ءىس-شاراعا ءماجىلىس دەپۋتاتتارى سەيتجان كەنجەعۇل, گۇلدارا نۇرىموۆا, الپينيزم جانە سپورتتىق قۇزعا شىعۋ فەدەراتسياسىنىڭ ۆيتسە-پرەزيدەنتى ەرلان داريموۆ, سپورتشىلار وداعى تورالقاسىنىڭ توراعاسى – ۇلتتىق وليمپيادا كوميتەتى باس حاتشىسىنىڭ ورىنباسارى سەرىك ساپيەۆ, زياتكەرلىك دامۋ ەرەكشەلىكتەرى بار ادامدارعا ارنالعان سپورت فەدەراتسياسىنىڭ باسشىسى دينا تەمىرعاليەۆا قاتىستى.
فەستيۆال اياسىندا «Qadam Special School» تاربيەلەنۋشىلەرى جينالعان قاۋىمعا وزدەرىنىڭ سپورتتىق داعدىلارىن كورسەتسە, ال ولاردىڭ اتا-انالارى شىڭعا شىعۋ باسەكەسىندە ءوز باقتارىن سىناپ كورۋ مۇمكىندىگىنە يە بولدى.
«جالپى العاندا, «Autism Qadam» قورى ەرەكشە بالالاردى قولداۋ ءۇشىن ءتۇرلى جوبالاردى, ءبىلىم بەرۋ جانە سپورتتىق باسەكەلەردى ۇيىمداستىرۋمەن اينالىسادى. وسىنداي جوبالاردىڭ ءبىرى – «Qadam Special School»-دا جۇزەگە اسىرىلادى, وعان سپورتتىق جانە اكادەميالىق كومپونەنتتەر كىرەدى. وتكەن جىلى قازاقستاندا ەلىمىزدەگى ءاۋتيزمى بار بالالارىمىزعا ارنالعان العاشقى سپورتتىق شىڭعا شىعۋ سەكتسياسى ىسكە قوسىلدى جانە بۇگىن ءبىرىنشى فەستيۆالىمىزدى وتكىزىپ وتىرمىز. مۇنى وتكىزۋدەگى نەگىزگى ماقساتىمىز – ءاۋتيزمى بار بالالاردىڭ وسى سپورت تۇرىمەن وتە تابىستى اينالىسا الاتىنىن كورسەتۋ. ەلىمىزدىڭ باسقا وڭىرلەرى ءبىزدىڭ ۇلگىنى ءىلىپ اكەتەدى دەپ سەنەمىز», دەيدى «Autism Qadam» قورىنىڭ پرەزيدەنتى ايسۇلۋ ماجەن.
«Qadam Special School» ورتالىعىنىڭ بالالارى ءبىر جىلدان بەرى «Vista» سپورت كلۋبى ماماندارىنىڭ كومەگىمەن سپورتتىق شىڭعا شىعۋ نەگىزدەرىن يگەرىپ كەلە جاتقانىن ايتا كەتكەن ءجون. بۇل سەكتسيا – قازاقستانداعى ءاۋتيزمى بار بالالارعا ارنالعان سپورتتىق شىڭعا شىعۋ بويىنشا العاشقى جانە جالعىز سەكتسيا. قازىر ول جەردە 20-عا جۋىق بالا سپورتتىڭ وسى تۇرىمەن شۇعىلدانادى.
جالپى, شىڭعا شىعۋ سپورتى – جاراقاتتانۋ قاۋپى تومەن جانە فيزيولوگيالىق, ياعني اعزاعا ىڭعايلى دەنەشىنىقتىرۋدىڭ ءبىر ءتۇرى. ءبىر جىل ىشىندە «Qadam Special School» تاربيەلەنۋشىلەرىنىڭ جالپى ءال-اۋقاتى مەن دەنساۋلىق جاعدايىنىڭ ايتارلىقتاي جاقسارعانى بايقالادى.
