حالىقارالىق ءبىلىم سايىسى فيزيكا پانىنەن ەلوردادا وتەدى

تاۋەلسىزدىگىمىزدىڭ ارقاسىندا قازاق ەلى بارلىق سالادان ءوزىن جان-جاقتى تانىتۋدا. سوڭعى جىلدارى تورتكۇل دۇنيەنىڭ تالانتتى جاستارى ءار الۋان شارالار اياسىندا وتانىمىزدىڭ وڭتايلى جۇمىستارىنا كۋا بولىپ كەلەدى. سونىڭ بىرەگەيى حالىقارالىق دەڭگەيدە وتەتىن ءپان وليمپيادالارى دەر ەدىك. وسىدان ءتورت جىل بۇرىن استانادا ماتەماتيكا پانىنەن الەمنىڭ 98 ەلىنەن كەلگەن 500 وقۋشى باق سىناعان بولاتىن. سول ءبىلىم بايگەسىندە ەلىمىزدىڭ باۋلىپ قوسقان دارىندى ۇل مەن قىزدارى سينگاپۋر, گونكونگ, قىتاي, جاپونيادان كەيىنگى 5-ءشى ورىنعا تابان تىرەپ, مەملەكەت بەدەلىن ءبىر بيىكتەتىپ تاستاعان ەدى. سول ءۇردىس بيىل دا جالعاسىن تاۋىپ وتىر. اعىمداعى جىلدىڭ 13-15 شىلدەسى ارالىعىندا استانا قالاسىنداعى نازارباەۆ ۋنيۆەرسيتەتىندە ءبى­لىم جانە عىلىم مينيسترلىگى «دارىن» رەسپۋبليكالىق عىلىمي-پراك­تي­كالىق ورتالىعىنىڭ ۇيىتقى بولۋى­مەن فيزيكا پانىنەن وقۋشى­لاردىڭ 45-ءشى حالىقارالىق وليم­پيا­داسى وتەدى. وعان تورتكۇل دۇنيە­نىڭ 88 مەملەكەتىنەن 700 ءۇمىت­كەر قاتىسادى. مۇنداي وليمپيادانىڭ باس­تى ماقساتى, دارىندى بالالاردى انىقتاپ, قولداۋ كورسەتۋ, بولا­شاعىنا داڭعىل جول اشۋ. اقىل يەلەرىنىڭ وي جەمىسىن تانىپ-ءبىلىپ وتىرۋ. جالپى, الەمدى وزگەرتەتىن عالامات اقىل يەلەرى. ولاردى دەر كەزىندە تاۋىپ, بۇلاق كوزىن اشۋ, تۋرا جولعا سالۋ, ازاماتتىق بيىككە كوتەرۋ ال­دىڭعى تولقىننىڭ ءمىن­دەتى. سول مىندەت ۇدەسىنەن شىعۋ ماقساتىندا ۇيىم­داس­تىرىلعان بۇل حالىق­ارالىق وليمپيادادان الار تاعىلىم دا, ۇيرەنەر ۇلگى دە از بولماسا كەرەك. ەلىمىزدىڭ بەدەلىن كوتەرەتىن بۇل ءبىلىم جارىسى جايلى «دارىن» ورتالىعىنىڭ ديرەكتورى شولپان قيراباەۆانى اڭگىمەگە تارتقانىمىزدا ول: «الەمدىك دەڭگەيدەگى ۇلكەن شارانىڭ ءبىزدىڭ ەلىمىزدە ءوتۋىن مەن مەملەكەتىمىزدىڭ, پرەزيدەنتىمىزدىڭ ابىرويىمەن ساباقتاستىرامىن. سەبەبى, مۇنداي وليمپيادا كەز كەلگەن ەلدە بولا بەرمەيدى. ونىڭ ۇستىنە ءبىزدىڭ جاس دارىندارىمىز دۇنيەجۇزىلىك جارىستاردا جۇلدە الىپ, جۇرتتىڭ نازارىن اۋدارىپ كەلەدى. فيزيكا پانىنەن وتەتىن 45-ءشى حالىقارالىق وليمپيادا جارىسىنا 5 وقۋشىنى باپتاپ, قوسىپ وتىرمىز. ولار : ءامىر ءبىرالين, دانات يسا, دىنمۇحاممەد نۇربەك, نۇريسلام تۇرسىنبەك, داۋلەت قۇرمانتاەۆ. ءبارى دە حالىقارالىق, رەسپۋبليكالىق جارىستارعا قاتىسىپ, التىننان القا تاعىپ, جۇزدەن جۇيرىك شىققاندار. بۇل وليمپيادانىڭ باس دەمەۋشىسى – الەمدىك Exxon Mobile كومپانيا­سى ەكەنىن ايتا كەتسەم دەيمىن. جاس ۇرپاققا ىلعي دەمەۋشىلىك كورسەتىپ كەلە جاتقان بۇل كومپانيا 2010 جىلى وتكەن ماتەماتيكالىق وليمپياداعا دا, حالىقارالىق جاۋتىكوۆ اتىنداعى ءبىلىم جارىسىنا دا, جاراتىلىستانۋ-ماتەماتيكالىق پاندەردەن پرەزيدەنتتىك ءبىلىم بايگەسىنە دە باس دەمەۋشى بولىپ ءجۇر. وليمپيادا 14 شىلدە كۇنى استاناداعى بەيبىتشىلىك جانە كەلىسىم سارايىندا اشىلادى» دەدى. سۇلەيمەن مامەت, «ەگەمەن قازاقستان».