– سىزدەردىڭ اسەم ەلدەرىڭىزگە قايتا كەلگەنىمە قۋانىشتىمىن. مەن بۇعان دەيىن دە قازاقستاندا بىرنەشە مارتە بولعانمىن, بىراق FIFA پرەزيدەنتى رەتىندە العاش رەت كەلۋىم. وسى ساپارلارىمنان تۇسىنگەنىم, قازاقستاندى فۋتبول ەلى دەپ تولىققاندى ايتۋعا بولادى ەكەن. تاڭەرتەڭ ەل پرەزيدەنتىمەن كەزدەستىم. ول كىسىنى دە ۇلكەن فۋتبول جانكۇيەرى دەپ ەستيتىنمىن. ال وعان بۇگىن ءوزىم تولىق كوز جەتكىزدىم. قازاقستان بيلىگى كەيىنگى جىلدارى فۋتبولدى, ينفراقۇرىلىمدى دامىتۋدا اۋقىمدى ىستەر اتقارىپ جاتىر. بۇل مەملەكەت ءۇشىن دە, ۇكىمەت ءۇشىن دە وتە ماڭىزدى. پرەزيدەنتتەرىڭىزبەن كەزدەسۋ بارىسىندا ءبىز وسى ماسەلە توڭىرەگىندە اڭگىمەلەستىك. ياعني فۋتبولدى ءارى قاراي قالاي دامىتۋعا بولادى, ول ءۇشىن نە ىستەۋ كەرەك, ينۆەستورلاردى قايدان تابامىز جانە قازاقستاندا قانداي تۋرنيرلەر وتكىزۋگە بولاتىنى تۋرالى پىكىر الماستىق. FIFA مەن قازاقستان ءۇشىن بۇقارالىق فۋتبولدى دامىتۋ وتە ماڭىزدى. سوندىقتان ءبىز ينفراقۇرىلىمدى دامىتۋعا جانە جاڭا سپورت الاڭدارىنىڭ بويى كوتەرۋىنە ينۆەستيتسيا سالاتىن بولامىز. بۇل ءبىزدىڭ بولاشاعىمىز ءۇشىن جانە فۋتبولدى جاقسى كورەتىن بالالارىمىز ءۇشىن ماڭىزدى.
– جۋىردا قازاقستان ۇلتتىق قۇراماسى 2024 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا ەۋروپانىڭ ازۋلى قۇراماسى – دانيانى تىزە بۇكتىرىپ, تاريحي جەڭىسكە قول جەتكىزگەن بولاتىن. بۇل ماتچتان حابارىڭىز بار دەپ ويلايمىن. وسى ويىن تۋرالى نە ايتاسىز؟
– بۇل – ەكى قۇراما ءۇشىن دە وتە قيىن ماتچ بولدى. بىراق سىزدەردىڭ فۋتبولشىلارىڭىز ەۋروپاداعى ەڭ ۇزدىك قۇرامالاردىڭ ءبىرىن جەڭۋگە ەرىك-جىگەرى جەتتى. سوندىقتان بۇل – قازاقستان قۇراماسىنىڭ تاريحىنداعى ەڭ ماڭىزدى جەڭىستەردىڭ ءبىرى بولدى. ويتكەنى بۇل قاتارداعى جولداستىق ويىن ەمەس. ارينە, دانيانىڭ قازاقستانعا تەك جەڭىس ءۇشىن كەلگەنى ءاۋ باستا بەلگىلى ەدى, بىراق ولار ءوز جانكۇيەرلەرىن قۋانتا المادى. ال ءوز كەزەگىندە بۇل جەڭىس جاس ءارى تاريحي مادەنيەتكە باي مەملەكەت ءۇشىن ايتۋلى جەڭىستەردىڭ ءبىرى بولدى. بىلتىرعى ۇلتتار ليگاسىندا دا قازاقستان قۇراماسى وتە ءساتتى ونەر كورسەتكەنىن بىلەمىن. وسىعان قاراپ-اق, قازاقستان فۋتبولى دۇرىس باعىتتا دامىپ كەلە جاتقانىن بايقاۋعا بولادى.
