جاڭا بولىمشە يگى ىستەر باستاۋى

حالىققا پوشتالىق بايلانىس قىزمەتىن كورسەتۋ جىلدان-جىلعا كەڭەيىپ كەلەدى. سونىڭ جارقىن دالەلى كەشە استانانىڭ اكىمشىلىك-ىسكەرلىك ورتالىعى سانالاتىن ەسىلدىڭ سول جاعالاۋىنداعى مينيسترلىكتەر ءۇيىنىڭ قارسى بەتىندەگى “جاڭا الەم” تۇرعىن ءۇي كەشەنىنىڭ قاپتالىنان №17 پوشتالىق بايلانىس ءبولىمىنىڭ اشىلۋى بولدى. اتالعان پوشتالىق بايلانىس بولىمشەسىنىڭ سالتاناتتى اشىلۋ راسىمىنە ەسىل اۋدانىنىڭ اكىمى قايرات جاڭابەرگەنوۆ باستاعان تۇرعىندار جانە “قازپوشتا” اق-تىڭ باسشىلارى مەن قىزمەتكەرلەرى قاتىستى. قايرات جاڭابەرگەنوۆ پەن “قازپوشتا” اق-تىڭ باسقارما توراعاسى داۋرەن مولداعاليەۆ لەنتا قيۋ ءراسىمىن ورىنداپ, ارتىنان ءسوز سويلەدى. اۋدان اكىمى بارلىعى حالىققا قىزمەت كورسەتۋ ساپاسىنا بايلانىستى دەي كەلىپ, تاعى بىرنەشە بولىمشە ىسكە قوسىلۋى ءتيىس ەكەندىگىن جەتكىزدى. مۇنى قۋاتتاعان باسقارما توراعاسى سوڭعى 4 جىلدا 380 جاڭا اۋىلدىق بولىمشەلەردىڭ اشىلعاندىعىن العا تارتتى. قازىر بۇل ءۇردىس قالالاردا جالعاسىن تابۋدا. پوشتا بارلىق قارجىلىق قىزمەتتەردى كورسەتۋدى تولىق يگەرگەن. وسى رەتتە №17 پوشتالىق بايلانىس بولىمشەسىنىڭ مەملەكەتتىك مەكەمەلەرگە جاقىن ورنالاسۋى وسىندا جۇمىس ىستەيتىن قىزمەتكەرلەرگە دە ءتيىمدى. داۋرەن تۇمانباي ۇلىنىڭ سوزىنەن بەلگىلى بولعانىنداي, استانا كۇنىنە وراي “حان شاتىر” كەشەنىندە تاعى ءبىر بولىمشە اشىلادى. ال جىل سوڭىنا دەيىن سول جاعالاۋدا 2 نەمەسە 3 پوشتالىق بايلانىس بولىمشەسى ىسكە قوسىلادى دەپ كۇتىلۋدە. قازىرگى تاڭدا 2009-2011 جىلدارعا ارنالعان قالالىق ەلدى مەكەندەردىڭ پوشتالىق ينفراقۇرىلىمىن دامىتۋ جانە اۋىلدىق پوشتالىق بايلانىس بولىمشەلەرىن جاڭارتۋ باعدارلامالارى جۇزەگە اسىرىلۋدا. 2011 جىلدىڭ سوڭىنا دەيىن 17 اۋىلدىق جانە 44 قالالىق وندىرىستىك نىساندارىن ىسكە قوسۋ, سونداي-اق “وڭتۇستىك” اقپاراتتىق-لوگيستيكالىق ورتالىعىنىڭ جۇمىسىن جەتىلدىرۋ قولعا الىنعان. “قازپوشتا” اق پوشتالىق-قارجىلىق قىزمەت تۇرلەرىن كورسەتۋ اۋماعىن كەڭەيتىپ وتىر. ۆاليۋتا ايىرباستاۋ وپەراتسيالارى, دەپوزيتتەر, تولەمدەردى قابىلداۋ, ەسەپ-كاسسالىق قىزمەت, ينكاسساتسيا, اقشا مەن قۇندى زاتتار تاسىمالى, قۇندى قاعازدار رىنوگىنداعى بروكەرلىك قىزمەت, ەلەكتروندىق اقشا اۋدارىمدارى, ترانسفەر-اگەنتتىك جانە وزگە دە قىزمەت تۇرلەرىن كورسەتۋگە قول جەتكىزىلۋدە. سول جاعالاۋدا اشىلعان شاعىن-پوشتامت عيماراتىندا ءبىرىنشى استانالىق فيلاتەليالىق سالون دا جۇمىس ىستەي باستادى. ول فيلاتەليا ءوندىرىسى مەن ماركا اينالىمىنىڭ جاندانۋىنا, جاس فيلاتەليستەر كلۋبى قۇرىلىپ, ولاردى وقىتۋعا وڭ ىقپال ەتەدى. قورىتا كەلگەندە, جاڭا پوشتالىق بايلانىس بولىمشەسىنىڭ اشىلۋى مەملەكەتتىڭ حالىققا قىزمەت كورسەتۋىن جاقسارتۋ تۋرالى الەۋمەتتىك باعدارلاماعا سايكەس پوشتالىق-جيناقتىق قىزمەتتەر كورسەتۋدى تۇتىنۋشىلارعا جاقىنداتا ءتۇسۋ مەن ولاردىڭ ساپاسىن ارتتىرۋمەن تىكەلەي بايلانىستى بولماق. اسقار تۇراپباي ۇلى.