بۇل ورتالىقتاردىڭ ءبىرازى تىڭعىلىقتى تۇردە حالقىمىزدىڭ مادەنيەتىنىڭ كەرەگەسى كەڭەيۋىنە سەپتىگىن تيگىزىپ جۇرگەنى انىق. سولاردىڭ ءبىرى - اقش استاناسى ۆاشينگتون قالاسىنداعى اباي ورتالىعى.
اتالعان ورتالىق 2020 جىلى دجوردج ۆاشينگتون ۋنيۆەرسيتەتى جانىندا قۇرىلعان. سول ۋاقىتتان بەرى ارناۋلى جوبا اياسىندا ۇلى اقىن, كەمەڭگەر اباي قۇنانباي ۇلىنىڭ شىعارمالارىمەن قاتار, قازاقستاننىڭ تاريحى, سالت-ءداستۇرى جانە مادەنيەتى تۋرالى امەريكالىق ساراپشىلاردىڭ سۇحباتتارى مەن اكادەميالىق ەڭبەكتەرى جارىق كوردى. ورتالىق جالپى قازاق مادەني ورتالىعى سانالادى.
مازمۇندى ءارى قىزىقتى كونتەنت ۇسىنۋ ماقساتىندا «حح عاسىردا باتىس ساياحاتشىلارىنىڭ ورتالىق ازياعا جاساعان ساپارلارى تۋرالى قۇندى جازبالار» ايدارى اشىلىپ, « ۇلى دالا اۋەزدەرى» پودكاستار سەرياسى تىڭدارماندارعا ۇسىنىلدى. ورتالىقتىڭ تولىققاندى قىزمەتىن www.abaicenter.org سىلتەمەسىنە ءوتۋ ارقىلى وقۋعا بولادى.
وسىعان بايلانىستى ويلارىن ورتاعا سالعان اباي ورتالىعىنىڭ پروديۋسەرى ايتولقىن قۇرمانوۆا: «اباي ورتالىعى, جالپى العاندا, امەريكالىقتار مەن اعىلشىن ءتىلدى اۋديتوريانى قازاق مادەنيەتىنىڭ وزگەشە الەمىمەن تانىستىرۋعا باعىتتالعان مادەني باعدارلاما. ءبىز مۇندا ەڭ الدىمەن دۇنيە ءجۇزىنىڭ عالىمدارىنا ەلىمىزدىڭ مادەنيەتى, تاريحى, ونەرى, مۋزىكاسى, كينوسى مەن ادەبيەتى جونىندە دۇرىس تۇسىنىك بەرۋ, زەرتتەۋ جاساۋلارىنا كومەكتەسۋ ماقساتىندا جۇمىس ىستەيمىز.
ولاردىڭ مۇقيات زەرتتەلگەن جانە شىنايى ەڭبەكتەرى ارقىلى ءبىز قازاق مادەنيەتىن زەردەلەۋدە بۇرىننان كەلە جاتقان جاڭساق پىكىرلەر, ميفتەر, شىندىققا جاناسپايتىن كوزقاراستار جونىندە ءتيىستى تۇسىنىكتەر بەرىپ, حالقىمىزدىڭ شىنايى بەينەسىن تانىتۋعا تىرىسامىز. ءبىز بەينەروليكتەر, پودكاستتار, ماقالالار, اۋدارمالار جاسايمىز جانە وسى كاسىبي ءتىل ارقىلى قازاق الەمىنىڭ وزگەشە كەڭىستىگىن اشۋعا تالپىندىق. ۇلتتىق ۇلگىدەگى فيلمدەر, شىعارمالار, كۇيلەر مەن رامىزدەر شەتەلدىك اۋديتوريانى عانا ەمەس, قازاقستان حالقىنىڭ ءوزى ءۇشىن دە قىزىقتى سانالماق», دەيدى.
ءبىز ءسوز ەتىپ وتىرعان اباي ورتالىعىنىڭ دامۋىنا قارجىلاي كومەك بەرەتىندەر دە از ەمەس. سولاردىڭ ءبىرى - «التىنالماس» اق باسقارما مۇشەسى, تۇراقتى دامۋ جونىندەگى باس اتقارۋشى ديرەكتورى باحروم دجالولوۆ. ول: «اباي ورتالىعىمەن سەرىكتەستىگىمىز قازاقستاننىڭ تاريحي تانىمدىق تۇرعىدان تاعىلىمدى دۇنيەلەردى اعىلشىن ءتىلدى ەلدەر اراسىندا الەمدىك دەڭگەيدە ناسيحاتتاۋعا مۇمكىندىك بەرەدى دەپ ويلايمىز. سوندىقتان, «التىنالماس» وسى ورتالىقتىڭ جۇزەگە اسىرىپ جاتقان جوبالارىن جانە ۇلتتىق مادەنيەتتى شەتەلدە تانىمال ەتۋ جولىنداعى قۇلشىنىستارىنا ءار قاشان قول ۇشىن بەرەدى», دەگەن ويىمەن ءبولىستى.
مۇحيتتىڭ ار جاعىندا ورنالاسسا دا ءوز حالقىنىڭ رۋحاني قۇندىلىقتارىن باتىس الەمىنە تانىستىرۋدى بىردەن-ءبىر ماقسات ەتكەن اباي ورتالىعى ارنايى ايدارلار اشىپ, قازاق ادەبيەتىنىڭ جاۋھارلارىن, مادەني مۇرالارىن اعىلشىن تىلىندە جاريالاپ كەلەدى. ايتالىق, «قازىرگى قازاق ادەبيەتى: پوەزيا جانە پروزا», ابايدىڭ, مۇحتار اۋەزوۆتىڭ تۋىندىلارى مەن ءانۋار ءالىمجانوۆتىڭ «ۇستازدىڭ ورالۋى» اتتى رومانىن, «قازاقستاننىڭ قولونەر جانە شىعارماشىلىق ەكونوميكاسى» اتتى زەرتتەۋ ەڭبەگىن, تاتتىمبەت, قازانعاپ, دينا نۇرپەيىسوۆا سياقتى كۇيشىلەردىڭ شىعارمالارىن اعىلشىن تىلىندەگى تۇسىندىرمەسىمەن بىرگە اتالعان ورتالىقتىڭ سايتىنا جۇكتەپ, وزگە تىلدەگى وقىرماندارعا ۇسىندى.
