سپورتشىلارىمىزدى مادەنيەت جانە سپورت ءمينيسترلى اسحات ورالوۆ تا اۋەجايدان قارسى الدى.
ەستەرىڭىزگە سالا كەتەيىك, سانجار تاشكەنباي (48 كگ), ماحمۋد سابىرحان (54 كگ), اسلانبەك شىمبەرگەنوۆ (71 كگ) جانە نۇربەك ورالباي (80 كگ) الەم چەمپيوندارى اتانسا, دۋلات بەكباۋوۆ (67 كگ) كۇمىس مەدال ەنشىلەدى.
اتالعان ماراپاتتار ءۇشىن قازاقستاندىق بوكسشىلار حالىقارالىق بوكس قاۋىمداستىعىنان (IBA) قوماقتى قاراجات الادى. مىسالى, التىن - 200 000 دوللارعا, كۇمىس - 100 000 دوللارعا باعالانادى.
سونىمەن قاتار, قازاقستان بوكس فەدەراتسياسى دا چەمپيونداردى قۇر الاقان قالدىرماي, قوسىمشا 100 000 دوللاردان تولەيدى.
ايتا كەتەيىك, قازاقستان قۇراماسى تاشكەنتتە 4 التىن, 1 كۇمىس مەدالدى قورجىنعا سالىپ, جالپى ەسەپتە 2-ورىن الدى.
جالپى, قازاقستان 1993 جىلدان بەرى ەگەمەن ەل رەتىندە وسىمەن 16 رەت الەم چەمپيوناتىنا بىلعارى قولعاپ شەبەرلەرىن جىبەردى. قازىر ەنشىمىزدە 18 التىن, 16 كۇمىس, 22 قولا جۇلدە بار. وسىنىڭ ارقاسىندا جالپى ءاچ تاريحىنداعى مەدال ەسەبىندە قازاقستان اقش-تى باسىپ وزىپ, 3-ورىنعا كوتەرىلدى. ءبىرىنشى ورىنعا - كۋبا, ەكىنشى ورىنعا رەسەي مەملەكەتتەرى جايعاسقان. ۇلتتىق قۇراما وسىعان دەيىن تەك 2013 جىلى الماتىدا وتكەن دۇنيەجۇزى باسەكەسىندە 4 التىنعا يە بولعان.
