فۋتبول. پرەمەر-ليگا: «اقتوبە» جەڭىسكە جەتتى

استانا. 11 شىلدە. بۇگىن قازاقستان چەمپيوناتىنىڭ 20 تۋرىنىڭ ويىندارى باستالدى. ءبىرىنشى بولىپ الاڭعا شىققان «اقتوبە» كومانداسى قوستانايدىڭ «توبىلىن» 3:1 ەتىپ ءسۇرىندىردى. بۇل تۋرالى egemen.kz حابارلادى. كەزدەسۋ اقتوبە قالاسىندا ءوتتى. ونىڭ 5-مينۋتىندا قوناقتار العا شىقتى. ەسەپتى قوستانايلىقتار ساپىنداعى اۆستريالىق جارتىلاي قورعاۋشى توماش شيمكوۆيچ اشتى. ال الاڭ يەلەرى تەك تايمنىڭ سوڭىندا عانا ەسەپتى تەڭەستىرۋگە قول جەتكىزدى. وندا ماركوس پيزەللي ۇرعان ايىپ دوبىن جاقسى پايدالانعان يۋري لوگۆينەنكو ونى باسىمەن ۇرىپ, قاقپاعا كىرگىزدى. ويىننىڭ 58-مينۋتىندا الەكسەي انتونوۆ الىستان ۇرىپ, «اقتوبەنى» العا شىعاردى. ارادا 4 مينۋت وتكەندە ماركوس پيزەلليدىڭ بەرگەن بۇرىشتاماسىنان كەيىن ۇشىپ كەلگەن دوپتى يگور زەنكوۆيچ باسىمەن قاعىپ, تورعا جونەلتتى. ايتۋىمىز كەرەك, «قايراتپەن» ويىندا 7 گول جىبەرىپ قويعان اندرەي سيدەلنيكوۆتىڭ ورنىنا بۇگىن قاقپانى المات بەكباەۆ قورعادى. بۇل جەڭىس «اقتوبەنى» قايتادان تۋرنير كەستەسىنىڭ ءبىرىنشى ورنىنا شىعاردى. بۇل ويىندا باسشىلىق تىزگىنىن اندرەي ميروشنيچەنكو ۇستاعان قازاقستاننىڭ وتكەن جىلعى چەمپيونىندا قازىر 39 ۇپاي بار. ول وسى تۋردا «شاحتەرمەن» وينايتىن «قايراتتان» 3 ۇپاي الدا تۇر. ەسكە سالا كەتەيىك, «اقتوبە» فۋتبول كلۋبى 10 شىلدە كۇنى باس جاتتىقتىرۋشى لاۋازىمىنا ۆلاديمير گاززاەۆتىڭ تاعايىندالعانى تۋرالى حابارلاما تاراتىپ ەدى. 34 جاسار مامانمەن كەلىسىم-شارت ءبىر جارىم جىلعا جاسالعان. بۇگىن سونداي-اق «تاراز» - «ەرتىس» جانە «جەتىسۋ» - «ورداباسى» كوماندالارى دا كەزدەستى. ال ەرتەڭ «سپارتاك» — «استانا», «اتىراۋ» — «قايسار», «شاحتەر» — «قايرات» كوماندالارى ءوزارا ۇشىراسادى. دامير قوجامقۇل. دەرەككوز: egemen.kz. فوتو: vesti.kz.