دوريان گرەي دەپ اتالاتىن سيندروم بار. فيزيكالىق جانە پسيحولوگيالىق تۇرعىدان قارتايعىسى كەلمەۋ, ماڭگى جاستىقتى قالاۋ وسىنىڭ بەلگىلەرى. بۇل, اسىرەسە, شوۋ-بيزنەس وكىلدەرى اراسىندا ءجيى كەزدەسەدى. بىراق كوپشىلىك الدىندا جۇرمەسە دە, قارتتىعىن قابىلداعىسى كەلمەيتىن ادامدار بار. جاس كورىنۋ ءۇشىن ءبارىن ىستەيدى. قازىرگى كەزدە كەڭ تاراعان بەت الپەتىنە پلاستيكالىق وپەراتسيا جاساتۋ دا وسى سيندرومنىڭ بەلگىسى دەيدى. بىراق بۇل بەر جاعى. جانى كىرلەپ, جۇرەگى قارايىپ تۇرسا دا, سىرتىن سىلاپ ءمىنسىز كورىنگىسى كەلۋ, ءومىردىڭ ماعىناسى ىشكى الەمنىڭ ەمەس, ءتۇر-الپەتتىڭ كوركەمدىگى دەپ ەسەپتەۋ – وسى سيندرومنىڭ اسقىنعاندىعىنىڭ كورىنىسى.
بۇل پسيحولوگيالىق كۇي وسكار ۋايلدتىڭ اتاقتى شىعارماسىنداعى باستى كەيىپكەر دوريان گرەيدىڭ اتىمەن اتالعان. دوريان ءوزىنىڭ جاستىعىن ساقتاعىسى كەلەدى. وقيعا جەلىسى بويىنشا باس كەيىپكەردىڭ سىمباتىنا قايران قالعان سۋرەتشى وعان پورترەتىن سالىپ بەرەدى. بەينەسى سالىنعان سۋرەتكە دورياننىڭ جانى دا داريدى. سودان كەيىن دوريان ەمەس, سول سۋرەت قارتايا باستايدى. ونىڭ بويىنداعى بارلىق وزگەرىس پورترەتكە اسەر ەتەدى. دوريان العاشقىدا ءوزىنىڭ ءتانىنىڭ قارتامايتىنىنا قۋانعانىمەن, كوز الدىنداعى سۋرەتتەن جانى قانشالىق كىرلەپ, لاستانىپ بارا جاتقانىن انىق كورەدى. دوريان ىشكى الەمىنىڭ كەلبەتىن جان بالاسىنان جاسىرىپ ۇستايدى, ءتىپتى, پورترەتتى باسقا بولمەگە اپارىپ, بەتىن جاۋىپ, بولمەنىڭ ەسىگىن ق ۇلىپتاپ, تىعىپ تاستايدى.
ادامدىققا جات ءىس قىلساق, ار قينالادى عوي. جانىمىز كىرلەسە جيىركەنەمىز. تازارعىمىز كەلەدى. سەبەبى ادام جانى كۇنادان پاك كۇيدە جاراتىلعان. بىراق اۋەلگى بولمىس پەندەلىك ىسپەن وزگەرەتىنى انىق. دوريان دا ءوز كارتيناسىن كوزدەن تاسالاپ, جاسىرىپ قويعاندا, سىرت بەينەسىن ەمەس, ارىن ازاپتاعان جان كۇناسىن ەشكىم كورىپ قويماسا ەكەن دەدى. ءبارىمىزدىڭ قالپىمىز سول شىعار. كىم جۇرتقا جامان كورىنگىسى كەلەدى دەيسىز. بار كەم-كەتىگىمىزدى جاسىرىپ ۇيرەنگەنبىز. ءتۇرىمىزدى جوندەپ, ءسوزىمىزدى ەكشەپ, ءجۇرىس-تۇرىسىمىزعا ءمان بەرەمىز. اداممەن سىرلاسقاندا دا وعان جاماندىعىمىزدى ايتامىز با؟ ايتپايمىز. كەرىسىنشە جاقسى جاعىمىزدى كورسەتۋدى قالايمىز. بىراق ول تەك جاقسى كورىنگىمىز كەلگەن نيەتتەن ەمەس, شىن ۇيالعاننان, شىن جاقسى بولعىمىز كەلگەننەن تۋاتىن سەزىم بولۋى كەرەك ەدى عوي. سوندا ادامنىڭ جانى ىزگىلەنىپ, سۇلۋلانا تۇسپەي مە؟
وسكار ۋايلدتىڭ كىتابىنداعى كەيىپكەرى لورد گەنري بىلاي دەيدى: «قازىر ادامدار ءوز-وزىنەن قورقادى. ولار وزگەنىڭ الدىنداعى پارىزىن وتەيمىز دەپ, ءوزىنىڭ الدىنداعى قارىزىن ۇمىتىپ كەتتى. ءيا ولار مەيىرىمدى, اش ادامدى تويدىرادى, كەدەيدى كيىندىرەدى. بىراق ءوزىنىڭ جالاڭاش جانى ءۇشىن تۇك ىستەمەيدى. بىرەۋگە قىلعانى وزىنەن ۇيالعانىنان ەمەس, قۇدايدان قورىققاندىعىنان. جان قالاۋىمەن جاقسىلىق قىلماعاننان كەيىن قۇدايدىڭ الدىندا جامان كورىنىپ قالمايىن دەگەن قورقىنىشقا قۇل بولىپ وتەدى».
ءدال سولاي دوريان گرەي سيندرومىنا شالدىققاندار – ىشىندە ەسەبى بار نە قۇدايدىڭ نە جۇرتتىڭ الدىندا سىرتىن عانا جاقسى قىلىپ كورسەتكىسى كەلەتىندەر. ولار جاس بولۋ ءۇشىن, جىلتىراپ كوزگە تۇسەتىن, ءوز جاسىنا ساي كەلمەيتىن كيىمدەر كيىپ, بەت الپەتىندەگى اجىمدەردى تۇزەپ الەك بولادى ەكەن. لاستانعان الەمى مەن كىرلەگەن جانىن بۇركەپ, جاۋىپ قويعىسى كەلەدى. ارينە, پەرىشتە قالپىندا قالاتىن, پەندەلىك ىسكە ۇرىنبايتىن ادام جوق. بىراق جاقسىلىققا ۇمتىلۋ, ىشكى سۇلۋلىققا ءمان بەرۋ, رۋحىڭدى بايىتۋ – ءوزىڭنىڭ الدىڭداعى ەڭ باستى قارىز وسى عوي.
