وتىرىستا نەگىزگى ءتورت ماسەلە تالقىعا سالىندى. سونىڭ ءبىرىنشىسى – پارلامەنت دەپۋتاتتارى باستاماشىلىق ەتكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى تالقىلاندى. سونىمەن بىرگە بيۋدجەت كودەكسى مەن «مەملەكەتتiك ساتىپ الۋ تۋرالى» زاڭ جوباسىنىڭ رەتتەۋشىلىك كونسۋلتاتيۆتىك قۇجاتى بويىنشا باياندامالار تىڭدالدى.
مەملەكەت باسشىسى قاسىم-جومارت توقاەۆ عىلىمعا كوڭىل ءبولۋ جانە عىلىممەن اينالىساتىن جاستارعا قولداۋ كەرەكتىگىن ايتقانى بەلگىلى. بۇل زاڭ جوبالارىنىڭ ماقساتى – عىلىم جولىنداعى ادامداردى قولداۋ, ولارعا ۇستەمە قاراجات تولەۋ. وسىعان وراي عىلىم ماسەلەلەرى جونىندەگى زاڭ جوبالارى عىلىم جانە عىلىمي-تەحنيكالىق سالالارداعى ۇلتتىق زاڭنامانى كەشەندى جەتىلدىرۋگە باعىتتالعان. ماسەلەن, ولار مىناداي تۇزەتۋلەردى كوزدەيدى: عزتكج-عا جەكە ينۆەستيتسيالار ءۇشىن ينۆەستيتسيالىق پرەفەرەنتسيالار بەرۋ جانە جاڭا عىلىمي ورتالىقتار قۇرۋ; عىلىمي تاعىلىمدامالار, شىعىستار نورمالارىن جانە ولار بويىنشا ۇلگىلىك شارتتاردى بەكىتۋ; «عىلىمي ەتيكا» تەرمينىنىڭ انىقتاماسىن بەلگىلەۋ; «جاس عالىم» مەجەسىن قىرىق جاسقا دەيىن ۇلعايتۋ.
بيۋدجەت كودەكسىنىڭ جوباسىنا قاتىستى كونسۋلتاتيۆتىك قۇجات بيۋدجەت زاڭناماسىن رەفورمالاۋعا باعىتتالعان. ول مەملەكەتتىڭ بيۋدجەت سالاسىنداعى حالىق الدىنداعى اشىقتىعى جانە ەسەپتىلىگىن ارتتىرۋعا, بيۋدجەت ۇردىسىندەگى بيۋروكراتيانى تومەندەتۋگە, مەملەكەتتىك قارجى تۇراقتىلىعىنىڭ ۇزاقمەرزىمدى بولجامىن ەنگىزۋگە مۇمكىندىك بەرەدى.
«مەملەكەتتىك ساتىپ الۋ تۋرالى» زاڭ جوباسىنا قاتىستى كونسۋلتاتيۆتىك قۇجات ارتىق رەگلامەنتتەۋدى بولدىرماۋ, جەتكىزۋشىلەردى ءوز بىلىكتىلىگىن ارتتىرۋعا ىنتالاندىرۋ, ساتىپ الىناتىن تاۋارلاردىڭ, جۇمىستاردىڭ, كورسەتىلەتىن قىزمەتتەردىڭ ساپاسىن ارتتىرۋ, بارلىق مەملەكەتتىك جانە كۆازيمەملەكەتتىك ۇيىمداردىڭ بىرىڭعاي پلاتفورماسىنا اۋىستىرۋ ماسەلەلەرىن كوزدەيدى.
عىلىم جانە جوعارى ءبىلىم ۆيتسە-ءمينيسترى كاميل احاتوۆ زاڭ جوبالارى اياسىندا مەملەكەتتىك ورگاندار مەن رەسپۋبلكيالىق بيۋدجەت كوميسسياسى تاراپىنان تومەندەگى وزگەرىستەر قولداۋ تاۋىپ وتىرعانىن ايتادى.
– جوعارى ءبىلىم بەرەتىن جانە جوعارى وقۋ ورنىنان كەيىنگى ۇيىمداردا پەداگوگيكالىق قىزمەت ەتەتىن وقىتۋشىلارعا عىلىمي اتاق ءۇشىن ۇستەمەاقى تولەۋ, ۇيىمنىڭ بيۋدجەتتەن تىس قاراجاتى ەسەبىنەن ورتاشا جالاقى كولەمىن ساقتاي وتىرىپ, ءبىر جىلعا دەيىن شىعارماشىلىق دەمالىس بەرۋ, جاس عالىم مەجەسىن 35 جاستان 40 جاسقا دەيىن ۇلعايتۋ سەكىلدى ماڭىزدى وزگەرىستەر قولداۋ تاپتى. مۇنىڭ ءبارى ەلىمىزدە جاستاردى عىلىممەن اينالىسۋعا ىنتالاندىرادى, – دەدى ۆيتسە-مينيستر كاميل احاتوۆ.
