قمگ جۇمىس توبى تۇنگى تەكسەرىس كەزىندە قىزمەتكەرلەردىڭ جۇمىس ورىندارىندا بولماۋى, تۇنگى اۋىسىم كەزىندە ەڭبەك مىندەتتەرىن ورىنداماۋى, قولدان جاسالىپ, قۇراستىرىلعان قۇرالدار مەن ماتەريالداردى, ونىڭ ىشىندە ءورت قاۋپى بار ۋچاسكەلەردە پايدالانعان جاعدايلاردى انىقتاعان. سونداي-اق تابەلدە جۇمىس ىستەگەن ۋاقىتىن اسىرا كورسەتكەن فاكتىلەر بەلگىلى بولدى.
تالاپ ەتىلگەن ۋاقىتتا جۇمىس ورنىنا مۇلدەم كەلمەگەن ادامداردى جۇمىسقا ورنالاستىرۋ بويىنشا ەكى جاعداي تىركەلدى.
قمگ جۇمىس توبىنىڭ مالىمەتىنشە, قىزمەتكەر ناقتى ءبىر سالانىڭ مامانى رەتىندە جۇمىسقا الىنىپ, ءبىر ايدان كەيىن باسقا قىزمەتكە اۋىسقان جاعدايلار بار. مىسالى, بىلتىر جۇمىس ىزدەۋشى كومپانياعا 3-رازريادتى ەلەكتر گازبەن دانەكەرلەۋشى رەتىندە قابىلدانىپ, ءبىر ايدان كەيىن 5-رازريادتى ەكسكاۆاتور ءماشينيسى قىزمەتىنە اۋىستىرىلعان. ونىڭ ۇستىنە قىزمەتكەردىڭ تاعىلىمداما كەزىندەگى كارتاسىندا «وتپەدى» دەگەن باعا تۇر.
سونداي-اق تەكسەرىس قورىتىندىسى بويىنشا 2019-2021 جىلدارداعى قۇبىرلار مەن قۇبىر ونىمدەرى بويىنشا دەرەكتەردە سايكەسسىزدىك انىقتالدى. اتاپ ايتقاندا, ارنايى باعدارلامالىق جاساقتامادا ەسەپكە الۋ مەن تىركەۋدە دەرەكتەردىڭ سايكەس كەلمەۋى بايقالادى. ال بۇل ءوز كەزەگىندە دەرەكتەردى مانيپۋلياتسيالاۋعا جول اشۋى مۇمكىن. سورعى-كومپرەسسورلىق قۇبىرلار مەن شتانگالار جەتكىزۋشىلەردەن توننامەن قابىلدانادى, ال ولاردى وندىرىسكە اۋىستىرعان كەزدە ولشەم بىرلىگى داناعا اۋىستىرىلادى, بۇل كەيىن ءونىمنىڭ ناقتى پايدالانىلعانىن تەكسەرۋدى ايتارلىقتاي قيىنداتادى.
بۇدان باسقا, ومگ-ءنىڭ مۇناي ۇڭعىما قۇبىرلارىن پايدالانۋ قىزمەت ەتۋ مەرزىمىن 7 جىلدان 2,5 جىلعا دەيىن تومەندەتۋ نەگىزدەمەسى قوسىمشا تەكسەرىلەدى. 2022 جىلدىڭ 31 جەلتوقسانىنداعى جاعداي بويىنشا 26 ملرد تەڭگە سوماعا پايدالانىلعان مۇناي ۇڭعىما قۇبىرلارىنىڭ جيناقتالىپ قالۋى سۇراق تۋعىزادى. ولاردىڭ جينالۋ جانە مەتالل سىنىقتارىنىڭ ۋاقتىلى وتكىزىلمەۋ سەبەپتەرى انىقتالىپ, تولىق تەكسەرىس اياقتالعان كەزدە ءتيىستى قورىتىندىلار جاسالادى.
