ءۇش اپتاعا جالعاساتىن اپەننين تۇبەگىندەگى ۆەلوشاباندوزدار باسەكەسىنە «Astana Qazaqstan» ۆەلوكومانداسىنىڭ وكىلدەرى دە قاتىسىپ جاتىر. وليمپيادا چەمپيونى الەكساندر ۆينوكۋروۆ جەتەكشىلىك ەتەتىن «استانا» كومانداسى ساپىنان وسى جارىستىڭ بۇعان دەيىنگى بىرنەشە كەزەڭىندە توپ جارىپ, ۇزدىكتەر قاتارىنان كورىنگەن 37 جاستاعى بريتانيالىق سپرينتەر مارك كەۆەنديش, 24 جاستاعى يتاليالىق سامۋەلە باتتيستەللا, 31 جاستاعى امەريكالىق دجو دومبروۆسكي, 29 جاستاعى يتاليالىق دجانني موسكون, 24 جاستاعى وتانداسىمىز ۆاديم پرونسكي, 39 جاستاعى يسپانيالىق لۋيس-لەون سانچەس, 25 جاستاعى يتاليالىق كريستيان سكاروني جانە 27 جاستاعى تاعى ءبىر يتاليالىق ۆەلوشاباندوز سيمونە ۆەلاسكو كوش باسىنان كورىنۋگە تىرىسىپ جاتىر.
114 جىلدىق تاريحى بار «دجيرو د’يتاليا» دوداسىندا «استانا» ۆەلوكومانداسىنىڭ جەڭىسپەن ورىلگەن تاماشا ءداستۇرى بار ەكەنىن جانكۇيەرلەر جاقسى بىلەدى. ماسەلەن, 2008 جىلى «استانا» ساپىندا ونەر كورسەتكەن يسپانيانىڭ داڭقتى ۆەلوشاباندوزى البەرتو كونتادور ءوز كارەراسىندا العاش رەت «دجيرو د’يتاليا» جارىسىندا جەڭىمپاز اتانسا, 2013 جىلى يتاليانىڭ ايگىلى ۆەلوشاباندوزى ۆينچەنتسو نيبالي ۇزدىك شىقتى. سونداي-اق ول اراعا ءۇش جىل سالىپ 2016 جىلى بۇل جەتىستىگىن قايتالاپ, «استانا» جانكۇيەرلەرىن تاعى ءبىر مارتە قۋانتتى. جەر-جاھاننىڭ جانكۇيەرلەرى «اكۋلا» دەپ اتاپ كەتكەن داڭقتى ۆەلوشاباندوز بىلتىر «استانا» ساپىنا قايتا ورالىپ, ءوزىنىڭ سپورتتىق مانسابىن اياقتاعان ەدى. ۆينچەنتسو نيبالي كارەراسىن بەكەرگە قازاقستان كومانداسى ساپىندا اياقتاۋعا شەشىم قابىلداعان جوق. ويتكەنى سپورتتىڭ ءدال وسى تۇرىندەگى ەڭ ايتۋلى جەڭىستەرىنە «استانا» ساپىندا ونەر كورسەتىپ جۇرگەن كەزىندە قول جەتكىزگەن ەدى. اتاپ ايتقاندا, 2013 جىلى «استاناعا» كەلە سالىپ «تيررەنو-ادرياتيكو» تۋرىندا, 2014 جىلى «تۋر دە فرانس», 2013 پەن 2016 جىلدارى «دجيرو د’يتاليا», 2015 جىلى «دجيرو دي لومبارديا» تۋرلارىندا دارا شىققان بولاتىن.
وكىنىشكە قاراي, البەرتو كونتادور, ۆينچەنتسو نيبالي سەكىلدى داڭقتى ۆەلوشاباندوزدار كوماندادان كەتكەن سوڭ «استانانىڭ» دا توپ كوماندالار اراسىندا توپ باستاۋى ازايدى. الەكساندر ۆينوكۋروۆ سول ولقىلىقتىڭ ورنىن تولتىرۋ ءۇشىن, «استانانىڭ» ابىرويىن قايتا تىكتەۋ ءۇشىن جىل باسىندا كومانداعا ۇلىبريتانيانىڭ ايگىلى ۆەلوشاباندوزى, كوپتەگەن اسا ءىرى حالىقارالىق جارىستىڭ جەڭىمپازى ءارى جۇلدەگەرى, الەمدەگى ەڭ ۇزدىك سپرينتەرلەردىڭ ءبىرى ءارى بىرەگەيى مارك كاۆەنديشتى شاقىرعان بولاتىن.
«تۋر دە فرانس», «دجيرو د’يتاليا» جانە «يسپانيا ۆۋەلتاسى» سەكىلدى ەڭ بەلدى ءارى مارتەبەلى جارىستاردىڭ بارلىعىندا ەڭ ۇزدىك سپرينتەرگە تيەسىلى ارنايى سىيلىقتاردى يەلەنگەن مارك ازىرگە «دجيرو د’يتاليا» جارىسىندا جارقىراپ كورىنە الار ەمەس. 38 جاستاعى ۆەلوشاباندوز قازىرگى تاڭدا جالپى ەسەپتە 156-ورىندا كەلەدى. كوشباسشى رەمكو ەۆەنەپۋلدەن ەكى ساعاتقا جۋىق قالىپ قويىپ وتىر. دەگەنمەن مارك كاۆەنديش سپرينتەرلەرگە ارنالعان بەسىنشى كەزەڭدە مارەگە ءتورتىنشى بولىپ جەتكەنىن ايتا كەتۋ كەرەك. سونىمەن قاتار ول سپرينتەرلەر باسەكەسىندە 18 ۇپاي جيناپ, 11-ورىنعا جايعاسقان.
ال ازىرگە «استانا» ساپىنداعى ەڭ ۇزدىك ناتيجە يتاليالىق ۆەلوشاباندوز سيمونە ۆەلاسكوعا تيەسىلى. توعىز كەزەڭنىڭ قورىتىندىسى بويىنشا ول 22-ساتىدا تۇر. الدا ءالى 11 كەزەڭ بار ەكەنىن ەسكەرسەك, ءبىزدىڭ ەل كومانداسىنىڭ وكىلدەرىن بۇدان دا جوعارى ورىنداردان كورىپ قالۋىمىز ابدەن مۇمكىن.
