كۇندىزگى سەسسيانىڭ شىمىلدىعىن 63,5 كيلودا سىنعا ءتۇسىپ جاتقان ءساناتالى تولتاەۆ اشىپ بەردى. العاشقى اينالىمدا كاسىپقوي بوكستا ءساتتى جۇدىرىقتاسىپ جۇرگەن يزرايل وكىلى احماد ءشتيۆيدى ايقىن باسىمدىقپەن جەڭگەن جەرلەسىمىز ەكىنشى كەزەڭدە ءۇش بىردەي وليمپيا ويىندارىنىڭ (2008, 2012, 2020 جىلدارى) جانە 2013 جىلى الماتىدا وتكەن الەم چەمپيوناتىنىڭ قاتىسۋشىسى ريشارنو كوليمەن قولعاپ ءتۇيىستىردى. 35 جاستاعى ماۆريكي ارالىنىڭ بوكسشىسى وسى كۇنگە دەيىن اۋەسقوي بوكستا اۋىز تولتىرىپ ايتارلىقتاي ناتيجەگە قول جەتكىزبەگەن بولسا دا, بۇل ايقاستا ازيا چەمپيوناتىنىڭ قولا جۇلدەگەرىن سۇرىندىرە ءبىلدى.
وسىلايشا, الەم چەمپيوناتىنا ەكىنشى مارتە قاتىسقان وتانداسىمىز جاھاندىق دودانى ەكىنشى اينالىمنان اياقتاۋعا ءماجبۇر بولدى. 2021 جىلى سەربيادا ۇيىمداستىرىلعان الەم بىرىنشىلىگىندە ول شيرەك فينالعا دەيىن جەتىپ, بەلگرادتا كۇمىس جۇلدەگەر اتانعان شوتلانديالىق ريز لينچتەن 3:2 ەسەبىمەن جەڭىلىپ قالعان ەدى. تاشكەنتتەگى تارتىستىڭ ەكىنشى اينالىمى اياقتالماي جاتىپ, وسىمەن ەكىنشى بوكسشىمىز جارىس جولىنان شىعىپ قالعانى وكىندىرەدى. مۇنىڭ الدىندا 60 كيلوداعى تالعات سىرىمبەتوۆ تە جارىستى ەرتە اياقتاۋعا ءماجبۇر بولعان-دى.
ءتورتىنشى جارىس كۇنىنىڭ كەشكى سەسسياسىندا «حۋمو-ارەناداعى» شارشى الاڭعا الەم بىرىنشىلىگىنىڭ ەكى دۇركىن كۇمىس جۇلدەگەرى (2017, 2019 جىلدارى), توكيو وليمپياداسىنىڭ قولا مەدال يەگەرى قامشىبەك قوڭقاباەۆ شىقتى. ۇلتتىق قۇراما ساپىنداعى ەڭ تاجىريبەلى بوكسشىمىزدىڭ ءبىرى الەم چەمپيوناتىنداعى العاشقى كەزدەسۋىن 2018 جىلعى جاسوسپىرىمدەر اراسىنداعى وليمپيادا جانە الەم چەمپيونى, 2019 جىلعى جاستار اراسىنداعى ەۋروپا بىرىنشىلىگىنىڭ جەڭىمپازى رەسەيلىك الەكسەي درونوۆپەن جۇدىرىقتاسىپ, تورەشىلەردىڭ شەشىمىمەن جەڭىسكە جەتتى – 4:1. ءبىرىنشى راۋندتا رەسەيلىك بوكسشى مىقتىلىق تانىتقانىمەن, ەكىنشى جانە ءۇشىنشى راۋندتاردا قامشىبەك ايقىن باسىمدىق تانىتتى. ءتىپتى قارسىلاسىن ءبىر رەت نوكداۋنعا دا ءتۇسىردى. بىراق «كورمەس – تۇيەنى دە كورمەس» دەگەندەي, ءبىر تورەشى ءبارىبىر ءوز داۋسىن رەسەيلىككە بەرىپ جىبەردى...
