دوڭگەلەك ۇستەلدە «الپىسباي قازعۇلوۆتىڭ شىعارماشىلىعى. جاڭاشىلدىق جانە اۆتورلىق ءادىستىڭ بىرەگەيلىگى», «قازىرگى قازاق بەينەلەۋ ونەرىنىڭ احۋالى جانە ونىڭ باعىتتارى مەن اعىمدارى», «قازاقستانداعى ارت-رىنوكتىڭ قالىپتاسۋىنداعى وزەكتى ماسەلەلەر» تاقىرىپتارى تالقىلانادى. وعان سۋرەتشىلەر مەن ونەرتانۋشىلار قاتىسادى. سونىمەن قاتار سۋرەتشىنىڭ شىعارماشىلىعى تۋرالى كىتاپ, كارتينالارى بار پوستەرلەر تانىستىرىلادى.
«كوكتەمگى سامعاۋ» كورمەسىندە ۋاقىت بايلانىسى, بابالاردىڭ رۋحاني مۇراسى, كوشپەندىلەر الەمى, دالا مەن اۋىل فيلوسوفياسى, قازاق ادەت-عۇرپىنىڭ ساباقتاستىعى, ايەل سۇلۋلىعىنا ءتانتى بولۋ سىندى ونىڭ شىعارماشىلىعىن ناسيحاتتايتىن تۋىندىلار قويىلعان.
الپىسباي قازىعۇلوۆ ءوز سۋرەتتەرى ارقىلى حالىقتىڭ قيىندىقتاردى جەڭە وتىرىپ, جارقىن ومىرگە قالاي بارا جاتقانى تۋرالى ايتۋعا تىرىسادى. ول وتىز جىلدىڭ ىشىندە جەتى مىڭنان استام كارتينالار سالدى, ولاردىڭ باسىم بولىگى ەۋروپا, ازيا, امەريكانىڭ گالەرەيالارى مەن جەكە كوللەكتسيالارىنا تاراپ كەتكەن. سونىمەن قاتار سۋرەتشى ءوز كوللەكتسياسىنا قازاقستاندىق جانە رەسەيلىك اۆتورلاردىڭ 2000-نان استام كەسكىندەمە, گرافيكا جانە ءمۇسىن ۇلگىلەرىن جينادى. ونىڭ شىعارماشىلىق تۋىندىلارى ەلوردالىق زاماناۋي ونەر مۋزەيىنىڭ, پرەزيدەنتتىك مادەني ورتالىقتىڭ, قاستەەۆ اتىنداعى مەملەكەتتىك ونەر مۋزەيىنىڭ, قر ۇلتتىق مۋزەيىنىڭ كوركەمسۋرەت قورىن بىرنەشە رەت تولىقتىردى. ونىڭ شىعارماشىلىعىن قاستەرلەۋشىلەر - لايما ۆايكۋلە, ديدە مارۋاني, جەرار دەپاردە, پاتريسيا كااس, بەلگيا كنيازى لوران جانە تاعى باسقالار.
كوللەكتسيونەر قازعۇلوۆتىڭ كوركەمسۋرەت مۇراعاتىندا ءابىلحان قاستەەۆ, جاڭاتاي شاردەنوۆ, ساليحيتدين ايتباەۆ, ۆلاديمير ەيفەرت, كيم كۋزنەتسوۆا سىندى اتاقتى سۋرەتشىلەردىڭ جانە باسقا كلاسسيكتەردىڭ تۋىندىلارى ساقتالۋدا.
بۇگىنگى تاڭدا بۇل سۋرەتشى قازاقتانداعى جانە رەسپۋبليكادان تىسقارى جەرلەردەگى ەڭ سۇرانىسقا يە سۋرەتشىلەردىڭ ءبىرى. ونىڭ كورمەلەرى بەلگيادا, قىتايدا, تۇركيادا, ۇلىبريتانيادا, رەسەيدە, جاپونيادا, نيدەرلاندىدا ءوتتى. ەندى الەم ونىڭ كوزىمەن ءبىزدىڭ ەلىمىزدى كورىپ وتىر. سۋرەتشى «پاراسات» وردەنى جانە ماساريك اتىنداعى التىن مەدال يەگەرى.