– قازاقستانداعى فۋتبول ينفراقۇرىلىمى پروبلەمالارى تۋرالى نە ايتا الاسىز؟ ول ماسەلەنى قالاي شەشۋگە بولادى دەپ ويلايسىز؟
– فۋتبول – الەمدە شۇعىلدانۋعا ەڭ وڭاي ءارى قاراپايىم سپورت ءتۇرى. وعان تەك الاڭ مەن دوپ بولسا بولدى. الاڭ بولماسا دا, ءسىز فۋتبول ويناي بەرەسىز, بىراق الاڭنىڭ بولعانى دۇرىس. ياعني ينفراقۇرىلىمعا ينۆەستيتسيا سالۋ وتە ماڭىزدى. FIFA-عا كەلەتىن بولساق, بىزدە الەمنىڭ بارلىق قاۋىمداستىقتارىنا, سونىڭ ىشىندە ينفراقۇرىلىمى ءسال ارتتا قالىپ قويعان ەلدەرگە كومەكتەسەتىن ارنايى باعدارلاما بار. ءبىز بۇل ماسەلەنى قازاقستان فۋتبول فەدەراتسياسىنىڭ باسشىلىعىمەن تالقىلادىق. ەگەر قازاقستان FIFA اياسىنداعى كەز كەلگەن ءتۋرنيردى وتكىزگىسى كەلسە, الدىمەن ينفراقۇرىلىمدى رەتكە كەلتىرۋى كەرەك. استاناداعى ستاديون وتە ادەمى, بىراق بۇكىل ءبىر ەل ءۇشىن ءبىر عانا ستاديون ازدىق ەتەدى. وسىنداي ستاديونداردى كوپتەپ سالۋ كەرەك. ال ول ءۇشىن مەملەكەتكە ينۆەستيتسيا تارتۋ قاجەت. قازاقستان مەن FIFA بىرلەسە جۇمىس ىستەسە, بولاشاقتا سىزدەردىڭ ەلدەرىڭىزدە الاڭدار مەن ستاديونداردىڭ كوپ بولاتىنىنا سەنىمدىمىن. سۋىق اۋا رايى ءۇشىن مۇندا جابىق ارەنالار قاجەت. بۇل باعىتتا ءبىز جۇمىس ىستەپ جاتىرمىز.
– ءسىزدىڭ بۇل ساپارىڭىز تەك قازاقستانعا عانا ەمەس, ورتالىق ازياداعى مەملەكەتتەرگە جوسپارلانعانىن جاقسى بىلەمىز. ايتىڭىزشى, ورتالىق ازيا ەلدەرى جاھاندىق دەڭگەيدەگى ماڭىزدى ءىس-شارالاردى قابىلداۋعا دايىن با؟ جالپى اۋقىمدى تۋرنيرلەردى وسى ايماقتا وتكىزۋ FIFA-نىڭ الداعى جوسپارلارىندا بار ما؟
– ورتالىق ازيادا جاستار, جاسوسپىرىمدەر جانە ودان كىشى جاستاعىلار اراسىنداعى الەم چەمپيوناتتارىن وتكىزۋگە بولادى. بىراق, ارينە, ول ءۇشىن ءالى ءبىراز جۇمىس ىستەۋ كەرەك. ءبىز الەم چەمپيوناتىن ۇيىمداستىرامىز, وتكىزەمىز دەپ كەسىپ ايتا المايمىز. ول ءۇشىن بىزدە بەلگىلى ءبىر ستراتەگيا بولۋى كەرەك. سونداي-اق الەم چەمپيوناتىن وتكىزۋگە جوسپار, مەرزىم قاجەت. بۇگىن ءبىز قفف پرەزيدەنتىمەن وسى اڭگىمە توڭىرەگىندە سويلەستىك. ەگەر الداعى ۋاقىتتا قازاقستاندا جانە ونىڭ كورشى مەملەكەتتەرىندە الەم چەمپيوناتىن وتكىزۋگە بارلىق جاعدايلار جاسالاتىن بولسا, وندا نەگە الەم بىرىنشىلىگىن وتكىزبەسكە؟ FIFA الەمنىڭ كەز كەلگەن بۇرىشىندا ۇلكەن جارىستاردى وتكىزۋگە دايىن. سوندىقتان ءبارىمىز وسى ماقساتتا جۇمىس ىستەۋىمىز كەرەك.
