مەكتەپ-ينتەرنات 1948 جىلدىڭ قىركۇيەگىندە قۇرىلعان. قازاقتىڭ بۇلب ۇلى كۇلاش بايسەيىتوۆانىڭ ەسىمىن ەستە ساقتاۋ ماقساتىندا ءبىلىم ورداسىنا 1957 جىلى ايگىلى ءانشىنىڭ ەسىمى بەرىلدى. تالاي تالانتتىڭ توماعاسىن سىپىرعان مەكتەپ-ينتەرناتتا قازىر 480 وقۋشى ءبىلىم الادى. زاماناۋي ماتەريالدىق-تەحنيكالىق بازا وتاندىق ءارى شەتەلدىك ۇجىمدارمەن شىعارماشىلىق بايلانىستار ورناتۋعا جول اشىپ وتىر. ماسەلەن, يننوۆاتسيالىق كومپيۋتەرلىك تەحنولوگيالار گارمونيا, سولفەدجيو, مۋزىكا ادەبيەتى سياقتى پاندەردى وقىتۋ كەزىندە قولدانىلادى.
– 1996 جىلى ەلىمىزدىڭ تۇكپىر-تۇكپىرىندەگى تالانتتى بالالارعا جان-جاقتى ءبىلىم مەن تاربيەگە قاجەتتى جاعداي جاسالىپ, كاسىبي دايارلىعىن ودان ءارى الەمنىڭ ۇزدىك جوعارى وقۋ ورىندارىندا جالعاستىرۋعا مۇمكىندىك بەرۋ ءۇشىن مەكتەپ رەسپۋبليكالىق مارتەبەگە يە بولدى. بۇل رەتتە وقۋ ورداسىندا باسقا قالادان كەلگەن بالالارعا ارنالعان 110 ورىندىق ينتەرنات بار. مۇنداعى جاتىن ورىندار مەن بولمەلەر ءتيىستى تالاپتارعا, سانيتارلىق نورمالارعا ساي جوعارى ەستەتيكالىق دەڭگەيدە بەزەندىرىلگەن. تۇرمىسقا دا جاقسى جاعداي جاسالعان, – دەيدى مەكەمە باسشىسى باقتيار ابدىراشەۆ.
ونىڭ ايتۋىنشا, مەكتەپتەگى مۋزىكا پاندەرىنىڭ ءبىلىم دياپازونى ءارتۇرلى بولىپ كەلەدى, ءارى وقۋشىلاردى كاسىبي-ادىستەمەلىك قاجەتتىلىكتەرىن قامتاماسىز ەتەدى. مەكتەپتەگى ءبىلىم كەلەسى ارنايى ماماندىقتار بويىنشا جۇرگىزىلەدى: ارنايى فورتەپيانو, ىشەكتى اسپاپتار, ۇرمەلى جانە ۇرمالى اسپاپتار, حالىق اسپاپتارى, مۋزىكا تەورياسى جانە كومپوزيتسياسى, حوردى ديريجيرلەۋ. وقۋشىلاردىڭ كاسىبي داعدىسىن, ورىنداۋشىلىق جانە ساحنالىق شەبەرلىكتەرىن دامىتۋ ءۇشىن شىعارماشىل ۇجىمدار, ياعني سيمفونيالىق, كامەرالىق, حالىق اسپاپتار, ۇرمەلى, ەسترادا-سيمفونيالىق وركەستر, حور, سكريپكاشىلار, دومبىراشىلار, ۆيولونچەليستەر, قوبىزشىلار جانە قىلقوبىزشىلار انسامبلدەرى ۇيىمداستىرىلعان. بارلىق بولىمدە بىلىكتى ماماندار ەڭبەك ەتەدى. ولاردىڭ قاتارىندا حالىق ارتىستەرى, ەڭبەك سىڭىرگەن ونەر قايراتكەرلەرى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورلارى مەن دوتسەنتتەرى, حالىقارالىق جانە رەسپۋبليكالىق كونكۋرستاردىڭ لاۋرەاتتارى, ءبىلىم جانە مادەنيەت سالاسىنىڭ ۇزدىكتەرى بار. ۇجىمدا كوپ جىلدان بەرى كوپشىلىككە بەلگىلى, مۋزىكالىق قوعامداستىق مويىنداعان «بايسەيىتوۆا مەكتەبىنىڭ» ءداستۇرى, وقىتۋ مەن تاربيەلەۋدىڭ بىرىزدىلىگى قالىپتاسقان. وقىتۋشىلاردىڭ 80 پايىزى – مەكتەپتىڭ تۇلەكتەرى.
