سالاۋات مۇكسىموۆتىڭ ايتۋىنشا, بۇنداي تالاپ زاڭ بويىنشا رەتتەلمەگەن. مەملەكەتتىك قىزمەتكە قازاق ءتىلىن بىلمەسە دە ەش كەدەرگىسىز جۇمىسقا كىرۋگە بولادى.
«مەملەكەتتىك قىزمەت ىستەرى اگەنتتىگى ءوز قۇزىرەتى اياسىندا مەملەكەتتىك ءتىلدى دامىتۋ جۇمىستارىن ۇنەمى جۇرگىزۋدە. قازىرگى ۋاقىتتا مەملەكەتتىك لاۋازىمدارعا ۇمىتكەرلەر ءۇشىن مەملەكەتتىك ءتىلدى مەڭگەرۋ دەڭگەيى بويىنشا تالاپ جوق. بۇل ماسەلە زاڭنامالىق دەڭگەيدە رەتتەلمەگەن. اتاپ ايتقاندا, كونستيتۋتسيانىڭ 7-بابىنا سايكەس قازاقستان رەسپۋبليكاسىندا قازاق ءتىلى مەملەكەتتىك ءتىل. مەملەكەتتىك ۇيىمدار مەن جەرگىلىكتى ءوزىن-ءوزى باسقارۋ ورگاندارىندا قازاق تىلىمەن تەڭ دارەجەدە ورىس ءتىلى رەسمي تۇردە قولدانىلادى. كونستيتۋتسيانىڭ 14-بابىندا ەشكىمدى شىعۋ تەگىنە, الەۋمەتتىك, لاۋازىمدىق جانە م ۇلىكتىك جاعدايىنا, جىنىسىنا, ناسىلىنە, ۇلتىنا, تىلىنە, دىنگە كوزقاراسىنا, نانىمىنا, تۇرعىلىقتى جەرىنە بايلانىستى نەمەسە كەز كەلگەن باسقا ءمان-جايلار بويىنشا كەمسىتۋگە بولمايتىندىعى كورسەتىلگەن. كونستيتۋتسيانىڭ 14-بابىندا كوزدەلگەن قۇقىقتار مەن بوستاندىقتار ەشبىر جاعدايدا شەكتەلۋگە جاتپايدى», دەدى ول دەپۋتتاردىڭ ساۋالىنا بەرگەن جاۋابىندا.
الايدا, ول قازاق ءتىلىن ءبىلۋ تالابىن ەنگىزۋ بويىنشا جۇمىستار اتقارىلىپ جاتقىنىن ايتتى.
«وسىعان قاراماستان اگەنتتىك مەملەكەتتىك قىزمەتتە مەملەكەتتىك ءتىلدىڭ اياسىن كەڭەيتۋ ماقساتىندا كەشەندى شارالاردى جۇزەگە اسىرۋدا. اتاپ ايتقاندا, 2021 جىلى وتكىزىلگەن پرەزيدەنتتىك جاستار كادر رەزەرۆىنە ىرىكتەۋدە ۇمىتكەرلەرگە مەملەكەتتىك ءتىلدى كەم دەگەندە ورتا دەڭگەيدە (ۆ1) مەڭگەرۋ تالابى ەنگىزىلدى. بۇل رەتتە, وسى جىلى ءۇشىنشى رەت ۇيىمداستىرىلۋى جوسپارلانىپ وتىرعان پرەزيدەنتتىك جاستار كادر رەزەرۆىنە ىرىكتەۋ كەزىندە دە مەملەكەتتىك ءتىلدى ءبىلۋ نەگىزگى تالاپ رەتىندە بەكىتىلدى. سونىمەن قاتار, 2022 جىلدان باستاپ قر پرەزيدەنتى جانىنداعى مەملەكەتتىك باسقارۋ اكادەمياسىنا جوعارى وقۋدان كەيىنگى ءبىلىم الۋشى ۇمىتكەرلەرگە مەملەكەتتىك ءتىلدى ورتا دەڭگەيدەن (ۆ1) تومەن ەمەس ءبىلۋى بويىنشا سەرتيفيكاتتارىنىڭ بولۋى تۋرالى تالاپ ەنگىزىلدى», دەدى سالاۋات مۇكسىموۆ.
