ساياباققا جينالعان كوپشىلىك «بىرلىگىمىز جاراسقان» ءانى جانە حورەگرافيالىق كومپوزيتسياسىمەن باستاۋ العان مەرەكەلىك ءىس-شارانى كوتەرىڭكى كوڭىل-كۇيدە تاماشالادى.
ءىس-شارانى شىمكەنت قالاسىنىڭ اكىمى مۇرات ايتەنوۆ ارنايى قۇتتىقتاۋمەن اشىپ, قالا تۇرعىندارى مەن قوناقتارىنا ىزگى تىلەگىن جەتكىزدى.
«بۇگىن بارشاڭىزدى 1 مامىر - قازاقستان حالقىنىڭ بىرلىگى كۇنىمەن قۇتتىقتايمىن!
جۋىردا قازاقستان حالقى اسسامبلەياسىنىڭ ءحححىى سەسسياسىندا مەملەكەت باسشىسى قاسىم-جومارت توقاەۆ حالىقتىڭ بىرلىگى بەكەم بولسا, ەكونوميكالىق دامۋ, بەيبىتشىلىك پەن تۇراقتىلىق بولاتىنىن ھ ايتىپ ءوتتى. ەلىمىزدە ءومىر ءسۇرىپ جاتقان بارلىق ەتنوس وكىلدەرى ءوز بولاشاعىن قازاقستانمەن بايلانىستىرادى جانە ونىڭ وركەندەۋى ءۇشىن ايانباي ەڭبەك ەتىپ كەلەدى. ءبىزدىڭ جالعىز وتانىمىز بار. ول — قازاقستان. بەيبىت كۇندە, شاتتىققا تولى بىرلىك كۇنى قۇتتى بولسىن!», دەدى مۇرات دۇيسەنبەك ۇلى.
مەرەكەلىك كەشتە شىمكەنت قالالىق مادەنيەت ءۇيى ونەرپازدارى جانە «ايگولەك», «شامسينۋر», «ەركەتاي», «قاراكوز», «بي تاڭى», «قازىنا» بي انسامبلدەرى, «MEIR» بالەت مەكتەبى جانە سلاۆيان ەتنوسىنان «سۆەتوچ» حورى ونەر كورسەتتى.
مەرەكەدە «قازاقستان» ءانى شىرقالىپ, 500 شار مەن 200 كوگەرشىن ۇشىرىلدى.
سونىمەن قاتار, ءدال وسى ساتتە «اربات» الاڭىندا «كوگەرشىندەر» كورمەسى جانە مەرەكەلىك ەتنو كورمە, «اباي» ساياباعىندا مەرەكەلىك كونتسەرت, زووباقتا «تسيرك» ارتىستەرىنىڭ ارنايى نومىرلەرى, «ورتالىق» ساياباقتا قۋىرشاق تەاترىنىڭ قويىلىمى ساحنالانىپ جاتىر.
