ريگاداعى 10 مىڭ جانكۇيەرگە ارناپ سالىنعان «ريگا ارەنا» مۇز سارايىندا ءوتىپ جاتقان ۆ توبىنىڭ ويىندارى ءا دەگەننەن تارتىستى باستالدى. الەم چەمپيوناتىنا بىردە-ءبىر لەگيونەرسىز, تەك قازاقستان حوككەي مەكتەبىنىڭ تاربيەلەنۋشىلەرىمەن اتتانعان جەرلەستەرىمىز ماماندار تاراپىنان وسى جاھان بىرىنشىلىگىنىڭ اۋتسايدەرى سانالعان بولاتىن. الايدا جەرلەستەرىمىز العاشقى تۋردا-اق دۇنيەجۇزىلىك دوداعا ۇپاي تاراتۋ ءۇشىن ەمەس, ۇپاي ولجالاۋ ءۇشىن كەلگەنىن بايقاتىپ, بارشا شايبالى حوككەي جانكۇيەرلەرىنىڭ تاڭدايىن قاقتىرىپ, ازۋلى نورۆەگيا قۇراماسىن تىزە بۇكتىردى.
جاسىراتىنى جوق, العاشقى كەزەڭدە سكانديناۆيالىق حوككەيشىلەر بەلسەندى بولىپ, ءبىزدىڭ جىگىتتەر ولاردىڭ قارقىنىنا ىلەسە المادى. ءبىرىنشى كەزەڭنىڭ سەگىزىنشى مينۋتىندا ميكاەل حاگا ويىننىڭ ەسەبىن اشسا, ارادا ەكى مينۋت وتكەندە ولە دجۋليان حولم مەرگەندىك تانىتىپ, ەسەپتى ەسەلەي ءتۇستى – 2:0. دەگەنمەن, كەزەڭنىڭ سوڭىنا قاراي ماكسيم مۇحامەتوۆ ءادىل بەكەتاەۆ پەن باتىرلان مۇراتوۆتىڭ ناتيجەلى پاسىنان كەيىن نورۆەگيا قاقپاسىنان ساڭىلاۋ تاۋىپ, تارازى باسىن قىسقارتا الدى.
ءبىرىنشى كەزەڭنىڭ سوڭعى مينۋتىندا كيريلل ساۆيتسكي ەكى مينۋتتىق كىشى ايىپپەن جازالانىپ, مۇزايدىننان قۋىلعان سوڭ قوناقتار ەكىنشى كەزەڭدى سان باسىمدىعىمەن باستادى. ناتيجەسىندە, 22-مينۋتتا ميكاەل حاگا ءدۋبلدىڭ اۆتورى اتانىپ, نورۆەگيالىقتار ەسەپتە تاعى دا العا ۇزاپ كەتتى. وسىدان كەيىن ويىن ءبىراز سايابىرسىعانداي بولدى. ەكىنشى كەزەڭنىڭ اياقتالۋىنا بەس مينۋت قالعاندا قازاقستان قۇراماسىنىڭ كەزەكتى ءبىر شابۋىلى كەزىندە قارسىلاستاردىڭ ويىنشىسى ەرەجە بۇزىپ, ەكى مينۋتتىق كىشى ايىپپەن جازالاندى. سان باسىمدىعىنا يە بولعان جەرلەستەرىمىز سول مۇمكىندىكتى ءتيىمدى پايدالانىپ, ەسەپ ايىرماسىن تاعى دا قىسقارتتى – 3:2. گولدىڭ اۆتورى – ۆالەري ورەحوۆ. ال ءۇشىنشى كەزەڭنىڭ بەل ورتاسىندا نيكيتا ميحايليس تارازى باسىن تەڭەستىرىپ, ويىندى وۆەرتايمعا ۇلاستىردى – 3:3.
ال قوسىمشا مينۋتتا جەڭىمپاز انىقتالماعان سوڭ, حوككەيشىلەر بۋلليت سەرياسىندا باق سىنادى. بۇل كەزەڭدە ۇلتتىق قۇراما كاپيتانى 37 جاستاعى رومان ستارچەنكو ەكى مارتە دالدىك تانىتىپ, قازاقستان قۇراماسىنا الەم چەمپيوناتىنداعى العاشقى جەڭىستى سىيلادى. قورىتىندى ەسەپ – 4:3. بۇل ماتچتا قازاقستان قۇراماسى ساپىنان باتىرلان مۇراتوۆ ۇزدىك ويىنشى اتاندى. سونىمەن قاتار نورۆەگيامەن وتكەن ماتچتا سەگىز وتانداسىمىز الەم چەمپيوناتىنداعى العاشقى ويىندارىن وتكىزدى. ولار: ماكسيم مۇحامەتوۆ, باتىرلان مۇراتوۆ (ەكەۋى دە 1999 جىلعى), تاميرلان گايتاميروۆ (2000), ماكسيم مۋسوروۆ, ارتەم كورولەۆ, ءاليحان ومىربەكوۆ, دانيل بۋتەنكو (بارلىعى – 2001 جىلعى) جانە دىنمۇحامەد قايىرجان (2003). بۇعان دەيىن اتالعان حوككەيشىلەر تەك جاسوسپىرىمدەر جانە جاستار اراسىنداعى الەم چەمپيوناتتارىنا قاتىسقان بولاتىن.
عالىم مامبەتاليەۆ شاكىرتتەرى كەشە العاشقى تۋردا سلوۆاكيا حوككەيشىلەرىنەن باسىم تۇسكەن چەحيا قۇراماسىمەن كەزدەستى.
