مەملەكەتتىك ءبىلىم بەرۋ گرانتىن تاعايىنداۋ كونكۋرسىنا قاتىسۋعا ارنالعان ۇبت 16 مامىردا باستالىپ, 5 شىلدەگە دەيىن وتەدى. بارلىق تالاپكەرگە ۇبت-نى تاپسىرۋعا ەكى مۇمكىندىك بەرىلەدى.
قر عىلىم جانە جوعارى ءبىلىم مينيسترلىگىنىڭ شەشىمى بويىنشا 2023 جىلى تالاپكەرلەر نەگىزگى ۇبت-نى ەكى رەت تاپسىرىپ, ەڭ ۇزدىك ناتيجەمەن گرانت كونكۋرسىنا قاتىسا الادى. سونداي-اق ولار تەستىلەۋ كۇنىن, ۋاقىتىن جانە ورنىن وزدەرى تاڭدايدى. بۇل رەتتە تالاپكەرلەر ەكى مۇمكىندىك ءۇشىن بەيىندىك پاندەردىڭ ءبىر عانا كومبيناتسياسىن بەلگىلەيدى.
ۇبت-عا قاتىسۋ ءۇشىن ۇلتتىق تەستىلەۋ ورتالىعىنىڭ http://app.testcenter.kz سايتىندا تىركەلۋگە بولادى. اتاپ وتەيىك, تىركەلۋدىڭ ءبىرىنشى كەزەڭى 28 ساۋىردەن 6 مامىرعا دەيىن, ەكىنشى كەزەڭى 7 مامىردان 14 مامىرعا دەيىن جۇزەگە اسىرىلادى.
«تالاپكەرلەردىڭ نەگىزگى ۇبت-عا دايىندىعىن جاقسارتۋ ماقساتىندا وتكەن جىلى ءار ءپان بويىنشا جەكە تاقىرىپتىق تالداۋ ەنگىزىلدى. ياعني, ءار ۇبت-دان كەيىن (قاڭتار, ناۋرىز) تۇلەكتەرگە جەكە تاقىرىپتار بويىنشا بىلىمدەرىن ارتتىرۋ ۇسىنىلادى. سونىمەن قاتار, ءبىرىنشى مۇمكىندىكتى تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى. ودان بولەك, ءبىز تەگىن ونلاين بايقاۋ سىناقتارىن ىسكە قوستىق. ءبىلىم بەرۋ ورتالىقتارىمەن بىرلەسىپ, تەگىن ونلاين ساباقتاردى جالعاستىردىق. ال وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان ادەبيەتتەر ءتىزىمى مەن تەست جوسپارى; «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى; «ينفورماتيكا» پانىنەن تەرميندەر ءتىزىمى; «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى. دايىندىق ساپاسىن جاقسارتۋ ءۇشىن وسى جانە باسقا دا قابىلدانعان شارالار تۇلەكتەرىمىزگە تەستىلەۋدە جوعارى ناتيجە كورسەتۋگە كومەكتەسەدى دەپ ۇمىتتەنەمىز», دەدى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
