العاشقى تۋردا نورۆەگيانى بۋلليتتە تىزە بۇكتىرىپ (4:3), ەكىنشى تۋردا چەحيادان جەڭىلگەن (5:1) جەرلەستەرىمىز ءۇشىنشى تۋردا تاعى دا جەڭىلۋگە ءماجبۇر بولدى. «ريگا ارەنادا» وتكەن كەزدەسۋ 5:0 ەسەبىمەن ەۋروپالىقتاردىڭ پايداسىنا شەشىلدى. ءبىزدىڭ تازا قازاقستاندىقتاردان جاساقتالعان جاس قۇرامامىز كەزدەسۋدى بەلسەندى باستاعانىمەن, شۆەيتساريالىقتاردىڭ قارقىنىنا نەبارى بەس-اق مينۋت توتەپ بەرۋگە شامالارى جەتتى.
كەزدەسۋدىڭ بەسىنشى مينۋتىندا 24 جاستاعى قورعاۋشى توبياس گايسسەر ويىننىڭ ەسەبىن اشسا, ەكىنشى كەزەڭدە فابريس گەرتسوگ (27-مينۋت) پەن دەميەن ريات (31) دالدىك تانىتىپ, شۆەيتساريانىڭ باسىمدىعىن ناقتىلاي ءتۇستى – 3:0. ءۇشىنشى كەزەڭدە جەرلەستەرىمىز چەحيامەن وتكەن ويىنداعىداي ءجيى ءتارتىپ بۇزىپ, ەكى مينۋتتىق كىشى ايىپپەن ءۇش مارتە جازالاندى. ناتيجەسىندە, قارسىلاستار سان باسىمدىعىن ءتيىمدى پايدالانىپ, اندرەي شۋتوۆتىڭ قاقپاسىنا تاعى ەكى شايبا ەنگىزدى. بۇل جولى نينو نيدەررايتەر (41) مەن رومەن ليوففەل (49) مەرگەندىگىمەن كوزگە ءتۇستى.
ءۇشىنشى تۋر ويىندارىنان كەيىن ۆ توبىنىڭ تۋرنير كەستەسىندە بىردە-ءبىر ويىندا جەڭىلمەگەن شۆەيتساريا حوككەيشىلەرى 9 ۇپايمەن جەكە-دارا كوش باستادى. ەكىنشى ورىندا 8 ۇپاي بار كانادا كەلەدى. ال ۇزدىك ۇشتىكتى چەحيا قۇراماسى تۇيىندەپ تۇر. ولاردىڭ ەنشىسىندە – 7 ۇپاي بار. قازاقستان حوككەيشىلەرى ەكى ۇپايمەن جەتىنشى ورىنعا جايعاسسا, سوقىر ۇپايى جوق سلوۆەنيا كوش سوڭىندا قالىپ قويدى.
