جەرلەستەرىمىزدەن ءبىرىنشى بولىپ رينگكە جاستار اراسىنداعى ەل چەمپيونى, جۋىردا عانا 22 جاسقا دەيىنگىلەر اراسىنداعى ازيا چەمپيوناتىندا قولا جۇلدەگەر اتانعان تالعات سىرىمبەتوۆ (60 كگ) كوتەرىلدى. العاشقى ايقاسىن تايلاند وكىلى ساكدا رۋامتاممەن وتكىزگەن وتانداسىمىز سەنىمدى جەڭىسكە جەتتى. ءۇش راۋند بويى رينگ ورتاسىندا ۇستەمدىك تانىتقان تالعات بەس تورەشىنىڭ دە نازارىن وزىنە اۋدارتىپ, 5:0 ەسەبىمەن باسىم ءتۇستى. كەلەسى اينالىمدا ول يوردانيا بوكسشىسى ابۋ جاەمەن جۇدىرىقتاسادى.
جەكپە-جەكتەن كەيىن سپورتتى دامىتۋ ديرەكتسياسىنىڭ ءباسپاسوز قىزمەتىنە سۇحبات بەرگەن تالعات سىرىمبەتوۆ العاشقى جەكپە-جەكتىڭ جاۋاپكەرشىلىگى اۋىر بولعانىن ايتتى.
«قازاقستان بوكسشىلارى اراسىندا الەم چەمپيوناتىن ءبىرىنشى بولىپ باستاعان سوڭ ماعان ۇلكەن سەنىم ارتىلدى. جاۋاپكەرشىلىكتىڭ جۇگى اۋىر بولدى. بىراق نامىستى قولدان بەرمەي, باپكەرلەردىڭ تاپسىرماسىن ويداعىداي ورىنداپ شىعىپ, جەڭىسكە جەتتىم. مەنەن كەيىن رينگكە شىعاتىن قالعان جىگىتتەرگە دە تەك ساتتىلىك تىلەيمىن», دەدى ت.سىرىمبەتوۆ.
تالعاتتىڭ ءىزىن الا «حۋمو-ارەنا» كوپسالالى سپورت كەشەنىندەگى رينگكە ەرەسەكتەر اراسىنداعى ازيا چەمپيونى, جاستار اراسىنداعى وليمپيا ويىندارىنىڭ جەڭىمپازى ايبەك ورالباي (92 كگ) كوتەرىلىپ, ءوز ونەرىن ورتاعا سالدى. وتانداسىمىز چەمپيوناتتىڭ العاشقى اينالىمىندا 2019 جىلى رەسەيدىڭ ەكاتەرينبۋرگ قالاسىندا ۇيىمداستىرىلعان الەم چەمپيوناتىنىڭ قولا جۇلدەگەرى بولگاريالىق رادوسلاۆ پانتالەەۆپەن قولعاپ ءتۇيىستىرىپ, تورەشىلەردىڭ ءبىراۋىز شەشىمىمەن قارسىلاسىنان ايلاسىن اسىردى – 5:0. ايبەك ءبىرىنشى راۋندتا قارسىلاسىن ءبىر رەت نوكداۋنعا جىبەرگەنىن دە ايتا كەتكەن ءجون.
ال كەشە تاعى دا ەكى بوكسشىمىز الەم چەمپيوناتىنداعى كەزەكتى جەكپە-جەكتەرىن وتكىزدى. اتاپ ايتقاندا, كۇندىزگى سەسسيادا 86 كگ سالماقتاعى ەل ۇزدىگى ساعىندىق توعامباي كونگو دەموكراتيالىق رەسپۋبليكاسىنىڭ وكىلى ناتانا نلاندۋ مبەليمەن جۇدىرىقتاسسا, كەشكى سەسسيادا 63,5 كيلوداعى ءساناتالى تولتاەۆ يزرايل بوكسشىسى احماد شتيۆيمەن 1/16 فينالدىڭ جولداماسىن ساراپقا سالدى.
22 جاستاعى ساعىندىق توعامباي الەم چەمپيوناتىنا العاش رەت قاتىسىپ جاتسا دا, تاشكەنتتەگى دودانى سەنىمدى جەڭىسپەن باستادى. العاشقى راۋندتا كونگولىق بوكسشى بەلسەندى بولعانىمەن, ءدال سوققى جاساۋ جاعىنان وتانداسىمىز قارسىلاسىنىڭ الدىن وراپ كەتىپ وتىر. ەكىنشى راۋندتا ساعىندىق بەلسەندىلىگىن ارتتىرىپ, ناتانا نلاندۋ مبەليدى ەكى رەت ەسەڭگىرەتىپ تاستادى. ال ءۇشىنشى راۋند باستالعان بەتتە ول قارسىلاسىن تاعى ءبىر مارتە نوكداۋنعا جىبەرگەننەن كەيىن تورەشى مەرزىمىنەن بۇرىن جەكپە-جەكتى اياقتاۋعا ءماجبۇر بولدى. وسىلايشا, ساعىندىق توعامباي ەكىنشى اينالىمعا القىنباي ءوتتى. ال ونى بۇل كەزەڭدە شارشى الاڭ قوجايىنى شوحجاحون ابدۋللاەۆ كۇتىپ تۇر. وسى جىلدىڭ قاڭتار ايىندا وتكەن 22 جاسقا دەيىنگىلەر اراسىنداعى ازيا چەمپيوناتىندا وزبەك بوكسشىسى وتانداسىمىزدى ءبىرىنشى راۋندتا نوكاۋتپەن جەڭىپ كەتكەن بولاتىن.
سونداي-اق كەشكى سەسسيانى باستاپ بەرگەن ءساناتالى تولتاەۆ تا ءوز جانكۇيەرلەرىن جارقىن جەڭىسىمەن قۋانتتى. الەم چەمپيوناتىنا ەكىنشى رەت قاتىسىپ جاتقان جەرلەسىمىز يزرايل بوكسشىسى احماد شتيۆيككە ەش مۇمكىندىك قالدىرماي, ءوز مىقتىلىعىن دالەلدەدى. س.تولتاەۆ ەكىنشى كەزەڭدە 35 جاستاعى ماۆريكيا وكىلى ريچارنو كولينمەن جۇدىرىقتاسادى.