– عالىمدار دالەلدەگەندەي, مۋزىكامەن اينالىسقان ادامداردىڭ ميىندا ەرەكشە نەيروندار پايدا بولىپ, ويلاۋ قابىلەتىنە وڭ اسەر ەتەدى. سوندىقتان قاتاڭ تاڭداۋ مەن سۇرىپتاۋدان وتكەن دارىندى بالالار وسىنداي ارنايى مامانداندىرىلعان مەكتەپتە وقىپ, تۇلعا بولىپ قالىپتاساتىنى انىق. مۇنداي مەكتەپتە وقۋ – ماقتانىش ءارى ۇلكەن جاۋاپكەرشىلىك. سەبەبى وقۋشىلارىمىز ەكى مەكتەپتى قاتار يگەرىپ, ەرتەدەن كەشكە دەيىن وقۋدان باس المايدى. ساباققا قاتىسۋىمەن قاتار جەكە دايىندىعى دا وتە كوپ ۋاقىتتى الادى. سول سەبەپتى وقۋ ورداسىن تولىق اياقتاعان تۇلەكتەرىمىزدىڭ بويىندا ۇقىپتىلىق, تۇراقتىلىق جانە تاباندىلىق سەكىلدى جاقسى قاسيەتتەر مىقتاپ ورنىعادى. كەرىسىنشە جاعدايدا ونداي تۇلعادان جاقسى ورىنداۋشى, مۋزىكانت شىعۋى ەكىتالاي, – دەيدى مەكتەپ-ينتەرناتتىڭ ديرەكتورى.
ءبىلىم ورداسى بۇگىنگە دەيىن قيلى-قيلى كەزەڭدەردى دە باستان وتكەردى. «قانداي كەزەڭ بولسا دا, مەكتەبىمىز اۋەلگى باعىتىنان اۋىتقىمادى. وسى ورايدا قيىندىقتاردى ەڭسەرىپ, مەكتەپتىڭ تۇتاستىعىن ساقتاعان, دامۋىنا ەرەكشە ۇلەس قوسقان بۇرىنعى ديرەكتور وحان ابدۋللاەۆتىڭ ەڭبەگىن اتاپ وتكىم كەلەدى. بۇگىندە مەكتەبىمىز بيىكتەن تۇسپەي, كاسىبي مامانداردى دايارلاۋ ءىسىن جالعاستىرىپ كەلەدى. تۇلەكتەرىمىزدىڭ ەلدى ايتپاعاندا, شەتەلدىڭ اتاقتى وقۋ ورىندارىنا وقۋعا ءتۇسۋى – ءبىزدىڭ باستى جەتىستىگىمىزدىڭ ءبىرى. ولار تەاتر, كينو سەكىلدى سالالاردا جەمىستى ەڭبەك ەتىپ ءجۇر. ايتالىق, ءجاميلا سەركەباەۆا, ءالي وقاپوۆ, ايدوس ساعاتوۆ, كارينا ابدۋللينا سەكىلدى ەسترادا جۇلدىزدارى ءبىزدىڭ مەكتەپتە وقىعان», دەدى ول.
جاڭابەك تويبازاروۆ,
جۋرناليست
الماتى
