وقيعا 5 مامىر كۇنى تاڭعى ساعات 07:23-تە بولعان. مەدەۋ اۋدانىنداعى جىبەك جولى داڭعىلى, 37 مەكەنجايىنداعى بەس قاباتتى ءۇي ورتەنگەن. ءورت سوندىرۋشىلەر وقيعا ورنىنا 5 مينۋتتان سوڭ جەتكەن. ولار كەلگەن ۋاقىتتا 5-قاباتتا ورنالاسقان اس بولمە مەن بالكون ورتەنىپ جاتقان.
«بۇكىل پاتەر بولمەلەرى ۋلى تۇتىنگە تولعان. گاز-تۇتىننەن قورعاۋ قىزمەتىنىڭ بۋىنى ەسىكتى اشىپ, پاتەرگە كىردى. بارلاۋ بارىسىندا 1955 جىلى تۋعان ەر ادام ەس-ءتۇسسىز كۇيدە تابىلدى. ءورت سوندىرۋشىلەر ەر ادامعا ارنايى تۇتىننەن قورعايتىن قۇتقارۋ قالپاقشاسىن كيگىزىپ, تازا اۋاعا شىعارىپ, العاشقى مەديتسينالىق كومەك كورسەتتى. قازىرگى ۋاقىتتا ەر ادامنىڭ دەنساۋلىعى بىرقالىپتى. قابىلدانعان شارالاردىڭ ارقاسىندا ءورتتىڭ ءۇيدىڭ شاتىرىنا تارالۋىنا جول بەرىلمەدى», دەلىنگەن قالالىق تجد ءباسپاسوز قىزمەتىنىڭ حابارلاماسىندا.
ءورت ساعات 07:45-تە وقشاۋلانىپ, 07:49-دا ءسوندىرىلدى.
