سىبايلاس جەمقورلىققا قارسى ءىس-قيمىل اگەنتتىگى بۇل باعىتتا تەگەۋرىندى جۇمىس جۇرگىزىپ جاتىر. بۇعان سوڭعى كۇندەرى بولعان جاڭالىقتار ارقىلى كوز جەتكىزۋگە بولادى. اگەنتتىك وسى اپتادا «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق استانا قالاسى بويىنشا مامانداندىرىلعان ءبولىمىنىڭ قىزمەتكەرلەرى مەن ازاماتتىق تۇلعالاردان ۇيىمداستىرىلعان توپقا قاتىستى سوتقا دەيىنگى تەرگەپ-تەكسەرۋدى اياقتادى.
قىلمىستىق ءىس «Web-مودۋل» جانە «يس تسون» اقپاراتتىق جۇيەلەرىندە كولىك قۇرالدارى تۋرالى مالىمەتتەردى زاڭسىز ەنگىزۋ جانە جويۋ, مامىلەلەردىڭ جازباشا نىساندارىن قولدان جاساۋ فاكتىلەرى بويىنشا تەرگەلدى. قىلمىستىق توپتىڭ 2022 جىلدىڭ قاڭتار-مامىر ايلارى ارالىعىندا زاڭنامادا قاراستىرىلعان الىمدار مەن تولەمدەردى جاساماي-اق شەتەلدەن اكەلىنگەن 475 اۆتوكولىكتى زاڭسىز تىركەگەنى بەلگىلى بولعان. وسىعان بايلانىستى مەملەكەتكە 1,4 ملرد تەڭگە كولەمىندە اسا ءىرى كولەمدە زالال كەلتىرىلدى. جالپى سانى 30 ادامعا قىلمىس جاسادى دەپ ايىپ تاعىلىپ وتىر. ولاردىڭ قاتارىندا استانا قالاسى بويىنشا №2 ارنايى حالىققا قىزمەت كورسەتۋ ورتالىعىنىڭ باسشىسى, 4 پوليتسيا قىزمەتكەرى مەن اۆتوكولىكتەردى زاڭسىز راسىمدەۋ بويىنشا ءوز قىزمەتتەرىن ۇسىنعان دەلدالدار بار. قازىرگى ۋاقىتتا قىلمىستىق ءىس ماتەريالدارىمەن تانىسۋ ءجۇرىپ جاتىر. وسى ورىن العان جاعدايلارعا بايلانىستى سىبايلاس جەمقورلىققا قارسى كۇرەس قىزمەتى ازاماتتاردى كولىكتەردى تىركەۋ كەزىندە دەلدالداردىڭ قىزمەتىنە جۇگىنبەۋگە شاقىرادى.
ەجەلگى سكيف ويشىلى اناحاريس ايتقان «زاڭ دەگەنىمىز – ورمەكشىنىڭ تورى: كىشكەنتاي جاندىكتەر تۇتىلادى دا, ىرىلەرى بۇزىپ-جارىپ شىعادى» دەگەن زامان قازىر ءوتىپ بارادى. جاڭا قازاقستاندا مۇنداي زاڭعا ورىن جوق. بۇدان بىلاي سىبايلاس جەمقورلىق جاساۋ قىلمىستارى بويىنشا تەك مايدا شاباقتار ەمەس, ۇلكەن «ويىنشىلار» دا لايىقتى جازاسىن الاتىن بولادى. ءبىر سوزبەن ايتقاندا, جەمقورلىققا «قامقورلىق» بولمايدى.
سونىڭ ءبىر دالەلى – 10 مامىردا انتيكور «اتامەكەن» ۇلتتىق كاسىپكەرلەر پالاتاسى باسقارماسىنىڭ ەكس-توراعاسى ا.مىرزاحمەتوۆتى ۇستادى. وعان الاياقتىق جانە كاسىپكەردى ونىڭ تۋىسىن قىلمىستىق جاۋاپكەرشىلىكتەن بوساتۋعا جاردەمدەسكەنى ءۇشىن اسا ءىرى كولەمدە پارا بەرۋگە يتەرمەلەدى دەگەن ايىپ تاعىلىپ وتىر. قازىر كۇدىكتى استانا قالاسى پد ۋاقىتشا ۇستاۋ وقشاۋلاعىشىنا قامالدى. قىلمىستىق ءىس بويىنشا جەدەل-تەرگەۋ ءىس-شارالار كەشەنى جۇرگىزىلىپ, ونىڭ باسقا دا قىلمىستارعا قاتىسى تۋرالى اقپارات تەكسەرىلىپ جاتىر.
«ال كەشە سىبايلاس جەمقورلىققا قارسى ءىس-قيمىل اگەنتتىگى استانا قالاسى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى ءاليا قوجاباەۆانىڭ ۇستالعانىن مالىمدەدى. «سوتقا دەيىنگى تەرگەۋ باستالعانىن راستايمىز. تەرگەۋ شارالارى جالعاسىپ جاتىر. قر قپك-ءنىڭ 201-بابىنا سايكەس وزگە اقپارات تاراتۋعا جاتپايدى», دەپ حابارلادى انتيكور.
ءاليا قوجاباەۆا 1977 جىلى كوكشەتاۋدا دۇنيەگە كەلگەن. ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىن, «فەميدا» قاراعاندى زاڭ اكادەمياسىن, پرەزيدەنت جانىنداعى مەملەكەتتىك باسقارۋ اكادەمياسىن بىتىرگەن. ەڭبەك جولىن 2002 جىلى باستاعان ول سوڭعى قىزمەتتى 2020 جىلدىڭ اقپان ايىنان بەرى اتقارىپ كەلەدى. وعان دەيىن اقمولا وبلىسى كاسىپكەرلىك جانە ونەركاسىپ باسقارماسىنىڭ باستىعى, استانا قالاسى كاسىپكەرلىك جانە ونەركاسىپ, قوعامدىق دامۋ جانە قورشاعان ورتانى قورعاۋ جانە تابيعاتتى پايدالانۋ باسقارمالارى باستىعىنىڭ ورىنباسارى سىندى لاۋازىمدى قىزمەتتەردى اتقارعان.
ەسكە سالا كەتسەك, كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساعانى سوت ۇكىمىمەن ناقتى بەلگىلەنگەنگە دەيىن ادام كىناسىز دەپ ەسەپتەلەدى. سونىمەن قاتار, سىبايلاس جەمقورلىقتىڭ كەز كەلگەن فاكتىلەرى تۋرالى انتيكوررۋپتسيالىق قىزمەتكە جانە Call-ورتالىققا 1424 ءنومىرى بويىنشا حابارلاسۋعا بولاتىنىن ەسكە سالامىز.
