كوۋچقا كىرىپتارلىق

الدىمەن كوۋچتىڭ قانداي مامان ەكەنىن، ونىڭ مىندەتىن ايقىنداپ الايىق. كوۋچينگ (coaching اعىلشىن تىلىنەن «جاتتىعۋ») – وقىتۋ ءادىسى، «كوۋچ» اتالاتىن ادام ءبىلىم الۋشىعا بەلگىلى ءبىر ومىرلىك نەمەسە كاسىبي ماقساتقا جەتۋگە كومەكتەسەدى. كوۋچينگ جالپى دامۋدىڭ ورنىنا ناقتى بەلگىلەنگەن ماقساتتارعا جەتۋگە باعىتتالعان.

كوۋچ – سەرتيفيكاتتالعان مامان. ونىڭ نەگىزگى بىلىمىنەن باسقا، ادامدى العا جە­تەلەيتىن ادىستەردى مەڭگەرگەن جانە تاجىريبەسى تۋرالى ءبىلىمىن راستايتىن سەرتيفيكاتتى بولۋى كەرەك. ال پسەۆدو-كوۋچتار كوبىنە ورتان­قول كۋرستاردى عانا اياقتاپ نەمەسە كىتاپتار­دان وقىپ «ماماندانىپ» الادى.

كوۋچ بەدەلىن العا تارتىپ، ادامعا ءوز ويىن، پىكىرىن تىقپالاپ، قىسىم جاسامايدى. ال پسەۆدومامان تاجىريبەسىن ءوز بەتىمەن باعالاپ، پىكىرىن العا تارتىپ وتىرادى. بىلىكتى مامان ءوزىنىڭ جەكە تاجىريبەسىن پايدالانادى، بىراق ونى نەگىزگە المايدى. ول بەلگىلى ءبىر ادىستەمەنى ۇستانادى جانە ءاربىر كليەنتتىڭ ەرەكشەلىگىن تۇسىنەدى. جاساندىلارى بولسا، ولاردىڭ قۇزىرەتتىلىگىنە كۇماندانعان جاعدايدا، مىنەز-قۇلقىن وزگەرتىپ، اگرەسسيۆتى بولۋى مۇمكىن.

ترەنينگ وتكىزەتىن ماماندارعا بەرىلەتىن سيپاتتاما دا وسىنداي. ماسەلەن، شەتەلدەردە ترەنينگ وتكىزەتىندەردىڭ ارنايى سەرتيفيكاتى، ءبىلىمى بولۋى قاجەت بولماسا بۇل كاسىپكە جول جابىق.

وكىنىشكە قاراي، ەلىمىزدەگى كوۋچ، ترەنەرلەردە پسەۆدومامانداردىڭ ارەكەتى باسىم. بىرىنشىدەن، ترەنينگ وتكىزىپ كوۋچينگكە بەت بۇرعانداردا ارنايى سەرتيفيكات جوق. «اڭقاۋ ەلگە ارامزا مولدانىڭ» كەيپىن كيىپ الىپ، جۇمىسىن دوڭگەلەنتىپ وتىر، ماقساتى – كوپ ادامدى تىركەپ، اقشاسىن السا بولعانى. ەكىنشىدەن، ترەنينگ وتكىزىپ، وزدەرىن كوۋچ سانايتىنداردى سارالاپ قاراساق، ومىرلىك قاتەلىكتەرى، ىشكى وكىنىش، قورقىنىشتارى بار جاندار. ال ولار وزگەلەرگە نە بەرە الادى؟ وزدەرى دە ءوز جولدارىن ناقتى تاۋىپ ۇلگەرمەستەن، وزگەنىڭ ساناسىنا ەنىپ، قاۋىپكە جول باستاپ وتىرماعانىنا كىم كەپىل؟

