اقتاۋ قالاسىندا تەرگەۋشى زاڭ الدىندا جاۋاپ بەرۋدە

اقتاۋ. 11 شىلدە. ماڭعىستاۋ وبلىستىق ىشكى ىستەر دەپارتەمەنتى اقتاۋ قالالىق ىشكى ىستەر ءبولىمىنىڭ تەرگەۋشىسى پارا الدى دەگەن كۇدىكپەن قاماۋعا الىندى. بۇل تۋرالى egemen.kz ءتىلشىسى حابارلادى. ناقتىراق ايتساق, 2014 جىلدىڭ 6 شىلدەسىندە ماڭعىستاۋ وبلىسى بويىنشا قارجى پوليتسياسىنىڭ قىزمەتكەرلەرى وبلىستىق ىشكى ىستەر دەپارتەمەنتى اقتاۋ قالالىق ىشكى ىستەر ءبولىمىنىڭ تەرگەۋشىسى ن.ۋرازباەۆتى ۇستادى. ول ك. دەگەن ازاماتقا قاتىستى قىلمىستىق قۋدالاۋدى توقتاتۋ جانە ونىڭ جەكە كۋالىگى مەن جۇرگىزۋشىلىك كۋالىگىن قايتارىپ بەرۋى ءۇشىن  باعاسى 160 000 تەڭگە بولاتىن iPhon 5 S ماركالى ۇيالى تەلەفونىن جانە 85 000 تەڭگە پارا الدى دەپ ايىپتالۋدا. شىمكەنت قالاسىنا ۇشپاق بولعان ساتىندە اۋەجايدا قولعا تۇسكەن ۋرازباەۆقا قاتىستى  سول كۇنى-اق پارا الۋ فاكتىسى بويىنشا  قىلمىستىق ءىس قوزعالدى. ال ەكى كۇننەن سوڭ, تەرگەۋشى نۇرزات ۋرازباەۆ سوت سانكتسياسىمەن قاماۋعا الىندى. قارجى پوليتسياسى ءباسپاسوز قىزمەتىنىڭ حابارلاۋىنشا, قازىر قىلمىستىق ءىس بويىنشا تەرگەۋ جۇرۋدە. گۇلايىم شىنتەمىرقىزى. دەرەككوز: egemen.kz. فوتو: mgorod.kz.