دالىرەك ايتقاندا, دەپۋتات كەلەسى ماسەلەلەردى قاراستىرۋدى سۇرادى:
- يادرولىق سىناقتار سالدارىنان زارداپ شەككەن ازاماتتارعا مىندەتتى مەديتسينالىق ساقتاندىرۋ جارنالارىن مەملەكەت اتىنان جۇزەگە اسىرۋ;
- يادرولىق سىناقتاردان زارداپ شەككەن, بىراق ەلدىڭ باسقا وڭىرلەرىنە كوشىپ كەتكەن ازاماتتارعا زاڭنامامەن كوزدەلگەن بارلىق قۇقىقتار مەن جەڭىلدىكتەردى ۇسىنۋ;
- زارداپ شەككەن ازاماتتارعا بەرىلەتىن ۇستەمەاقىلاردىڭ بارلىق تۇرلەرىن ەكى ەسەگە ۇلعايتۋ جانە جىل سايىنعى قوسىمشا ەڭبەك دەمالىسىن تولەۋگە مەملەكەتتىك قولداۋ كورسەتۋ;
- بارلىق زارداپ شەككەن ازاماتتارعا تولىق كەشەندى مەديتسينالىق تەكسەرۋ جۇرگىزۋ جانە مەديتسينالىق وڭالتۋ ۇيىمداردا ەمدەلۋىن قامتاماسىز ەتۋ;
- وڭالتۋ ورتالىقتارى مەن مامانداندىرىلعان شيپاجايلاردىڭ سانىن كوبەيتۋ.
«زەينەتاقىعا ۇستەمەاقى الۋ قۇقىعى توتەنشە رادياتسيالىق قاۋىپتى جانە ەڭ جوعارى رادياتسيالىق قاۋىپتى ايماقتاردا تۇرىپ جاتقاندارعا جانە 1998 جىلعى 1 قاڭتارعا دەيىن زەينەتكە شىققاندارعا بەرىلگەن. ال رادياتسيادان زارداپ شەگىپ, باسقا ايماقتارعا كوشىپ كەتكەن جانە زەينەتكە 1998 جىلعى 1 قاڭتاردان كەيىن شىققانداردا بۇنداي قۇقىق جوق. قوسىمشا ەڭبەكاقى جانە جىل سايىنعى قوسىمشا اقىلى دەمالىس تەك قانا زارداپ شەككەن ايماقتاردا تۇرىپ جاتقان ازاماتتارعا عانا بەرىلەدى. باسقا ايماقتارعا كوشىپ كەتكەن ازاماتتار بۇل قۇقىقتارمەن قامتاماسىز ەتىلمەگەن. بارلىق جۇمىس بەرۋشىلەر جىل سايىنعى قوسىمشا دەمالىستى تولەي المايدى جانە باسقا دا قاجەتتى تولەمدەردى تولىق قامتاماسىز ەتپەيدى, سەبەبى بۇل ءۇشىن قارجىلىق مۇمكىندىكتەر جوق», دەيدى دەپۋتات.
دەپۋتاتتىڭ سوزىنشە, زارداپ شەككەندەردىڭ بارلىعى ۋاقتىلى مەديتسينالىق تەكسەرىستەن وتپەگەن جانە ولارعا ءتيىستى دياگنوستيكا جاسالماعان. وڭالتۋ ورتالىقتارىندا دا ەم الۋ قولجەتىمسىز.
سونىمەن قاتار, دەپۋتاتتىڭ مالىمەتىنە سۇيەنسەك, ءجيى كوتەرىلەتىن ماسەلەلەردىڭ ءبىرى - زەينەتكە شىعۋ جاسىن تومەندەتۋ. وعان قوسا, زارداپ شەككەن ازاماتتاردىڭ كوپشىلىگى تۇراقتى جۇمىس ورنىندا ەڭبەك ەتپەيدى. وسىعان بايلانىستى, ولار مىندەتتى مەديتسينالىق ساقتاندىرۋ جارنالارىن تولەي المايدى.
