بەلگىلى سپورت ءجۋرناليسى تاشكەنتتە ەل نامىسىن قورعاپ, الەم چەمپيونى اتانعان سانجار تاشكەنبايمەن ساپارلاس بولعانى تۋرالى ايتتى.
«تاشكەنت-استانا باعىتىندا ۇشقان ۇشاققا ءمىنىپ, ورنىما جايعاسقانىم سول ەدى, جانىما كەلىپ سانجار تاشكەنباي جايعاستى. سودان استاناعا جەتكەنشە ءبىراز اڭگىمەلەستىك.
استاناداعى جامبىل جاباەۆ اتىنداعى №4 مەكتەپ-گيمنازيادا وقىعان سانجار 17 جاسىندا بوكستان ازيا جانە الەم چەمپيونى بولعان. 18 جاسىندا ەرەسەكتەر اراسىنداعى ازيا چەمپيونى اتاندى. اڭگىمە بارىسىندا ءبىر اتتەگەن-ايى بار ەكەنىن دە ايتىپ قالدى. مەن ءبىر سوزىمدە قايدا وقيسىڭ دەپ قالدىم.
ول بولسا «ەشقايدا وقىمايمىن, 2021 جىلى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە وقىتۋشى-جاتتىقتىرۋشى ماماندىعىنا گرانتقا وقۋعا تۇسكەن ەدىم. بىراق وقۋىم ۇزاققا بارمادى, ءبىرىنشى كۋرستىڭ ورتاسىنان باستاپ ستيپەنديامنان ايىرىلدىم. ودان كەيىن ساباققا بەلسەندى قاتىسپاعانىم جانە جازعى پراكتيكاعا قاتىسپاعانىم ءۇشىن وقۋدان شىعىپ قالدىم. اقىلى وقۋعا اۋىسايىن دەسەم قاراجات جەتىسپەيدى, ۇيدە مەنەن باسقا بەس بالا بار, اكەم قاراپايىم تاكسيست, انام ءۇي شارۋاسىنان بوسامايدى. بۇل كەزدەرى مەن جاستار اراسىنداعى ازيا جانە الەم چەمپيوناتىنا قىزۋ دايىندىق جۇرگىزىپ جۇرگەنمىن. تىنىمسىز جاتتىعۋلارىمنىڭ ارقاسىندا ەكى جارىستا دا چەمپيون بولدىم. ال 2022 جىلى ەرەسەكتەر اراسىنداعى چەمپيوناتتا چەمپيون اتاندىم. بىراق وقۋىمنان شىعىپ قالدىم, سوعان وكىنەمىن, اعا» دەپ كوڭىلىندە جۇرگەن ءبىر كىربىڭىن ءبىلدىردى», دەلىنگەن جۋرناليست جازباسىندا.
ايتا كەتەيىك, سانجار تاشكەنباي 2021 جىلى پولشادا وتكەن بوكستان جاستار اراسىنداعى الەم چەمپيوناتىندا ءبىرىنشى ورىن يەلەنگەندە استانا اكىمدىگى وعان وقۋ گرانتىن تاعايىنداعان بولاتىن.
