شاشتى ىسىك – قورىتىلمايتىن-سىڭىرىلمەيتىن شاش ماسساسىنىڭ اسقازان-ىشەك جولىندا جينالۋىنىڭ ناتيجەسى, سودان ىشتە كەدەرگى پايدا بولادى. «شاش جۇتۋ» سيندرومى وتە سيرەك كەزدەسەتىن سىرقات.
«بۇل اۋرۋ وتە سيرەك كەزدەسەدى. اسقازاندا جينالعان شاتاسقان شاشتىڭ كوپ مولشەرى تريحوبەزوار نەمەسە «شاشتى ىسىك» پايدا بولۋىنا اكەلىپ سوعادى. ول اسقازاندى بىرتە-بىرتە بىتەپ, ونىڭ جۇمىسىنا كەدەرگى كەلتىرەدى. مۇنداي ىسىك ۇزىن قۇيرىقتى اسقازاننىڭ پىشىنىنە كەلەدى, اش ىشەككە دەيىن جەتەدى. عىلىمي مالىمەتتەرگە سۇيەنسەك, مۇنداي سيندرومى بار ناۋقاستاردىڭ جەتپىس پايىزى جيىرما جاسقا تولماعان ايەل ادامدار», دەپ ءتۇسىندىردى №2 كوپسالالى قالالىق بالالار اۋرۋحاناسىنىڭ جوسپارلى حيرۋرگيا ءبولىمىنىڭ مەڭگەرۋشىسى ازامات ورازالينوۆ.
اۋرۋحاناعا تۇسكەن بالانىڭ اتا-اناسى الدىمەن ءوز ەمحاناسىنا جۇگىنگەن, وندا فگدس ارقىلى تەكسەرۋ جۇرگىزگەن.
دارىگەردىڭ ايتۋىنشا, ۇلدارعا قاراعاندا قىزدار راپۋنتسەل سيندرومىنا ءجيى ۇشىرايدى. ايەلدەردىڭ شاشتارى ادەتتە ەركەكتەرگە قاراعاندا ۇزىن, سوندىقتان اسقازاننىڭ شىرىشتى قاباتىندا قالىپ قويۋ ىقتيمالدىعى جوعارى. بالا شاشتى جۇتقان كەزدە ىسىك كولەمى ۇلعايادى جانە ول قورىتىلمايتىن-سىڭىرىلمەيتىن شاش جيىنتىعىنا اينالادى.
