«اشىق» نقا پورتالىندا جاريالانعان پرەزيدەنتتىڭ جارلىق جوباسىنا ساي, ەندى مەملەكەتتىك ساياسي جانە اكىمشىلىك قىزمەتشىلەر قاتارىنا مىناداي جاڭا لاۋازىمدار ەنگىزىلەدى:
- قازاقستان رەسپۋبليكاسىنىڭ جوعارى اۋديتورلىق پالاتاسى توراعاسىنىڭ كومەكشىسى, كەڭەسشىسى;
- قازاقستان رەسپۋبليكاسىنىڭ ۇكىمەتى اپپاراتىنىڭ, قازاقستان رەسپۋبليكاسىنىڭ جوعارى اۋديتورلىق پالاتاسىنىڭ سەكتور مەڭگەرۋشىسى.
ايتا كەتەيىك, ەنگىزىلۋى مۇمكىن لاۋازىمدار ۆ-3 ساناتىنا جاتادى.
«پرەزيدەنت جارلىعىنىڭ جوباسى مەريتوكراتيا قاعيداتىن تابىستى ىسكە اسىرۋ, سونداي-اق قر جوعارى اۋديتورلىق پالاتاسى جۇمىسكەرلەرىن ىنتالاندىرۋ ماقساتىندا ازىرلەندى. جارلىق جوباسىمەن جوعارى اۋديتورلىق پالاتانىڭ سەكتور مەڭگەرۋشىلەرىنىڭ, سونداي-اق توراعانىڭ كومەكشىسى جانە كەڭەسشىسى لاۋازىمدارىن لاۋازىمدار تىزىلىمىنە ءتيىستى وزگەرىس ەنگىزۋ جولىمەن ۆ-3 ساناتىنا جاتقىزۋ ۇسىنىلادى. جارلىق جوباسىن قابىلداۋ رەسپۋبليكالىق بيۋدجەتتەن قارجى شىعىندارىن تالاپ ەتپەيدى جانە تەرىس الەۋمەتتىك-ەكونوميكالىق جانە قۇقىقتىق سالدارلارعا اكەپ سوقتىرمايدى», دەدى جارلىق جوباسىنا تۇسىندىرمە بەرگەن جوعارى اۋديتورلىق پالاتا.
قۇجات 24 مامىرعا دەيىن كوپشىلىك تالقىلاۋدا بولادى.
