«مۋزەيلەر ءتۇنى» – بۇل ەلىمىزدىڭ مادەني ومىرىندەگى ەلەۋلى وقيعا, كوپشىلىك اسىعا كۇتەتىن ءداستۇرلى شارالاردىڭ ءبىرى. اۋقىمدى شارانىڭ نەگىزگى ماقساتى – ەلىمىزدىڭ ەڭ باستى الەۋمەتتىك-مادەني مەكەمەسى رەتىندە مۋزەيگە دەگەن كوپشىلىكتىڭ قىزىعۋشىلىعىن وياتۋ, تاريحي-مادەني مۇرالارعا ارنالعان بىرەگەي شارالار مەن باعدارلامالار ارقىلى مۋزەيدىڭ بەدەلىن ارتتىرۋ. ول جاستاردىڭ شىعارماشىلىعىن دامىتۋعا, مادەني ورتا قۇرۋعا ۇلكەن سەپتىگىن تيگىزەدى.
ICOM حالىقارالىق مۋزەيلەر كەڭەسىنىڭ تۇجىرىمداماسىنا سايكەس, بيىلعى جىلعى اكتسيانىڭ تاقىرىبى – «مۋزەيلەر, تۇراقتىلىق پەن ءال-اۋقات». اتالمىش اكتسيا اياسىندا ۇلتتىق مۋزەي ۇجىمى ەلوردا تۇرعىندارى مەن قوناقتارى ءۇشىن «مۋزەي-ۋاقىت اعىمىندا» اتتى اۋقىمدى تاريحي-تانىمدىق جوباسىن ۇسىنادى.
كۇندىزگى 10:00-18:00 ارالىعىندا عىلىمي كىتاپحانادا «مۋزەيدىڭ قور ساقتاۋ قىزمەتىن ۇيىمداستىرۋ: تەورياسى مەن پراكتيكاسى» سيمپوزيۋمى وتسە, مۋزەي زالدارىندا «بالدىرعان گيد» جوباسى اياسىنداعى شولۋ ەكسكۋرسيالار, «جادىگەرلەر سويلەيدى» كۆەست-ساباعى ۇيىمداستىرىلادى.
كەشكى 18:00-دەن باستاپ ۇلتتىق مۋزەي باسىلىمدارى مەن «الماتى-كىتاپ» باسپاسىنىڭ كىتاپ كورمەسى, «تاريحي تۇلعالار: قۋىرشاق بەينەسىندە» اۆتورلىق قۋىرشاقتار كورمەسى, «كونەنىڭ كوزىن اشۋ» اتتى قر ۇلتتىق مۋزەيى كونسەرۆاتسيا جانە قالپىنا كەلتىرۋ قىزمەتىنىڭ كورمەسى مەن شەبەرلىك ساباقتارى, قولونەر جارمەڭكەسى, عىلىمي دارىستەر, تەاترلاندىرىلعان ەكسكۋرسيالار مەن ويىن-كۆەستتەر باستالادى. «جۇلدىزدى گيد» جوباسىندا ەلگە تانىمال تاريحشىلار راديك تەمىرعاليەۆ, جاقسىلىق ءسابيتوۆ, مۇحيت-ارداگەر سىدىقنازاروۆ, مەديامەنەدجەر ارمانجان بايتاسوۆ, بلوگەر دياس كامەريدانوۆ پەن «Pygmalion» گالەرەياسىنىڭ نەگىزىن قالاۋشى داناگۇل تولەپباي مۋزەي زالدارىندا ەكسكۋرسيا جۇرگىزەدى.
سونداي-اق تانىمدىق كەش بارىسىندا ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ ۇرمەلى اسپاپتار وركەسترى مەن «قورقىت» ەتنو-فولكلورلىق ءانسامبلى, بي ۇجىمدارى, ديدجەيلەر ونەرلەرىن پاش ەتىپ, سوڭىندا وتتى شوۋ كورسەتىلەدى.
