وتاندىق ەلەكتر ەنەرگەتيكاسى سالاسىنىڭ باستى وپەراتورى سانالاتىن KEGOC كومپانياسىندا 4 مىڭنان استام ادام جۇمىس ىستەيدى. سونىڭ 29 پايىزى – جاستار. بۇل كورسەتكىش جىلدان-جىلعا ءوسىپ كەلەدى. وتكەن جىلى KEGOC اق ورتالىق كەڭسەسىنە 35 جاسقا دەيىنگى 23 قىزمەتكەر, ۇلتتىق ديسپەتچەرلىك ورتالىعىنا 4 جاس مامان جۇمىسقا قابىلداندى. بۇعان قوسا, كومپانيانىڭ ەل وڭىرلەرىندە ورنالاسقان 9 ايماقتىق فيليالىنىڭ كادرلار قۇرامى 215 جاس مامانمەن تولىقتىرىلدى.
KEGOC كومپانياسىنىڭ كادرلىق ساياساتىنا سايكەس جىل سايىن تالانتتى جاستار پۋلى جاساقتالادى. وتكەن جىلدىڭ قورىتىندىسى بويىنشا وسى كادرلىق رەزەرۆكە جاستار ساناتىنداعى 29 مامان ەنگىزىلگەن. كومپانيادا قاتارداعى قىزمەتكەرلەرگە قوسا, جوعارى دەڭگەيدەگى باسشىلىق لاۋازىمداردى ەنشىلەگەن جاستار دا كەزدەسەدى. ولار – ستراتەگيا جانە تۇراقتى دامۋ جونىندەگى باسقارۋشى ديرەكتور, قامتاماسىز ەتۋ جانە قورلار دەپارتامەنتىنىڭ ديرەكتورى جانە باسقالار.
كومپانيا ۇنەمى نازاردا ۇستايتىن تاعى ءبىر ماڭىزدى ماسەلە – قىزمەتكەرلەردىڭ الەۋمەتتىك جاعدايىن ارتتىرۋ جۇمىستارىنىڭ جۇيەلى جۇرگىزىلۋى. سونىڭ ءبىرى – وندىرىستىك جۇمىسكەرلەردىڭ جەڭىلدەتىلگەن يپوتەكالىق نەسيە ارقىلى باسپانا الۋىنا مۇمكىندىك بەرەتىن الەۋمەتتىك باعدارلاما. بۇل يگى باستامانىڭ نەگىزگى ماقساتى – جوعارى سۇرانىسقا يە, بىلىكتى, تاجىريبەلى ماماندارعا الەۋمەتتىك قولداۋ كورسەتۋ ارقىلى ولاردى كومپانيادا تۇراقتاندىرۋ. نەسيە باعدارلاماسى ارقىلى بيىل KEGOC اق-نىڭ وڭىرلىك فيليالدارىندا جۇمىس ىستەيتىن 44 قىزمەتكەردىڭ تۇرعىنجاي الۋىنا مۇمكىندىك تۋعىزىلدى. سونىڭ ىشىندە 31 جاس ماماننىڭ الدى قازىر جاڭا پاتەرلەرگە كىرىپ, باسپانالى بولىپ جاتىر.
– نەسيە باعدارلاماسى جۇمىسكەرلەردى كومپانيامىزداعى جۇمىسىندا ورنىقتىرۋدى عانا ەمەس, سونداي-اق ولاردىڭ ءال-اۋقاتىن ارتتىرۋدى دا كوزدەيدى. ويتكەنى قازىرگىدەي جاھاندىق ەكونوميكالىق تۇراقسىزدىق كەزىندە تۇرعىنجاي الۋعا مۇمكىندىك بەرەتىن مۇنداي قولداۋدىڭ ماڭىزى وتە زور دەپ ەسەپتەيمىن, – دەيدى باسپانالى بولعان «اقمولا جەت» فيليالىنىڭ اعا ديسپەتچەرى جۇمان قىپشاقباي.
KEGOC كومپانياسىندا 2013 جىلدان بەرى جاستار ءىسى جونىندەگى كەڭەس جۇمىس ىستەيدى. كەڭەستىڭ توراعاسى بولىپ تەلەكوممۋنيكاتسيا دەپارتامەنتىنىڭ تەلەكوممۋنيكاتسيالاردى سۇيەمەلدەۋ توبىنىڭ باس مەنەدجەرى ەركەبۇلان ناۋرىزباەۆ بەكىتىلدى. سونداي-اق كەڭەستىڭ جۇمىسىنا وڭىرلىك فيليالداردان جاۋاپتى وكىلدەر تارتىلعان. كەڭەستىڭ جىلدىق جۇمىس جوسپارى جاسالعاننان كەيىن ونى ورىنداۋعا كومپانيانىڭ بۇكىل جاس قىزمەتكەرى اتسالىسادى.
