الەۋمەتتىك جەلىدە ۆلوگ جۇرگىزەتىندەرگە ء«اي دەيتىن اجە, قوي دەيتىن قوجا» جوعى راس. نە جازىپ, نە سالسا دا اركىمنىڭ ەركى وزىندە. حالىقتىڭ قامىن ەمەس, قالتاسىن ويلايتىندار كوبەيىپ بارادى. بلوگەرلەر كەيدە كەيبىر وقيعالارعا وزىنشە دولبار جاساپ, ءوزىن باقىلاپ وتىرعان مىڭداعان ادامعا وتىرىك اقپارات تاراتادى. وكىنىشتىسى, سوعان قالتقىسىز سەنەتىندەردىڭ قاتارى كوپ. ءماجىلىس دەپۋتاتى ءوزىنىڭ ساۋالىندا ۆلوگ جۇرگىزەتىندەردى جونگە سالىپ, زاڭعا ارنايى باپ ەنگىزۋ كەرەك دەپ دابىل قاقتى.
«قازىر ءوزىن بلوگەرمىن دەپ جۇرگەندەردىڭ دەنى – اقپاراتتىڭ راس-وتىرىگىن تەكسەرمەي, وڭاي جولمەن بايۋ ماقساتىندا كەز كەلگەن ادامعا جالا جابۋدان تايىنبايتىن, بوپسالاپ اقشا تاباتىن, اتاققۇمار, ەلدىڭ بەرەكەسىن بۇزىپ, قاۋىپسىزدىگىنە قاتەر توندىرەتىن ادامدار. ءوزىن بلوگەر ساناپ جۇرگەندەردىڭ باسىم بولىگى شىن مانىندە «بلوگتىڭ» نە ەكەنىن ءتۇسىنىپ ءجۇر دەپ ايتا المايمىز. كوپشىلىگى ەل الدىنداعى بەدەلىن, اتاق-دارەجەسىن پايدالانىپ, حالىققا كومەك جاساپ جاتقانداي سىڭاي تانىتىپ, الەۋمەتتىك جەلىلەردە ءتۇرلى «حايپ» ۇيىمداستىرىپ الەك», دەدى ءماجىلىس دەپۋتاتى.
ونىڭ ايتۋىنشا, بۋىنى بەكىمەگەن جاس بالالار دا سولاردى ۇلگى ەتىپ, تەرىس جولعا كەتىپ بارا جاتىر. دەپۋتات قوردايداعى جاعدايدى تىلگە تيەك ەتىپ, بۇل عانا ەمەس, الاياق بلوگەرلەردىڭ سوزىنە سەنىپ, جەر سيپاپ قالعانداردىڭ كوپ ەكەنىن, ءتىپتى, ولىمگە دەيىن جەتكەن وقيعالاردىڭ دا بار ەكەنىن اتاپ ءوتتى.
«سول الاياقتارعا سەنىپ قالعان قانشا ادام سۋيتسيد جاسادى, قانشاسى دەنساۋلىعىنان ايرىلدى, ءۇيسىز-كۇيسىز قالىپ, قاڭعىرىپ كەتتى؟! ولاردىڭ وبالى كىمگە؟ ەلدە بولىپ جاتقان ءتۇرلى الەۋمەتتىك جاعدايلاردى ءوز ىڭعايىنا بۇرمالاپ, وعان ۇلتارالىق رەڭ بەرىپ, ەلگە جالعان اقپارات تاراتقان بلوگەرلەردىڭ دە ءىسى مايشاممەن قارالۋى كەرەك ەدى. جەكە ازاماتتاردىڭ ىشكەن-جەگەنىن, كيگەن كيىمىنە دەيىن اڭدىپ, قوعامدا كيبەربۋللينگ جاساپ جۇرگەن بلوگەرلەر توبى تاعى بار. وكىنىشكە قاراي, ومىرگە دەگەن كوزقاراسى ەندى قالىپتاسىپ كەلە جاتقان جاستارىمىز وسى بلوگەرلەرگە ەلىكتەپ, جاتىپىشەرلىككە اۋەستەنىپ بارادى, ولار ۇلتىمىزعا جات مادەنيەت پەن تەرىس يدەولوگيانى بويىنا ءسىڭىرىپ جاتىر. ءبىز قىسقا عانا ۋاقىت ىشىندە ءسوزى مەن ىسىنە جاۋاپ بەرە المايتىن بلوگەرلەردىڭ وتانىنا اينالىپ كەتكەندەيمىز», دەدى اناس باققوجاەۆ.
ءماجىلىس دەپۋتاتى تاراتقان اقپاراتى ءۇشىن جاۋاپكەرشىلىك ارقالامايتىن بلوگەرلەردىڭ ادەبىنە قاتىستى سىن ايتتى.
«كىمنىڭ بولماسىن الدىندا دىكەڭدەپ, بەتتەن الىپ, جەكە باسىنا تيىسەدى. ءسوز بوستاندىعى دەگەن وسى ما؟ ءبىز وسىلايشا تۇتاستاي ءبىر ماماندىقتى قور قىلىپ وتىرمىز. جۋرناليستەردىڭ كوبى جۇمىسسىز ءجۇر. ولاردىڭ ءبىلىمى دە, تالابى دا بار. ولار بلوگەرلەرگە قاراعاندا وزدەرىن ادەپتى ۇستايدى, سوندىقتان دا جۇمىسسىز قالىپ وتىر», دەدى ول.
ءماجىلىس وتىرىسىندا دەپۋتات جەدەل تۇردە باق تۋرالى زاڭعا بلوگەرلەرگە قاتىستى تالاپ ەنگىزىپ, جاۋاپكەرشىلىك جۇكتەۋدى سۇرادى.
«تەز ارادا باق تۋرالى زاڭدى پىسىقتاپ, ءماجىلىستىڭ اشىق تالقىلاۋىنا ەنگىزۋ قاجەت. اقپارات سالاسىنداعى جاۋاپكەرشىلىكتى تەك جۋرناليستەر ەمەس, بلوگەرلەر دە سەزىنەتىن ۋاقىت جەتتى. بۇل ماسەلەنى اتالعان زاڭ جوباسىنىڭ اياسىندا دەرەۋ قاراستىرۋىمىز قاجەت. سەبەبى جاۋاپكەرشىلىكتى تۇسىنە المايتىن بلوگەرلەردىڭ سانى ۋاقىت وتكەن سايىن ارتىپ بارادى», دەدى ول.
