ءىس-شاراعا تۇركى اكادەمياسىنىڭ پرەزيدەنتى شاھين مۋستافاەۆ, تۇركى مادەنيەتى جانە مۇراسى قورىنىڭ پرەزيدەنتى گۇناي ەفەنديەۆا, تۇركسوي باس حاتشىسى سۇلتان راەۆ, قر اقپارات جانە قوعامدىق دامۋ ءمينيسترى دارحان قىدىرالى, قر سىرتقى ىستەر ءمينيسترىنىڭ ورىنباسارى قانات تۋمىش, ازەربايجان رەسپۋبليكاسى ميللي ءماجىلىسىنىڭ دەپۋتاتى حيكمەت باباوگلۋ, مەملەكەت جانە قوعام قايراتكەرى, ەلشى, تمۇ اقساقالدار كەڭەسىنىڭ بۇرىنعى مۇشەسى مىرزاتاي جولداسبەكوۆ, قازاقستانداعى تمۇ مۇشە ەلدەردىڭ ديپلوماتيالىق ميسسيالارىنىڭ باسشىلارى, قازاقستان رەسپۋبليكاسىنىڭ پارلامەنت دەپۋتاتتارى سونداي-اق اكادەميالىق ورتا وكىلدەرى قاتىستى.
ءىس-شارا اياسىندا كونفەرەنتسيا قاتىسۋشىلارىنا «Qazaqstan» ۇلتتىق تەلەارناسى دايىنداعان ازەربايجان حالقىنىڭ جالپىۇلتتىق كوشباسشىسى گ.اليەۆتىڭ ءومىرى مەن قىزمەتى تۋرالى «عازيز عۇمىر» دەرەكتى ءفيلمى كورسەتىلدى.
ءىس-شارانى كىرىسپە سوزىمەن اشقان اكادەميا پرەزيدەنتى ش.مۋستافاەۆ گ.اليەۆ ازەربايجان مەملەكەتتىلىگى مەن تۇركى الەمىنىڭ عاسىرلار بويعى تاريحىنداعى بىرەگەي تۇلعا, جاڭا تاريحتاعى تاۋەلسىز ازەربايجان مەملەكەتىنىڭ سيمۆولى جانە ەلى مەن حالقىنىڭ دامۋىنا كەڭ مۇمكىندىكتەرگە جول اشقان كەمەڭگەر باسشى ەكەنىن اتاپ ءوتتى.
گ.اليەۆتىڭ ەلەۋلى ەڭبەگى تۋرالى ايتا كەلە, اكادەميا باسشىسى ونىڭ تۇركى مەملەكەتتەرىنىڭ ينتەگراتسياسىنا قىزمەت ەتەتىن ىنتىماقتاستىق قۇرىلىمدارىن قۇرۋعا قوسقان ۇلەسىن اتاپ ءوتتى.
«گەيدار اليەۆ تۇركى الەمىن بىرىكتىرۋگە, حالىقتارىمىزدى جاقىنداستىرۋعا زور كۇش جۇمسادى. ول تۇركى مەملەكەتتەرىنىڭ ينتەگراتسياسىنا قىزمەت ەتەتىن ىنتىماقتاستىق ۇيىمدارىن قۇرۋعا ەلەۋلى ۇلەس قوستى. قازىرگى تۇركى مەملەكەتتەرىنىڭ ۇيىمى جانە تۇركى اكادەمياسى سياقتى ۇيىمداردى قۇرۋ يدەياسى گ. اليەۆتىڭ وتانى ەجەلگى ناحچىۆان جەرىندە دۇنيەگە كەلگەنى كەزدەيسوق ەمەس. بۇل فاكتىنىڭ سيمۆولدىق ءمانى وتە زور», دەدى ش.مۋستافاەۆ.
قاتىسۋشىلار مەن قوناقتار ءوز باياندامالارىندا ازەربايجان حالقىنىڭ جالپىۇلتتىق كوشباسشىسى تۇركى الەمىنىڭ مادەني جانە رۋحاني مۇراسىنىڭ تاماشا بىلگىرى بولعانىن, باۋىرلاس ەلدەر اراسىنداعى قارىم-قاتىناستى نىعايتۋعا زور ۇلەس قوسقانىن اتاپ ءوتتى. سونداي-اق گ.اليەۆتىڭ ازەربايجان مادەنيەتىن دامىتۋ باعىتىنداعى قىزمەتى, ونىڭ ازەربايجان ەلىنىڭ عىلىمى مەن بىلىمىنە قوسقان ۇلەسى, جۇزەگە اسىرعان رەفورمالارى, سونداي-اق ەل جاستارىن پاتريوتتىق تاربيەلەۋدەگى ايرىقشا ءرولى تۋرالى ايتىلدى.
تۇركى مادەنيەتى جانە ميراس قورىنىڭ پرەزيدەنتى گ.ەفەنديەۆا گ.اليەۆتىڭ تۇركسوي جانە باسقا دا تۇركى ينتەگراتسيالىق ينستيتۋتتارى سەكىلدى ىنتىماقتاستىق قۇرىلىمداردى قۇرۋعا قوسقان زور ۇلەسىنە توقتالدى. بۇدان بولەك ۇلى اقىن مۇحاممەد ءفيزۋليدىڭ 500 جىلدىعىن جانە «قورقىت اتا كىتابىنىڭ» 1300 جىلدىعىن يۋنەسكو دەڭگەيىندە اتاپ ءوتۋ, تۇركى الەمى كوشباسشىلارىنىڭ سامميتتەرىن ۇيىمداستىرۋ گ.اليەۆتىڭ ەسىمىمەن تىعىز بايلانىستى ەكەنىن ايتتى.
قر اقپارات جانە قوعامدىق دامۋ ءمينيسترى دارحان قىدىرالى بيىل ازەربايجان پرەزيدەنتى يلحام اليەۆتىڭ قازاقستانعا ساپارى كەزىندە كورنەكتى مەملەكەت قايراتكەرى گ.اليەۆتىڭ 100 جىلدىعىن اتاپ ءوتۋ سالتاناتتى تۇردە باستالعانىن جانە جىل بويى كوپتەگەن ءىس-شارالار ۇيىمداستىرىلاتىن ايتتى. ءمينيستردىڭ ايتۋىنشا, جوعارى اتالعان شارالاردىڭ باستاماسى رەتىندە ۆەدومستۆونىڭ قولداۋىمەن ارنايى دايىندالعان «عازيز عۇمىر» اتتى دەرەكتى ءفيلمنىڭ تۇساۋكەسەرى ءوتتى.
