بۇل ءۇشىن ولار الدىمەن جەكە كاسىپكەر (جك) رەتىندە تىركەلىپ, ءتيىستى قۇجاتتاردى ونلاين-پلاتفورما ارقىلى ۇسىنۋى كەرەك. سوسىن وپەراتورلار اي سايىن ولاردان جارتى جىلدىق كىرىستىڭ 1 پايىزىن الىپ وتىرادى. ەگەر ول بۇرىننان جۇمىس ىستەپ تۇرعان جك بولسا, وندا سالىق رەجىمىن وزگەرتۋى كەرەك.
«جەكە كاسىپكەردىڭ شەشىمىمەن وپەراتور قاراجاتتى ۇستاپ قالۋ بويىنشا مىندەتتەمەنى ورىنداۋ بولىگىندە سالىق اگەنتى بولىپ تانىلادى. قاناتقاقتى جوباعا قاتىسۋشىلار ءۇشىن مىندەتتى زەينەتاقى جارنالارى مەن الەۋمەتتىك اۋدارىمداردى سالۋ وبەكتىسى وسىنداي جەكە كاسىپكەردىڭ ەڭ تومەنگى ءبىر جالاقى مولشەرىندەگى تابىسى بولىپ سانالادى. مىندەتتى الەۋمەتتىك مەديتسينالىق ساقتاندىرۋعا جارنالار سالۋ وبەكتىسى ەڭ تومەنگى جالاقىنىڭ 1,4 ەسەلەنگەن مولشەرىندەگى تابىس بولىپ ەسەپتەلەدى», دەپ حابارلايدى مينيسترلىك.
بۇل جاڭالىققا قاتىستى كۋرەرلەردىڭ پىكىرى دە ءار الۋان. ماسەلەن, تاپسىرىس جەتكىزۋشى بولىپ جۇمىس ىستەيتىن سەرگەي بەلوۆ بۇل باستامامەن كەلىسەدى.
«مۇنداي سالىق قالتاعا اۋىر تيمەيدى. ەكىنشىدەن, ءبىز قورعالاتىن بولامىز. كۋرەر ءبىر ايدا 400 مىڭ تەڭگەنى ەركىن تابادى», دەيدى ول «استانا» ارناسىنا بەرگەن سۇحباتىندا.
ال «Atameken Business» تىلشىسىنە پىكىر بىلدىرگەن جەتكىزۋشىلەر مەن تاكسي جۇرگىزۋشىلەرى مۇنداي جاڭاشىلدىققا دايىن ەمەس ەكەندىكتەرىن ايتقان.
«ونسىز دا تابىسىمىز بولىسكە ءتۇسىپ جاتىر. مىڭ تەڭگە تاپسام, سونىڭ 270 تەڭگەسىن «ياندەكس» الادى. ەندى مەملەكەت اقشا ۇستاپ قالسا, وندا ءبىر شەشىمدەر قابىلداۋى قاجەت شىعار. پارك كوميسسياسىن الىپ تاستاۋ نەمەسە پاركتەردى مۇلدە جويۋ دەگەن سياقتى. ونىڭ ۇستىنە الەۋمەتتىك كودەكس قابىلداندى. ەندى نە بولماق؟ سوندا تاپقان مىڭ تەڭگەنىڭ 600 تەڭگەسى عانا ماعان تيەسىلى بولماق», دەيدى كۋرەر ارمان الشىنباەۆ.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتى بويىنشا قازىر ەلىمىزدە 500 مىڭنان استام كۋرەر بار.
