اقمولا وبلىسىندا 2 جاسار ءسابي ورماندا يتپەن بىرگە تۇنەپ شىققان

استانا. 11 شىلدە. اقمولا وبلىسى بۋراباي اۋدانىندا ءۇيىنىڭ اۋلاسىنان شىعىپ, اداسىپ كەتكەن 2 جاسار قىز بالا ورمان ىشىندە يتپەن بىرگە تۇنەگەن. بۇل تۋرالى «ەكسپرەسس ك» گازەتى حابارلادى. وقيعا وتكەن سارسەنبىنىڭ كەشكى مەزگىلىندە ششۋچە قالاسىندا ورىن العان. ءسابي اۋلادا الاڭسىز ويناپ جۇرەدى. ال اناسى ءۇش شارۋاسىنىڭ قامىمەن بولىپ, قىزىنا نازار اۋدارا قويمايدى. الايدا, سالدەن كەيىن ايەل پەرزەنتىن جوقتاپ قالادى. سودان, ءۇش ساعات بويى بالاسىن ىزدەپ تابا الماي امالى تاۋسىلعان 37 جاستاعى قالا تۇرعىنى تۇنگى ساعات 00:25 شاماسىندا پوليتسيا بولىمىنە بولعان ءجايتتى حابارلايدى. ءسويتىپ, بۋراباي اۋداندىق ىشكى ىستەر ءبولىمىنىڭ جەكە قۇرامى جانە ۋچيليششە كۋرسانتتارى بىرلەسە ءتۇنى بويى بالانى ىزدەپ, ونى تاڭعى 06:00 شاماسىندا ۇيدەن 500 مەتر قاشىقتىقتا وتىرعىزىلعان ورمان ىشىنەن ءيتتى قۇشاقتاپ جاتقان جەرىنەن تابادى. ابىروي بولعاندا, بالا امان. جوعالىپ تابىلعان بالانىڭ اكەسى ارمان: «سول كۇنى اۋا-رايى سۋىق بولدى. ءبارىمىز جىلى كيىنىپ جۇردىك. قۇقىق قورعاۋ ورىندارىنىڭ قىزمەتكەرلەرى قىزىمدى ىزدەۋگە ۋچيليششەنىڭ كۋرسانتتارىن جۇمىلدىردى. بالا تاڭعى ساعات 06:00-دە تابىلدى. يت ءتۇنى بويى ءوزىنىڭ جىلى دەنەسىمەن ءسابيدى توڭدىرماي شىققان. ءيتتىڭ انالىق مەيىرىمى ويانسا كەرەك, العاشقى كەزدە ول ىزدەۋشى ادامداردى بالاعا جاقىنداتقىسى كەلمەپتى. بۇل يت ءبىزدىڭ ۇيگە قىس ماۋسىمىندا كەلگەن بولاتىن. ءبىز وعان «جولبارىس» دەپ ات قويعانبىز», – دەدى. جەرگىلىكتى دارىگەرلەر ءسابيدى يت تۇنگى سۋىققا ۇرىندىرماي امان الىپ قالعان دەپ ەسەپتەپ وتىر. جولدىباي بازار. دەرەككوز: «ەكسپرەسس ك». فوتو: «ەكسپرەسس ك».