مەملەكەت باسشىسى قاسىم-جومارت توقاەۆ ءوزىنىڭ حالىققا جولداۋىندا, وبلىستاعى جۇرتشىلىقپەن كەزدەسۋلەرىندە ەلىمىزدەگى دەنساۋلىق ساقتاۋ سالاسىنا ايرىقشا كوڭىل ءبولۋ كەرەك ەكەنىن, ونىڭ ىشىندە تسيفرلاندىرۋ جۇيەسىنە باسا ءمان بەرىپ, ونى جىلدام دامىتۋ مەن ودان ءارى جەتىلدىرۋدى قاجەت ەتەتىنىن ءجيى تىلگە تيەك ەتەدى. وسىعان بايلانىستى استانادا قازاقستان مەن شۆەتسيا كورولدىگىنىڭ ىنتىماقتاستىق جۇمىسىنىڭ اياسىندا العاشقى تسيفرلىق دياليز كلينيكاسى ىسكە قوسىلدى.
«شۆەتسيا كورولدىگى مەن قازاقستان اراسىنداعى ديپلوماتيالىق قاتىناستىڭ, ەكى ەلدىڭ دەنساۋلىق ساقتاۋ سالاسىنداعى جۇيەلى جۇمىسىنىڭ ناتيجەسىندە ورتالىق ازيا مەملەكەتتەرىنىڭ ىشىندە قازاقستاندا بۇيرەك اۋرۋلارىن ەمدەيتىن «دياۆەرۋم» مەديتسينالىق ورتالىعىنىڭ العاشقى تسيفرلىق دياليز كلينيكاسى اشىلىپ وتىر. راسىمەن, كەيىنگى جىلدارى قازاقستان مەن شۆەتسيا دەنساۋلىق سالاسىن مودەرنيزاتسيالاۋ بويىنشا اۋقىمدى جۇمىس اتقارىپ كەلەدى. سونىڭ ءبىر عانا مىسالى, بيىل قازاقستاننىڭ 100-دەن اسا ستۋدەنتى شۆەتسيانىڭ بەدەلدى مەديتسينالىق ۋنيۆەرسيتەتىندە ءبىلىم الادى. بۇل – كەيىنگى جىلدارمەن سالىستىرعاندا رەكوردتىق كورسەتكىش», دەيدى ەۆا پۋلانو.
1964 جىلى نەگىزى قالانعان جانە الەمنىڭ 23 ەلىندە 440-تان اسا كلينيكاسى بار شۆەتسيانىڭ «دياۆەرۋم» مەديتسينالىق ۇيىمى قازاقستاننىڭ دەنساۋلىق ساقتاۋ سالاسىنداعى تانىمال جانە اسا ءىرى شەتەلدىك ينۆەستور سانالدى. كومپانيا بۇكىل الەم بويىنشا, سونىڭ ىشىندە قازاقستاندا بۇيرەك اۋرۋلارى كەزىندە كومەك كورسەتۋ قىزمەتتەرىن تسيفرلاندىرۋعا ايتارلىقتاي ۇلەس قوسىپ كەلەدى. كومپانيا بۇيرەك اۋرۋلارىن ەمدەۋ قىزمەتتەرىنىڭ تولىق جيىنتىعىن ۇسىنادى جانە جۇيەنى ودان ءارى جاقسارتۋ بويىنشا ۇكىمەتپەن بىرلەسە وتىرىپ جۇمىس ىستەيدى. كلينيكالار مەيلىنشە شالعاي اۋدانداردا تۇراتىن ناۋقاستارعا كومەكتەسە الاتىن پەريتونەالدى دياليز سەكىلدى بالامالى ەمدەۋ تۇرلەرىن دە ۇسىنادى.
قازىر «دياۆەرۋم» مەديتسينالىق ۇيىمى قازاقستاننىڭ 16 وڭىرىندەگى 53 كلينيكادا 2 800-دەن اسا پاتسيەنتكە قىزمەت كورسەتەدى. مۇندا 1 مىڭنان اسا جەرگىلىكتى كاسىبي قىزمەتكەر جۇمىس ىستەيدى. سونىمەن قاتار مەديتسينالىق ۇيىمنىڭ استانا, الماتى, قاراعاندى, اقتوبە, ورال, شىمكەنت جانە قوستاناي سەكىلدى ءىرى قالالارىنداعى ورتالىقتارىنان بولەك, شالعاي جاتقان اۋىلداردا دا كلينيكالارى جۇمىس ىستەيدى. اتاپ ايتقاندا, قىزىلوردا وبلىسىنداعى قازالى مەن جاڭاقورعان, قاراعاندى وبلىسىنداعى بالقاش, توپار جانە قارقارالى, تۇركىستان وبلىسىنداعى جەتىساي مەن اسىقاتا, جامبىل وبلىسىنداعى بۋرنوە جانە باتىس قازاقستان وبلىسىنداعى اقساي ەلدى مەكەندەرىندە بار.
«مەملەكەت باسشىسى, ۇكىمەت كەيىنگى جىلدارى دەنساۋلىق سالاسىنا كوپ كوڭىل ءبولىپ كەلەدى. 2021 جىلى ءبىز ءتورت باعىت بويىنشا جۇمىس ىستەيتىن «دەنى ساۋ ۇلت» ۇلتتىق جوباسىن قولعا العان ەدىك. ياعني بۇل دەگەنىمىز – قازاقستان بويىنشا قولجەتىمدى جانە ساپالى مەديتسينالىق كومەك كورسەتۋ, ەپيدەميولوگيالىق بولجاۋ مەن دەن قويۋدىڭ قازىرگى زامانعى جۇيەسىن قالىپتاستىرۋ, وتاندىق ءوندىرىستىڭ قولجەتىمدى دارىلىك زاتتارى مەن مەديتسينالىق بۇيىمدار جانە سالاۋاتتى ءومىر سالتىن ۇستاناتىن حالىقتىڭ ۇلەسىن ارتتىرۋ جانە بۇقارالىق سپورتتى دامىتۋ. مىنە, وسى جوبالاردىڭ اياسىندا دەنساۋلىق ساقتاۋ مينيسترلىگى قارجىلاندىراتىن شۆەدتىك جوعارى تەحنولوگيالى تسيفرلىق جابدىعى بار «دياۆەرۋم» كلينيكالارىندا وتانداستارىمىز اقىسىز, ساپالى جانە قاۋىپسىز ەم الا الادى. d.CARE ءموبيلدى قوسىمشاسى ارقىلى پاتسيەنتتەر وزدەرىنىڭ حال-جايىمەن, سۇيىقتىقتى تۇتىنۋىمەن جانە كلينيكا تاجىريبەسىمەن بولىسە وتىرىپ, مەديتسينا قىزمەتكەرلەرىمەن بايلانىسا الادى. سونىمەن قاتار ولار وزدەرىنىڭ ەمدەۋ دەرەكتەرىنە, زەرتحانالىق زەرتتەۋ ناتيجەلەرىنە جانە ءدارى-دارمەكتەرگە قاتىستى اقپاراتتى دا الا الادى», دەيدى دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك.
قازاقستانداعى دياليز پروتسەدۋرالارىنىڭ 90%-ى جەكەمەنشىك سەكتورلاردا جۇرگىزىلەدى. سونىڭ 30%-ى «دياۆەرۋم» ورتالىعىنا تيەسىلى.
