بۇگىن «ەڭبەكتەگەن بالادان, ەڭكەيگەن قارتقا» دەيىن ءبارى مۋزەيدە. 47 مىڭنان استام ادام تاريحىن تانىپ, رۋحاني كۇش الۋعا اسىققان. كەلۋشىلەردىڭ اراسىندا مۋزەي تابالدىرىعىن العاش اتتاعاندار دا بار. «مۋزەي ءتۇنى» شاراسى وتەتىنىن ءبىلىپ ارنايى كەلگەن. بۇنداعى قۇندى جادىگەرلەردى, تاريحي مۇرالار مەن ونەر تۋىندىلارىن تاماشالاپ ەرەكشە اسەرلەنگەننەن كەيىن الداعى ۋاقىتتا تاعى كەلۋگە نيەتتى ەكەنىن ايتىپ جاتىر. ەڭ ۇلكەن جەتىستىك وسى. بۇل شارانىڭ ماقساتى دا كوپشىلىكتى تاريحي-مادەني جادىمىزبەن جاقىنداستىرۋ.
«مۋزەي ءتۇنى» اكتسياسى بارىسىندا مەرەكەگە وراي كونتسەرتتىك باعدارلاما ۇيىمداستىرىلدى.
مۋزەيدە ۇلتتىق اسپاپتىڭ ءۇنى جاڭعىرىپ, «قورقىت» ەتنو-فولكلورلىق ءانسامبلى, ۇرمەلى اسپاپتار وركەسترى ونەر كورسەتتى. سونداي-اق مادەنيەت جانە سپورت ءمينيسترى اسحات ورالوۆ ارنايى قۇتتىقتاپ, ءسوز سويلەدى جانە مۋزەي سالاسىندا ەلەۋلى ەڭبەك ەتكەن بىرقاتار ازاماتقا ناگرادا تابىستادى.
«تامىرى تەرەڭ تاريحىمىزدى تانىتۋدا ەلىمىزدەگى مۋزەيلەردىڭ ءرولى وتە ماڭىزدى. جالپى ەل بويىنشا 271 مۋزەي بولسا, ولاردا 3 ميلليونعا جۋىق قۇندى ەكسپوناتتارىمىز بار. وندا كوپتەگەن مۋزەي قىزمەتكەرى جۇمىس ىستەيدى. پرەزيدەنتىمىز ەڭبەك ادامدارىن ايرىقشا قۇرمەتتۋىمىز كەرەك ەكەنىن ايتىپ, ارنايى تاپسىرما بەرگەن بولاتىن. سوندىقتان مۋزەي قىزمەتكەرلەرىن بۇگىنگى مەرەكەمەن قۇتتىقتايمىن. شاراعا اجەلەرىمىز, اتالارىمىز, قارىنداستارىمىز, باۋىرلارىمىز كەلىپ جاتىر. ۇرپاقتار ساباقتاستىعىن ساقتاي وتىرا ۇلى قازاق دالاسىنىڭ مادەنيەتىن دامىتۋدا ەڭبەك ەتەيىك, قۇرمەتتى ارىپتەستەر», دەدى مينيستر اسحات ورالوۆ.
سونداي-اق مادەنيەت جانە سپورت ءمينيسترى الداعى ۋاقىتتا «مۋزەي ءتۇنى اكتسياسى ۇلكەن قالالاردا عانا ەمەس, بۇكىل ەل اۋماعىن قامتۋى كەرەك دەپ ايتتى.
ء«بىز وسىدان ءبىر اي بۇرىن پالەونتالوگيا زالىن اشتىق. قولونەرشىلەردى قولداۋ ماقساتىندا قولونەرشىلەر ورتالىعى اشىلعان بولاتىن. اتقارىلىپ جاتقان ىستەر كوپ. بۇگىن كەلۋشىلەر سانى 10 مىڭعا دەيىن جەتەدى دەپ وتىرمىز. ءبىر قۋانتارلىعى وتباسىمەن كەلگەندەر وتە كوپ ەكەن. مادەنيەتىمىزدى تانۋ ماقساتىندا وسى شارانىڭ بەلسەندى قاتىسۋشىلارى بولىپ وتىر. تاريحىمىزدى پاش ەتۋ, جاس بۋىنعا تۇسىنىكتى تىلمەن جەتكىزۋ ءۇشىن بۇل شارانىڭ جالعاسى مىندەتتى تۇردە بولادى. ەندى ەلوردا تورىندە عانا ەمەس, قازاقستاننىڭ بارلىق ايماعىندا وتكىزىلسە نۇر ۇستىنە نۇر بولار ەدى دەگەن ويدامىن», دەدى مينيستر.
شارا اياقتالعانشا كەزەك كوبەيمەسە, ازايعان جوق. ءسوزدىڭ باسىندا تاڭدانىسىمىزدى جاسىرماعانىمىز دا سول. راسىندا, ەل ءۇشىن تاريحىن بىلەتىن, مادەنيەتىن تۇسىنەتىن تۇلعالار قاجەت. ول ءۇشىن مۋزەيدىڭ اتقارار ەڭبەگى مەن الاتىن ورنى ەرەكشە!
