنيەت جانە سپورت مينيسترلىگىنىڭ قولداۋىمەن ۇيىمداستىرىلىپ وتىر.
