يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتى بويىنشا, مەملەكەتتىك تۇرعىن ءۇي كومەگى اياسىندا الەۋمەتتىك از قامتىلعان ازاماتتاردىڭ كوممۋنالدى قىزمەتتەرگە جۇمسالاتىن شىعىنىن ءىشىنارا وتەۋ جولدارى قاراستىرىلىپ, وسى جىلدىڭ ءبىرىنشى توقسانىندا 372 ملن تەڭگەدەن اسا قاراجات كولەمىندە كومەك كورسەتىلدى. بۇل كومەكپەن 17 مىڭ وتباسى قامتىلدى.
بىلتىر وتەماقى مولشەرى مەن ۇمىتكەرلەردىڭ سانىن ۇلعايتاتىن وزگەرىستەر ەنگىزىلگەن ەدى. وسى ورايدا ەلىمىزدە مۇقتاج ازاماتتاردىڭ كوممۋنالدى قىزمەتتەرگە جۇمسالعان شىعىندارىن وتەۋ ۇلەسى ورتا ەسەپپەن 52,8%-دى قۇراپ وتىر.
اتالعان تۇرعىن ءۇي كومەگى جەرگىلىكتى بيۋدجەتتەن تولەنەدى, سونداي-اق ونى تاعايىنداۋدىڭ بەلگىلەنگەن ەرەجەلەرى بار. جوعارىدا ايتىلعان شىعىننىڭ شەكتى دەڭگەيى مەن تۇرعىن ءۇي كومەگىن تاعايىنداۋ ءتارتىبىن جەرگىلىكتى ءماسليحاتتار بەكىتەتىنىن ەسكەرگەن ءجون.
وڭىرلىك اكىمدىكتەردىڭ دەرەگىنە سۇيەنسەك, كەيىنگى 4 جىلدا 174 مىڭنان اسا ازامات شامامەن 5 ملرد تەڭگەدەي سوماعا تۇرعىن ءۇي كومەگىنە يە بولعان. وسى رەتتە الەۋمەتتىك از قامتىلعان وتباسىنىڭ تابىسى (مىسالى, 4 ادامنان تۇراتىن وتباسىنى العاندا) ءبىر ادامعا شاققاندا شامامەن 25 798 تەڭگەنى, ال تۇتاستاي وتباسىنا ەسەپتەگەندە 103 192 تەڭگەدەن اسپاۋعا ءتيىس.
