ايەلدەر قۇراماسىندا ءالفيا تىلەكقابىل (J1 -57 كگ), دايانا فەدوسوۆا (J2-70 كگ), زاۋرە ايتەك (J1 +70 كگ), اقمارال ناۋاتبەك (J2 -70 كگ) جانە دينارا قۇجۇلوۆا (J2+70 كگ) تاتاميگە شىقتى.
قازاقستان ايەلدەر قۇراماسى فينالدا وزبەكستان كومانداسىن 2:3 ەسەبىمەن جەڭدى. ءالفيا تىلەكقابىل, اقمارال ناۋاتبەك جانە دينارا قۇجۇلوۆا قۇراماعا جەڭىس اكەلدى.
وزبەكستان قۇراماسى ەكىنشى ورىنعا يە بولسا, ءۇندىستان سپورتشىلارى ۇزدىك ۇشتىكتى قورىتىندىلادى.
كوماندالىق سىندا قازاقستان ەرلەر قۇراماسىندا ەرعالي شامەي (J1-73 كگ), جانبوتا امانجول (J2-90 كگ), ەرلان وتەپوۆ (J1+90 كگ), ولجاس ورازالى ۇلى (J2-73 كگ), ابىلاي ادىلبەكوۆ (J1-90 كگ), جانە ەرلان كونكيەۆ (J2 +90 كگ) ەل نامىسىن قورعادى.
قازاقستان ءۇشىن كوماندالىق جارىستاعى شەشۋشى بەلدەسۋ وزبەكستان قۇراماسىنا قارسى ءوتتى. پارادزيۋدو بويىنشا الەمدە مىقتى ەل بولىپ سانالاتىن وزبەكستاندى قازاقستاندىق سپورتشىلار 4:0 ەسەبىمەن ايقىن باسىمدىقپەن ۇتتى. وسى كەزدەسۋدە ەڭ تارتىستى بەلدەسۋ ولجاس ورازالى مەن توكيو پاراليمپياداسىنىڭ چەمپيونى فەرۋز سايدوۆ اراسىندا ءوتتى.
بەلدەسۋ باسىندا فەرۋز سايدوۆ ءبىرىنشى ۆازاري ۇپايىن ەنشىلەگەن. دەسە دە, نەگىزگى ۋاقىتتا وتانداسىمىز ولجاس ءتيىمدى ءادىس قولدانىپ, ەسەپتى تەڭەستىرىپ ۇلگەردى. قوس بالۋاننىڭ كۇرەسى قوسىمشا ۋاقىتقا (گولدەن سكور) دەيىن جالعاستى. قوسىمشا ۋاقىتتا ولجاس ورازالى ۇلىنىڭ فەرۋز سايدوۆقا قولدانعان ءادىسى ناتيجەلى شىعىپ, قازاقستان قۇراماسى جەڭىسكە جەتتى.
فەرۋز سايدوۆ توكيودا وتكەن پاراليمپيادا ويىندارىنىڭ فينالىندا وتانداسىمىز داۋلەت تەمىرجاندى ۇتقان بولاتىن. بۇگىن ازيا چەمپيوناتىندا ولجاس كوماندالاسى داۋلەتتىڭ ەسەسىن قايتارىپ ۇلگەردى.
وسى كەزدەسۋدە ەرعالي شامەي, جانبوتا امانجول, ەرلان وتەپوۆ تە ءوز كەزەگىندە قارسىلاستارىنان باسىم ءتۇستى. جارىس اينالمالى جۇيەدە وتكەندىكتەن ەل قۇراماسى وزبەكستاننان كەيىن موڭعوليا كومانداسىمەن كەزدەسىپ, ازيا چەمپيوناتىنىڭ كوماندالىق جارىسىندا جەڭىمپاز اتاندى.
ازيا چەمپيوناتىنىڭ كوماندالىق جارىسىنا ەرلەر اراسىندا بەس قۇراما قاتىستى. اينالمالى جۇيە بويىنشا بارلىق كوماندا ءبىر-بىرىمەن ءوزارا كۇرەسىپ شىعادى. جەڭىمپاز كوماندالاردىڭ جەڭىس سانىنا قاراي انىقتالادى. ءوز كەزەگىندە, قازاقستان تايلاند, تايپەي جانە يندونەزيا سپورتشىلارىنان قۇرالعان IBSA, ءۇندىستان, وزبەكستان جانە موڭعوليا قۇرامالارىن ۇتتى.
وزبەكستان قۇراماسى ەكىنشى ورىنعا يە بولسا, موڭعوليا مەن ءۇندىستان سپورتشىلارى ۇزدىك ۇشتىكتى قورىتىندىلادى.
ەسكە سالايىق, قازاقستان قۇراماسى ازيا چەمپيوناتىنىڭ جەكەلەي جارىسىندا ءتورت التىن, ءتورت كۇمىس جانە التى قولا جۇلدە جەڭىپ العان بولاتىن.
ازيا چەمپيوناتى استانادا جاقسىلىق ۇشكەمپىروۆ اتىنداعى جەكپە-جەك سارايىندا ءوتتى. قۇرلىقتىق بىرىنشىلىككە بارلىعى 11 ەل قاتىستى.