وتكەن جىلى KEGOC اق-دا 2021-2025 جىلدارعا ارنالعان ۇجىمدىق شارتقا وزگەرىستەر ەنگىزىلدى. سونىڭ ىشىندە كومپانيا جىل سايىن «ەنەرگوتەحكاسىپوداق» قوعامدىق بىرلەستىگىنە مادەني-بۇقارالىق, سپورتتىق جانە وزگە دە ءىس-شارالاردى ۇيىمداستىرۋ ءۇشىن, سونداي-اق جاستار قوزعالىسىن دامىتۋ ءۇشىن ەڭبەكاقى تولەۋ قورىنىڭ كەمىندە 0,25 پايىزى مولشەرىندە قارجى بولۋگە مىندەتتەلدى.
قازىرگى كەزدە «سامۇرىق-قازىنا» ۇلتتىق ءال-اۋقات قورىنىڭ باستاماسىمەن قۇرىلعان سۋپەرۆايزەرلەر ينستيتۋتى تۇراقتى جۇمىس ىستەيدى. ونىڭ ماقساتى – پورتفەلدىك كومپانيالاردىڭ جاستار كەڭەستەرى اراسىندا ءوزارا بايلانىس ورناتۋ. وسى جۇمىستى كومپانيا تاراپىنان ۇيلەستىرۋ ءۇشىن KEGOC اق سۋپەرۆايزەرى لاۋازىمىنا ادامي رەسۋرستاردى باسقارۋ دەپارتامەنتىنىڭ HR قىزمەت كورسەتۋ ءبولىمىنىڭ مەنەدجەرى نۇرمۇحامەد مومىنتاي ارنايى ۋاكىل رەتىندە تاعايىندالدى. ەندى كومپانيا جاستارى قوردىڭ وزگە قۇرىلىمدارىنداعى جاس ماماندارمەن بايلانىس ورناتىپ, ءوزارا تاجىريبە الماسا الادى.
سونىڭ ءبىر ايعاعى – 2022 جىلعى 10-13 قاراشادا تۇركىستان قالاسىندا وتكىزىلگەن «سامۇرىق-قازىنا» اق كومپانيالارى توبى جاستارىنىڭ فورۋمى. وعان قاتىسقىسى كەلەتىن جاس قىزمەتكەرلەر چەللەندج بايقاۋىنا قاتىسىپ, ۇزدىك ناتيجەلەر كورسەتۋگە ءتيىس بولاتىن. چەللەندج تۇجىرىمداماسى ءۇش باعىتتى قامتىدى – فيزيكالىق, ەموتسيالىق جانە زياتكەرلىك تاپسىرمالاردى ورىنداۋ. ناتيجەسىندە, كومپانيانىڭ 19 بەلسەندى جاس مامانى ىرىكتەۋدەن ءوتىپ, فورۋمعا جولداما ۇتىپ الدى. ال فورۋمنىڭ قورىتىندىسى بويىنشا KEGOC-تىڭ 3 قىزمەتكەرى «جەتى قادام» جاس كوشباسشىلاردى دامىتۋ مودۋلدىك باعدارلاماسىنا قاتىسۋ ءۇشىن ىرىكتەلىپ الىندى. اتالعان باعدارلاما قورعا كىرەتىن كومپانيالار توبى جاس ماماندارىنىڭ كوشباسشىلىق الەۋەتىن دامىتۋ, باسقارۋ قۇزىرەتتەرىن ەنگىزۋ تەحنيكاسىمەن جان-جاقتى تانىستىرۋ, كوممۋنيكاتيۆتىك داعدىلارىن دامىتۋ, كوماندادا جۇمىس ىستەۋ, بيۋدجەتتىك جوسپارلاۋ قاعيداتتارىن ءتۇسىنۋ سىندى وزىق تاجىريبەلەردى يگەرۋىن كوزدەيدى.
بۇدان بولەك, KEGOC اق «الماتى جەت» فيليالىنىڭ قىزمەتكەرلەرى تاجىريبە الماسۋ جانە ESG قاعيداتتارىن ەنگىزۋ بويىنشا ستراتەگيالىق سەسسيالار وتكىزۋ ءۇشىن «ەير استانا» اق وقۋ ورتالىعى مەن «الماتى ەلەكتر جەلىلەرى» اق گيدروەلەكترستانساسىندا بولدى.
سونداي-اق كومپانيا قىزمەتكەرلەرىن دامىتۋ جانە ىنتالاندىرۋ ماقساتىندا KEGOC اق باسشىلىعى بىلتىرعى قاراشادا كەلەشەگىنەن ءۇمىت كۇتتىرەتىن 40 جاس مامانمەن ارنايى كەزدەسۋ وتكىزدى. ەكى كۇنگە سوزىلعان ءىس-شارا اقپاراتتىق سەسسيالار مەن مادەني-تانىمدىق جانە وقىتۋ باعدارلامارىن قامتىدى.
