دين ليجەن ءۇشىن چەمپيوناتتىڭ 12-پارتياسى جالپى ەسەپتەگى تارازى باسىن تەڭەستىرىپ, تاجگە تالاسۋ مۇمكىندىگىن ساقتاپ قالاتىن سوڭعى ويىن بولاتىن. ويتكەنى شاحماتشىلار بۇل جولى دا تەڭ تۇسەر بولسا, يان نەپومنياششي اق تاستارمەن وينايتىن 13-تۋردا چەمپيونات تاعدىرىن شەشىپ كەتۋى عاجاپ ەمەس ەدى. دەسە دە, ءديننىڭ بۇل پارتيادا جەڭىسكە جەتۋىنە رەسەيلىك گروسسمەيستەردىڭ ءوزى كومەكتەسىپ جىبەردى. سەبەبى نەپومنياششي كەزدەسۋدىڭ 27-جۇرىسىندە ءبىر, 38-ءشى جۇرىسىندە ەكىنشى رەت قاتەلەسىپ, ءوز ۋىسىندا تۇرعان 0,5 ۇپايىنان قاراپتان-قاراپ ايىرىلىپ قالدى.
سونداي-اق بۇل پارتيادا دين ليجەننىڭ جەڭىسكە جەتۋىنە وسىدان بىرنەشە جىل بۇرىن قىتايداعى «I am a singer» ءان بايقاۋى ارقىلى بۇكىل الەمگە تانىمال بولعان قانداسىمىز ديماش قۇدايبەرگەننىڭ ءجۇرىسى ساتتىلىك الىپ كەلدى دەۋگە بولاتىن شىعار. وزدەرىڭىز بىلەتىندەي, كلاسسيكالىق شاحماتتان الەم چەمپيوناتىنىڭ ءداستۇرى بويىنشا ءار پارتيانىڭ الدىندا ماتچتىڭ رەسمي ءجۇرىسىن قازاقستاننىڭ جانە الەمنىڭ تانىمال تۇلعالارى جاساپ وتىرادى. بۇل جولعى العاشقى ءجۇرىستى جاساۋ الەمدەگى ءان الەمىنىڭ جۇلدىزى ديماش قۇدايبەرگەنگە بۇيىردى.
ەندى الداعى ەكى پارتيادا 1,5 ۇپاي جيناعان شاحماتشى الەمنىڭ 17-چەمپيونى اتانادى. ياعني بولاشاق چەمپيونعا ەندى ءبىر ويىندا جەڭىسكە جەتىپ, بىرەۋىندە تەڭ تۇسسە جەتىپ جاتىر. ال ەگەر ەكى ۇمىتكەر دە الداعى ەكى پارتيادا تەڭ وينايتىن بولسا, وندا جەڭىمپاز ەسىمى 30 ساۋىرگە جوسپارلانعان تاي-برەيكتە انىقتالادى.
تاي-برەيك ەرەجەسى بويىنشا, شاحماتشىلار الدىمەن راپيد بويىنشا ءتورت پارتيا وينايدى ء(ار پارتيا 25 مينۋتقا جالعاسادى). ەگەر بۇل جەردە دە جەڭىمپاز انىقتالماسا, وندا بليتس بويىنشا جەڭىمپازدى انىقتاۋعا تىرىسادى. الدا-جالدا بۇل كەزەڭدە دە چەمپيوننىڭ ەسىمىن انىقتاۋ مۇمكىن بولماسا, وندا قارسىلاستار «ارماگەددون» جۇيەسى بويىنشا شەبەرلىك بايقاسادى. ياعني بۇل جەردە اق تاسقا بەس مينۋت, قارا تاس يەسىنە ءتورت مينۋت ۋاقىت بەرىلەدى.
