فوتو: ەuronews
يتاليادا سۋ تاسقىنىنان ءۇش ادام قايتىس بولدى. تاعى ءۇش ادام ءىز-ءتۇزسىز جوعالىپ كەتتى. ەميليا-رومانيادا قاتتى جاڭبىردان كەيىن بىرنەشە وزەن جاعادان شىقتى. چەزەنا قالاسى ءبىراز ۋاقىتقا دەيىن سۋ استىندا قالدى.
«وزەن جاعادان قايتا شىعۋى مۇمكىن. قالا تۇرعىندارىن جاعالاۋ ماڭىنا بارماۋعا جانە جەرتولەلەرگە تۇسپەۋگە شاقىرامىز. وزەننىڭ جانىندا تۇراتىندار مۇمكىندىگىنشە تومەنگى قاباتقا تۇسپەۋى كەرەك», دەدى چەزەنا قالاسىنىڭ اكىمى ەنتسو لاتتۋكا.
يتاليانىڭ سولتۇستىك ايماقتارىندا اۋا رايى ءالى دە قولايسىز بولادى. وڭىرلەردە قاۋىپتىڭ «قىزىل» دەڭگەي رەجيمى ساقتالادى. ەميليا-رومانيا مەن توسكانادا 6 مىڭعا جۋىق ادام ەۆاكۋاتسيالاندى.
سولتۇستىك ادرياتيكاعا جاڭبىر كوپ مولشەردە جاۋدى, ول حورۆاتيا, بوسنيا جانە گەرتسەگوۆيناعا دا اسەر ەتتى.
بوسنيانىڭ باتىسىنداعى بىرنەشە قالالار مەن ەلدىمەكەندەر سۋ استىندا قالدى. جۇزدەگەن ۇيلەردىڭ تۇرعىندارى شۇعىل تۇردە قاۋىپسىز جەرگە كوشىرىلدى. ەڭ قيىن جاعداي – ەلدىڭ سولتۇستىك-باتىسىنداعى بيحاچ قالاسىنىڭ ماڭىندا. وندا جاعالاۋلار مەن جولدارعا سەبۋ ءۇشىن قاجەتتى قۇم دوربالار جەتكىزىلىپ جاتىر.
كورشىلەس حورۆاتيانىڭ بىرنەشە ايماعىندا توتەنشە جاعداي رەجيمى جاريالاندى. وندا اسكەري قىزمەتشىلەر ۋاقىتشا بوگەتتەر مەن بەكىنىستەر سالۋعا كىرىستى.
