انگليانىڭ مانچەستەر قالاسىنداعى 55 مىڭعا جۋىق جانكۇيەرگە ارنالعان «ەتيحاد» ستاديونىندا الاڭ قوجايىندارى چەمپيوندار ليگاسىنىڭ 14 دۇركىن جەڭىمپازى يسپانيانىڭ «رەال» كومانداسىن قابىلداپ, قارسىلاستارىن 4:0 ەسەبىمەن تىزە بۇكتىردى. الاڭ يەلەرى ساپىنان ءبىرىنشى تايمدا بەرناردۋ سيلۆا ءدۋبلدىڭ اۆتورى اتانسا (23 جانە 37-مينۋتتاردا), ەكىنشى تايمدا ەدەر ميليتاو (76-مينۋت) ءوز قاقپاسىنا گول سوعىپ الدى. ال كەزدەسۋدىڭ نۇكتەسىن 91-مينۋتتا حۋليان الۆارەس قويدى. مادريدتەگى العاشقى ماتچتا 1:1 ەسەبى تىركەلگەن بولاتىن.
وسىلايشا, ءتۋرنيردىڭ بىلتىرعى جەڭىمپازدارى بيىل جارتىلاي فينالدا ءسۇرىنىپ, ءوز اتاعىن قورعاي المادى. ءسويتىپ, 2022/23 جىلعى ماۋسىم فينالىندا «ينتەر» مەن «مانچەستەر سيتي» كلۋبتارى كەزدەسەتىن بولدى. ماتچ 11 ماۋسىم كۇنى ىستانبۇلدا وتەدى.
