قۇرىلتايعا جازۋشىلار وداعىنىڭ باسقارما مۇشەلەرىمەن قاتار, ەلىمىزدىڭ بارلىق ءوڭىرلەرىندەگى مۇشەلەرى, فيليال ديرەكتورلارى قاتىسادى. سونىمەن قاتار الىس-جاقىن شەت ەلدەردەن قۇرمەتتى قوناقتار, ەلىمىزدىڭ ونەر مەن عىلىم قايراتكەرلەرى شاقىرىلعان.
«قۇرىلتايدىڭ جاقسى ءبىر قاسيەتى – كوپ جىل بويى كورمەگەن ەسكى قالامداس دوستارىمىزدى كورىپ وتىرمىز. سوندىقتان ازىرشە قۇرىلتايدىڭ اتموسفەراسى كوڭىلدى دەپ ايتۋعا بولادى. ارينە, جازۋشىلاردىڭ قۇرىلتايى ەشقاشان ءۇنسىز وتكەن ەمەس, جازۋشىلاردىڭ ءۇنى ءاردايىم ەستىلىپ وتىرادى. ويتكەنى جازۋشىلىق دەگەننىڭ ءوزى ەركىندىك. سونداي-اق مويىندايتىن نارسە – ءار جازۋشى وزىنشە ليدەر. سوندىقتان قاي ليدەردى سايلايتىنىمىز بەلگىسىز بولىپ تۇر», دەدى قازاقستاننىڭ ەڭبەك سىڭىرگەن قايراتكەرى, جازۋشى سماعۇل ەلۋباي.
جازۋشىلاردىڭ بۇل القالى جيىنىندا ەكى قۇرىلتاي ارالىعىندا اتقارىلعان شارۋالارعا ەسەپ بەرىلىپ, ادەبيەتكە قاتىستى ماسەلەلەر كوتەرىلەدى, باعىت-باعدار ايقىندالادى. جانە قۇرىلتاي بارىسىندا قازاقستان جازۋشىلار وداعىنا توراعا سايلاۋى وتەدى. ۇمىتكەر كانديداتتار اراسىنان داۋىس بەرۋ ارقىلى توراعا سايلانادى. سونىمەن قاتار توراعا ورىنباسارلارى مەن حاتشىلىق قۇرامى بەلگىلەنەدى.جازۋشىلاردىڭ بۇل القالى جيىنىندا ەكى قۇرىلتاي ارالىعىندا اتقارىلعان شارۋالارعا ەسەپ بەرىلىپ, ادەبيەتكە قاتىستى ماسەلەلەر كوتەرىلەدى, باعىت-باعدار ايقىندالادى.
«قازاقستان جازۋشىلار وداعىنىڭ جارعىسىنا سايكەس 5 جىلدا ءبىر رەت ەسەپ بەرۋ-سايلاۋ جينالىسى بولىپ تۇرادى. بۇگىن مىنەكەي قازاقستان جازۋشىلارى مەن قالامگەرلەرىنىڭ ۇلكەن جيىنى, ۇلكەن باس قوسۋى. بۇل وتكەن 5 جىلعا ەسەپ بەرىپ, الداعى 5 جىلدا اتقارىلاتىن جۇمىستارعا باعىت-باعدار بەلگىلەيدى. بۇگىنگى جيىننىڭ الدىندا وتە كوپ داۋ-دامايلار بولدى. بىراق قازىرگى قازاقستاننىڭ وتپەلى جاعدايىندا ءبىزدىڭ ەلىمىزگە تۇراقتىلىق كەرەك. ول تۇراقتىلىق زيالى قاۋىمنان, قازاقستان جازۋشىلار وداعى سياقتى ۇلكەن بىرلەستىكتەن باستالادى. سوندىقتان بۇگىنگى جيىندا وزدەرىنىڭ شەشىمدەرىن ەلىمىزدىڭ ەرتەڭى ءۇشىن باياندى بولاتىنداي قابىلدايدى دەپ سەنەمىن», دەدى جازۋشى-پۋبليتسيست مارات توقاشباەۆ.
توراعا قىزمەتىنە كىم ۇسىنىلىپ, كىم سايلاناتىنى ازىرگە بەلگىسىز.
