مادەنيەت جانە سپورت مينيسترلىگى ۇسىنعان دەرەكتەرگە قاراعاندا, ۆيزاسىز رەجيم تۋرالى كەلىسسوز جۇرگىزىپ جاتقان ەلدەر قاتارىندا اۆستريا, ساۋد ارابياسى, سان-مارينو, باحرەين جانە تاعى باسقالارى بار.
«سونىمەن قاتار ازاماتتارى قازاقستانعا ەلەكتروندى ۆيزا الۋعا ءوتىنىش بەرە الاتىن ەلدەردىڭ ءتىزىمىن كەڭەيتۋ, شاقىرۋ تالابىن الىپ تاستاۋ ماسەلەلەرى دە قاراستىرىلىپ جاتىر», دەلىنگەن ۆەدومستۆو اقپاراتىندا.
سونداي-اق ءباا تۇرعىندارىنا جەڭىلدەتىلگەن ۆيزا بەرۋ ماسەلەسى تالقىلانىپ جاتىر.
«قازاقستان شەتەلدىك ساياحاتشىلار ءۇشىن قىزىق جانە مينيسترلىك ەلىمىزدىڭ تۋريستىك الەۋەتىن تولىق اشۋعا, سونىڭ ىشىندە كەلەتىن تۋريستەر اعىنىن ارتتىرۋ ءۇشىن جۇمىس ىستەپ جاتىر. ونىڭ ۇستىنە مينيسترلىك قازىردىڭ وزىندە كوشى-قوندى باقىلاۋدى جاقسارتۋ تەتىكتەرىن ەنگىزەدى. مىسالى, eQonaq اقپاراتتىق جۇيە», دەدى قر مجسم رەسمي وكىلى ءمولدىر ابدۋاليەۆا.
بۇعان دەيىن بىرقاتار باق قىتاي مەن قازاقستان اراسىندا 30 كۇندىك ۆيزاسىز رەجيم ورناتىلاتىنىن جازعان ەدى. الايدا, 2023 جىلدىڭ 17 ساۋىرىندە قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قۇجاتتىڭ ءالى دە تالقىلانۋ ۇستىندە ەكەنىن مالىمدەدى.
2 مامىردا ايبەك سمادياروۆ قازاقستان مەن قىتاي اراسىنداعى ۆيزاسىز رەجيمنىڭ ارتىقشىلىقتارى تۋرالى ايتتى. ونىڭ ايتۋىنشا, 2023 جىلدىڭ مامىر ايىندا سيان قالاسىندا وتەتىن ورتالىق ازيا-قىتاي ءسامميتى اياسىندا 30 كۇنگە دەيىن ءوزارا ۆيزاسىز رەجيم تۋرالى كەلىسىمگە قول قويىلادى دەپ جوسپارلانىپ وتىر.