وسىدان ءبىر-ەكى جىل بۇرىن «سۋپەرماما­سيتا» دەگەن لاقاپ اتپەن ەلگە تانىمال بلوگەردىڭ ۇستىنەن قىلمىستىق ءىس قوزعال­دى. ءىستى الماتى قالالىق پوليتسيا دەپار­تامەنتىنىڭ م ۇلىكتىك قىلمىستاردى تەرگەۋ ءبولىمى قارادى. «سۋپەرماماسيتا» قارجىلىق تاۋەلدىلىكتەن ارىلىپ، نەسيە مەن قارىزدان قۇتىلىپ، ءتۇرلى بيزنەس-اككاۋنتتاردى باسقارۋدى ۇيرەتۋگە باعىتتالعان كۋرسىن 28 مىڭنان استام ادامعا ساتقان. كۋرس باعاسى 22 مىڭ تەڭگەنىڭ توڭىرەگىندە. الايدا ونلاين ساباقتىڭ ساپاسى مەن مازمۇنىنا كوڭىلى تولماعان قاتىسۋشىلار تولەگەن اقشالارىن كەرى قايتارۋ ءۇشىن پوليتسياعا ارىزدانعان. بۇل بلوگەر نەگىزىنەن موتيۆاتور-كوۋچ رەتىندە تانىلدى. بۇعان دەيىن دە سان ءتۇرلى ترەنينگ وتكىزىپ، مىڭداعان ادامنىڭ قالتاسىن قاقتى. ال ءبىر عانا كۋرسىنا بايلانىستى ادامداردىڭ شاعىمىن ەسكەرسەك، ول ساباقتاردىڭ دا پايداسى بولعانىنا سەنۋ قيىن.

«كۋرس وتكىزۋدىڭ دە ءوز ءتارتىبى بار. ەش­قانداي ليتسەنزياسى جوق كۋرستاردان اۋلاق بولۋ كەرەك»، دەيدى زاڭگەرلەر. ويتكەنى اقشاعا ءبىلىمىن ساتاتىن مامانداردى زاڭمەن قۋدالاپ، توقتاۋ سالا المايمىز. سوندىقتان زاڭگەرلەردىڭ ايتۋىنشا، «اقشاسى تولەنگەن ساباقتىڭ مازمۇنى قانشالىقتى ماڭىزدى؟ موتيۆاتور-كوۋچتاردىڭ ايتىپ جۇرگەن كەڭەس­تەرى تەكسەرىلگەن بە، دەرەككوز قايدان الىن­عان؟ ارنايى سەرتيفيكاتى بار ما؟» دەگەن سەكىلدى سۇراقتارعا قىزىعۋشىلىق كليەنت تاراپىنان بولۋى كەرەك. موتيۆاتور-ترەنەردىڭ اقپاراتى ساپاسىز بولسا، ول – قىلمىس ەمەس. بۇعان بايلانىستى ەلىمىزدە زاڭ جوق.

وكىنىشتىسى، حالىقتىڭ كوبى ءالى دە وڭاي اقشا تاۋىپ، ميلليونەر ەتىپ شىعارامىن دەگەن سوزگە سەنەدى. وسى موتيۆاتوردىڭ ساباعىنا قاتىسسام، ءومىرىم جاقسارىپ كەتەدى دەپ ويلايدى. بىراق سول كوۋچ-موتيۆاتورلاردىڭ ءبىلىم دەڭگەيىنە ءمان بەرىپ جاتقان جان سيرەك. ارنايى اكادەميالىق ءبىلىمسىز-اق ادام وقىتىپ، ءدارىس بەرەتىن ينستاوقىتۋشىلار كۇننەن-كۇنگە كوبەيىپ بارادى. قاتىسۋشىلار دا جەتەرلىك. سوندا سول ادامداردىڭ ءومىرىن، بولاشاعى مەن اقشاسىن تانىمايتىن بىرەۋدىڭ قولىنا بەرە سالاتىنداي ساۋاتى تومەن بە؟ اقىلدىسىماقتاردان ۇلگى الىپ، ولاردىڭ تىنىس-تىرشىلىگىن ۇنەمى باقىلاپ وتىراتىن ۋاقىتتى قايدان تابادى؟ اقىلىن ساتقاندارعا الداناتىن اڭقاۋ حالىققا قاتىستى سۇراق كوپ...