«ونەر اتاۋلى ادامنىڭ سەزىمىن وياتىپ, ويىن ۇشقىر ەتىپ, تىڭ يدەيالارعا شابىتتاندىرۋىمەن اسقاق, سونىسىمەن تارتىمدى. ءبىز تاريحي مۇرامىزدى ساقتاپ, ۇلتتىق تاقىرىپتاعى سپەكتاكلدەر شىعارۋعا كۇش سالىپ كەلەمىز. سول سەبەپتى «جەتى قازىنا» سپەكتاكلى ءبىز ءۇشىن قۇندى. ونىڭ ەرەكشە بولاتىن تاعى ءبىر سەبەبى, بۇل – «اشىق ساحنا» ءى رەسپۋبليكالىق بايقاۋىنىڭ جەڭىمپازدارى ساحنالاعان دۇنيە. بۇل – ەلىمىزدىڭ تەاتر ونەرىندەگى جاڭا ەسىمدەر», دەدى تەاتردىڭ كوركەمدىك جەتەكشىسى نۇرلان كانەتوۆ.
«بۇل تاقىرىپتىڭ اۋقىمى كەڭ. بىراق, ول وسى كۇنگە دەيىن بالەتتە كورىنىس تاپقان جوق. «جەتى قازىنا» بالەتىندە باس كەيىپكەر تۇلعا بولىپ قالىپتاسۋ, ەسەيۋ كەزەڭىنەن ءوتىپ, بويىنداعى ۇرەيىن, السىزدىگىن جەڭىپ, جانىندا سەرىگى – جارىمەن بىرگە شاشىراپ كەتكەن قازىنانى جينايدى. سىڭارىمەن بىرلەسكەن سوڭ عانا ول شاڭىراقتى قالپىنا كەلتىرە الدى. شاڭىراقتى ءبىز ادام بالاسىنىڭ جولىنا ساۋلە تۇسىرەتىن كۇن بەينەسىندە سۋرەتتەدىك», دەدى ليبرەتتو اۆتورى ءمادينا الدانوۆا.
استانالىق تەاتر تىڭ, بىرەگەي يدەيالاردى ىزدەپ, ونى جۇزەگە اسىرىپ, حورەوگرافيا ونەرىندەگى جاڭا ەسىمدەردى كوپشىلىككە پاش ەتۋگە كۇش سالىپ جۇرگەنىن اتاپ وتكەن ءجون. جاڭا سپەكتاكل وسىنىڭ تاعى ءبىر دالەلى بولسا كەرەك.
«جۇمىس بارىسىندا ليبرەتتو مەن مۋزىكادان شابىت الدىم. سپەكتاكلدە ناقتى ءبىر ستيل جوق دەۋگە بولادى. بۇل – بىرنەشە بي باعىتىنىڭ سينتەزى. حالىق ءبيى مەن كلاسسيكالىق قيمىلدار, اراسىندا, بالكىم, ءوزىم تاپقان دۇنيەلەر بار. سەبەبى ءار كەيىپكەردىڭ پلاستيكالىق كەلبەتىن اشۋعا تىرىستىم. ءار كەيىپكەر وزىنشە دارا, بىرەگەي. شىعارماشىلىق ىزدەنىستەن ءلاززات الدىم دەسەم, ارتىق ەمەس. بۇل مەن قويعان تۇڭعىش بالەت بولعانىمەن, جالپى, بي سالاسىنداعى العاشقى ەڭبەگىم ەمەس», دەيدى ۋاليتبەك سيازبەك.
جاڭا قويىلىمنىڭ جەتەكشى پارتيالارىن «استانا بالەت» تەاترىنىڭ ارتىستەرى سومدادى. ەر جىگىت – جەتەكشى سوليست سۇندەت سۇلتانوۆ, اق جاۋلىق – ەكىنشى سوليست ءاليا ايتباەۆا, تۇلپار – ەكىنشى سوليست ايدان قالجان, قىران بۇركىت – جەتەكشى سوليست نازەركە ايمۇحامەتوۆا, قۇماي تازى – بالەت ءارتىسى اققالي تۇرعالي.
سالتاناتتى ءىس-شارا مادەنيەت جانە سپورت مينيسترلىگىنىڭ قولداۋىمەن جۇزەگە استى.