كومپانيا جاستارى KEGOC اق-تىڭ قۇرىلعانىنا 25 جىل تولۋىنا وراي وتكەن سپورتتىق تۋرنيرگە, كومپانيا قىزمەتكەرلەرىنىڭ سپارتاكياداسى مەن قوردىڭ پورتفەلدىك كومپانيالارى اراسىنداعى سپورتتىق ءىس-شارالارعا بەلسەنە قاتىستى. ال جاستار كەڭەسىنىڭ مۇشەلەرى سپورتتىق ۇيىمداستىرۋ جۇمىستارىنا جۇمىلدىرىلدى. تاعى ءبىر ايتا كەتەتىن جايت, كومپانيا جاستارى جۇگىرۋ مارافوندارى سياقتى بۇقارالىق سپورتتىق ءىس-شارالارعا قاتىسۋدا دا بەلسەندىلىك كورسەتىپ كەلەدى. ايتالىق, KEGOC-تىڭ بىرنەشە دەڭگەيلى دايىندىقتان وتكەن تاجىريبەلى جۇيرىكتەرى استانا, الماتى جانە باسقا قالالاردا وتكىزىلگەن 10, 21 جانە 42 شاقىرىمدىق بۇقارالىق مارافوندارعا قاتىسىپ, كوزگە ءتۇستى.
كومپانيا جاستارىنىڭ قازاق جانە اعىلشىن تىلدەرىن مەڭگەرۋ دەڭگەيىن كوتەرۋ ماقساتىندا Speaking Club وتىرىستارى, سونداي-اق QUIZ فورماتىندا زياتكەرلىك ويىندار جۇيەلى وتكىزىلىپ ءجۇر. مۇنىڭ بارلىعى جاستاردىڭ تىلدەردى جەتىك مەڭگەرۋىنە, ەكونوميكا, گەوگرافيا, تاريح بويىنشا بىلىمدەرىن تەرەڭدەتۋگە جانە لوگيكالىق ويلاۋ داعدىلارىن دامىتۋعا سەپتىگى تيەتىن پىكىر الىسۋ الاڭدارى بولىپ سانالادى.
جاڭادان كەلگەن جاس مامانداردى كومپانيا جۇمىسىنا بەيىمدەۋ, ونىڭ ىشىندە وندىرىسپەن جاقىنىراق تانىستىرۋ ماقساتىندا KEGOC اق-عا قاراستى «اقمولا جەت» فيليالىنا ەكسكۋرسيالار ۇيىمداستىرىلادى. مۇنداي بەيىمدەۋ جۇمىستارىنىڭ اياسى جىلدان-جىلعا كەڭەيتىلمەكشى.
كومپانيا جاستارىنىڭ قوعامدىق ومىردەگى بەلسەندىلىگى دە ايتارلىقتاي. ولار جىل سايىن «مەكتەپكە جول» اكتسياسىنا قاتىسىپ, مەكتەپ وقۋشىلارىنا قاجەتتى وقۋ قۇرالدارى سالىنعان ريۋكزاكتار تابىس ەتىپ ءجۇر. سونداي-اق ۇلى وتان سوعىسىنىڭ ارداگەرلەرىنە جانە تىل ەڭبەككەرلەرىنە كومەك قولىن سوزىپ, ولارعا ازىق-ت ۇلىك سەبەتتەرىن تاپسىرۋ جۇمىستارىنا اتسالىسىپ كەلەدى.
بۇعان قوسا, كومپانيادا جانە وڭىرلىك فيليالداردا كومەككە مۇقتاج جاندار ءۇشىن قايىرىمدىلىق اكتسيالارى ءجيى وتكىزىلىپ تۇرادى. ماسەلەن, جاستار كەڭەسى «وڭتۇستىك جەت» فيليالىندا جۇمىس ىستەيتىن قىزمەتكەردىڭ بالاسىنىڭ ەمىنە قاجەتتى قاراجاتتى جيناۋ ءۇشىن كومپانيانىڭ ورتالىق كەڭسەسىندە «جۇرەكتەن-جۇرەككە» قايىرىمدىلىق اكتسياسىن وتكىزدى. جاس قىزمەتكەرلەر توقاش-بالىشتەر, باۋىرساق, شىعىس تاتتىلەرى جانە ىستىق تاماقتار اكەلىپ, ءىس-شاراعا كەلگەن قوناقتارعا ۇلەستىردى. اكتسيا اياسىندا جينالعان 410 000 تەڭگە بالانىڭ ەمىنە جىبەرىلدى.
جالپى, وتكەن جىلى قايىرىمدىلىق اكتسيالارى مەن ەرىكتىلەر قوزعالىسى بويىنشا ءىس-شارالارعا بەلسەنە اتسالىسقان KEGOC ۇجىمى, «ەنەرگوتەح-كاسىپوداق» جانە فيليالداردىڭ كاسىپوداق ۇيىمدارى مۇقتاج جاندارعا جالپى سوماسى 18,2 ميلليون تەڭگە كولەمىندە كومەك كورسەتكەن. وسىنداي يگى ىستەر الداعى ۋاقىتتا دا جالعاسىن تابا بەرمەك.
اقمارال بايازيتوۆا,
KEGOC اق
كوممۋنيكاتسيالار قىزمەتى
