ەلىمىزدىڭ تۇكپىر-تۇكپىرىنەن كەلگەن دۋالى اۋىز 20 اقساقال ءزاۋلىم مەشىت ءىشىن باتامەن جاڭعىرتتى. باس ءمۇفتي ناۋرىزباي قاجى تاعان ۇلى جولدىڭ الىستىعىنا, وزدەرىنىڭ قارتتىعىنا قاراماي ەلوردا تورىنەن تابىلىپ, قازاقتىڭ باتا بەرۋ سالتىن قايتا جاڭعىرتقان اقساقالدارعا ەرەكشە العىسىن ايتتى.
سونداي-اق وسى بايقاۋدى رەسپۋبليكالىق دەڭگەيدە العاش رەت ۇيىمداستىرىپ وتىرعان ءدىني باسقارما ۇجىمىنا جانە تاعىلىمدى سايىسقا دەمەۋشىلىك جاساعان جومارت ازاماتتارعا ريزاشىلىعىن ءبىلدىردى.
قازىلار القاسىنىڭ شەشىمىمەن شاريعات پەن داستۇرگە ساي ماعىنالى باتا بەرۋ, داۋىس ىرعاعى, كيىم ۇلگىسى, قوسىمشا سۇراقتارعا جاۋاپ بەرۋ تالاپتارى بويىنشا ۇزدىك دەپ تانىلعان اقساقال بالتاباي سىزدىقوۆ (پاۆلودار وبلىسى) 1-ورىندى جەڭىپ الدى. 2-ورىن سەرىكبەك بالقىبەك ۇلىنا (جەتىسۋ وبلىسى) جانە 3-ورىن شاحان تۇرسىنحانوۆ (اباي وبلىسى) اقساقالعا بۇيىردى.
سونىمەن قاتار جۇماباي تاجىباەۆ (الماتى قالاسى), ساميعوللا ماشاەۆ (اتىراۋ وبلىسى) پەن دارىقۇل ماحامبەتوۆكە (قىزىلوردا وبلىسى) ىنتالاندىرۋ سىيلىعى جانە بارلىق قاتىسۋشى اقساقالدارعا قارجىلاي سىيلىق بەرىلدى.
اقساقالداردىڭ باتا بەرۋ ونەرىن عالىم, مەملەكەت جانە قوعام قايراتكەرى ومىرزاق وزعانباەۆ, جازۋشى-جۋرناليست, قوعام قايراتكەرى جابال ەرعاليەۆ, فيلولوگيا عىلىمىنىڭ دوكتورى, پروفەسسور سەرىك نەگيموۆ, قمدب توراعاسىنىڭ ورىنباسارى, نايب ءمۇفتي سانسىزباي قۇربان ۇلى مەن ەلورداداعى «شەيح كۋنتا قاجى» مەشىتىنىڭ باس يمامى ومىرزاق بەكقوجا باعالاپ, تورەلىك جاسادى.
ايتا كەتەيىك, باتاگوي اقساقالدار اراسىندا العاش رەت ۇيىمداستىرىلعان رەسپۋبليكالىق بايقاۋ «Munara TV» تەلەارناسى مەن «مۋفتيات قمدب» YouTube ارناسىندا, سونداي-اق ءدىني باسقارمانىڭ ينستاگرام جەلىسىندەگى رەسمي پاراقشاسىنان تىكەلەي ەفيردە وقىرمان نازارىنا ۇسىنىلدى.
