بۇل – بىردە-ءبىر لەگيونەرسىز, تەك جەرگىلىكتى حوككەيشىلەردەن قۇرالعان قازاقستان ۇلتتىق قۇراماسىنىڭ بيىلعى الەم چەمپيوناتىنداعى ءتورتىنشى كەزدەسۋى جانە قاتارىنان ءۇشىنشى ويىنداعى جەڭىلىسى. مۇنىڭ الدىندا ءبىزدىڭ جىگىتتەر چەحيا قۇراماسىنا 5:1, شۆەيتساريا حوككەيشىلەرىنە 5:0 ەسەبىمەن ەسە جىبەرگەن بولاتىن. تەك العاشقى تۋردا عانا نورۆەگيا ويىنشىلارىن بۋلليت سەرياسىندا تىزە بۇكتىرىپ (4:3), بيىلعى دۇنيەجۇزىلىك دودانىڭ شاعىن سەنساتسياسىن تىركەگەن ەدى.
الايدا كەيىنگى ويىنداردا عالىم مامبەتاليەۆ شاكىرتتەرى قاتارىنان ەكى تۋردا ازۋلى قارسىلاستارىنان ءىرى ەسەپپەن جەڭىلسە دە, باس باپكەر بۇرىنعىداي مۇزايدىنداعى بارلىق ويىنشىعا سەنىم ءبىلدىردى. تەك كانادامەن وتكەن ويىندا جاڭا قاقپاشىنى سىناپ كورۋگە بەل بۋىپ, العاشقى ءۇش تۋردا 13 شايبا وتكىزىپ العان اندرەي شۋتوۆتىڭ ورنىنا ءبىرىنشى مينۋتتان باستاپ نيكيتا بوياركيندى شىعاردى. دەگەنمەن «بارىستىڭ» قاقپاشىسى بۇل ماتچتا ءوز قاقپاسىنا بەس شايبا وتكىزىپ الدى.
ۇيەڭكى جاپىراقتار ەلىنىڭ وكىلدەرى ءا دەگەننەن ماتچتى بەلسەندى باستاپ, ويىنداعى العاشقى شابۋىلىن گولعا اينالدىردى. كەزدەسۋدىڭ 19-سەكۋندىندا ماككەنزي ۋيگار الىستان ءدال سوققى جاساپ, بوياركيندى قاپى قالدىردى. ارادا بەس مينۋت وتكەندە لوۋسون كراۋز ەكى مارتە مەرگەندىك تانىتىپ, كانادا قۇراماسىنا ايقىن باسىمدىق سىيلادى – 3:0. ءبىرىنشى كەزەڭنىڭ 10-مينۋتىندا قازاقستان قۇراماسى ساپىنان قورعاۋشى ءادىل بەكەتاەۆ گول سوعىپ, ەسەپ ايىرماسىن قىسقارتقان ەدى, بىراق كەزەڭ سوڭىنا دەيىن كانادالىقتار ەسەپتى 4:1-گە جەتكىزدى. شايبانىڭ اۆتورى – دجو ۆەلەنو.
ۇزىلىستەن كەيىن ءبىزدىڭ حوككەيشىلەر قورعانىستا دا, شابۋىلدا دا قارسىلاستارىنىڭ اتاق-داڭقىنان قايمىقپاي, سەنىمدى ويناي باستاعان-دى. بىرنەشە رەت قارسىلاس قاقپاسىنىڭ ماڭايىندا قاۋىپتى شابۋىل ۇيىمداستىرىپ, كانادالىق قورعاۋشىلاردى ءبىراز ابىگەرگە سالدى. بىراق جەرلەستەرىمىز ءوز دەگەنىنە جەتە المادى. ءۇشىنشى كەزەڭدە سولتۇستىك امەريكا قۇرلىعىنىڭ وكىلدەرى تاعى ءبىر شايبا سوعىپ, ويىننىڭ نۇكتەسىن قويدى – 5:1. بۇل جولى سامۋەل بلەيز ءوز اتىن تابلوعا جازدىرتتى.
ءبىزدىڭ جىگىتتەر الەم چەمپيوناتىنداعى كەلەسى ويىنىن بۇگىن تۋرنير كەستەسىندە بەسىنشى ورىندا تۇرعان سلوۆاكيا حوككەيشىلەرىمەن وتكىزەدى.
