«جىل باسىنان بەرى جامبىل وبلىسىندا 220 جول-كولىك وقيعاسى تىركەلدى, سالدارىنان 31 ادام قازا تاۋىپ, 300-دەن استام جولاۋشى ءتۇرلى دارەجەدە جاراقات العان. ستاتيستيكاعا جۇگىنسەك, جول اپاتىنان بولعان قايعىلى جاعدايلاردىڭ 99 پايىزىنا جۇرگىزۋشىلەردىڭ كىنالى ەكەنى بەلگىلى بولىپ وتىر. بۇدان بولەك ماس كۇيىندە كولىك تىزگىندەگەن جۇرگىزۋشىلەردىڭ كىناسىنەن بولعان جول-كولىك وقيعالارىنىڭ 16,7 پايىزعا ارتقانى انىقتالدى. قىسقاسى, بۇرىنعىلاردىڭ قاتەلىگىنەن بۇگىنگىلەر ساباق الماي وتىر», دەيدى وبلىستىق پوليتسيا دەپارتامەنتىنىڭ باستىعى, پوليتسيا گەنەرال-مايورى ارمانبەك بايمۋرزين.
وتكەن جىلدىڭ العاشقى جارتىسىندا ىشىمدىك ءىشىپ كولىك تىزگىندەگەن 396 ازامات انىقتالسا, جولدىڭ قارسى باعىتىنا شىعىپ كەتكەن 112 تۇرعىننىڭ كولىك جۇرگىزۋ قۇقىعى شەكتەلگەن. ال كولىكتى ماس كۇيىندە قايتادان قايمىقپاي باسقارعان 21 جۇرگىزۋشىنىڭ قاتەلىكتەن ساباق شىعارماعانى جاعا ۇستاتقان ەدى.
«جول-كولىك وقيعالارىنىڭ سانىن – 17, قازا تاپقانداردىڭ سانىن – 26,2, ال زارداپ شەككەندەردىڭ سانىن 22,8 پايىزعا تومەندەتە العانىمىزعا قاراماستان, قازا تاپقانداردىڭ سانى 31 ادامعا جەتكەنى كىمدى دە بولسىن ويلاندىرماي قويمايتىنى انىق. كىسى شىعىنى ءاربىر وتباسى ءۇشىن ورنى تولماس قايعى ەكەنىن كولىك جۇرگىزۋشىلەرى قاپەردە ۇستاسا دەگەن تىلەك بار. اۆتوكولىك تىزگىندەگەن ءاربىر ازامات كۇرە جولدىڭ بويىندا ەرەجەنى ساقتاسا دەيمىز عوي. الايدا ناتيجە ءبىز كۇتكەندەي بولماي تۇر», دەيدى پوليتسيا دەپارتامەنتىنىڭ باستىعى.
دەپارتامەنت باسشىسى كەلتىرگەن دەرەكتەرگە سەنسەك, جول-كولىك وقيعالارىنىڭ باسىم بولىگى كولىك جۇرگىزۋشىلەرىنىڭ جول قوزعالىسى ەرەجەسىن سانالى تۇردە ساقتاماۋىنان بولادى ەكەن. ناقتىراق ايتار بولساق, اۆتوكولىك تىزگىندەگەن ازاماتتاردىڭ دەنى جىلدامدىق رەجىمىن اسىرۋعا كەلگەندە الدىنا جان سالمايدى, مانەۆر جاساۋ ەرەجەلەرىنە پىسقىرىپ تا قارامايدى. سونداي-اق جول بەلگىلەرىنە نازار اۋدارمايدى, جاياۋ جۇرگىنشىلەر وتكەلدەرىنەن قۇيعىتىپ وتە شىعادى. سونىڭ سالدارىنان قايعىلى جاعدايلار ءجيى تىركەلەدى.
وكىنىشتىسى سول, وتكەن جىلدىڭ ەسەپتى كەزەڭىمەن سالىستىرعاندا جولدا ورىن العان اپاتتار سالدارىنان باقيعا اتتانعان بالالاردىڭ سانى ءتورت ەسەگە ارتىپ وتىر. جىلدىڭ باسىنداعى ستاتيستيكا وسىلاي دەپ سايراپ تۇرسا, جىل جابىلار تۇستاعى دەرەك تۋرالى ويلاۋدىڭ ءوزى قورقىنىشتى.
«جالپى, كوپتەگەن جول-كولىك وقيعاسىنىڭ ارتىندا بالا ءومىرى تۇرعانىن ءوڭىر تۇرعىندارى ەسكەرە بەرمەيتىن سياقتى. ءجاسوپىرىمنىڭ تاعدىرىنا ءبارىمىز جاۋاپتى ەكەنىمىزدى ۇمىتپاۋىمىز كەرەك. ويتكەنى بۇگىنگى بالا – ەلىمىزدىڭ ەرتەڭى, بولاشاعى. جىل باسىنان بەرى تىركەلگەن جول-كولىك وقيعالارى كەزىندە قازا تاپقان بالالاردىڭ ەشقايسىسى كولىكتە ارنايى ۇستاۋ قۇرىلعىسىمەن قامتىلماعان. اتا-انالار كوبىنەسە اۆتوكولىك ورىندىعىن ساتىپ الۋدى كەيىنگە قالدىرادى, بىراق بۇل بالانىڭ ومىرىنەن نەمەسە دەنساۋلىعىنان قىمبات ەمەس ەكەنىن ەستە ۇستاعان ءجون. قوعام وسىنى دەر كەزىندە تۇسىنسە ەكەن», دەيدى ا.بايمۋرزين.
قالاي دەسەك تە قارا جول قاتەلىكتى كەشىرمەيتىنى ايدان انىق. ال سوڭى قايعىلى جاعدايمەن اياقتالاتىن جول-كولىك وقيعالارىنىڭ باسىم بولىگى كۇرە جولدىڭ بويىندا تىركەلەدى. قىسقاسى, اۆتودالىزدە كولىكتى جەلمەن جارىسقانداي باسقاراتىن ازاماتتارعا ەس كىرمەيىنشە, قايعىدان قارا جامىلعانداردىڭ ستاتيستيكاسى ەسكىرمەيتىنى, انىعىراق ايتساق, جاقسى جاعىنا قاراي وزگەرە قويمايتىنى انىق.
جامبىل وبلىسى
