10-پارتيادا اق تاستاردىڭ قوجايىنى دين ليجەن ءوز ءجۇرىسىن سەنىمدى باستادى. قىتايلىق گروسسمەيستەر بۇل جولى دا ء«تورت اتپەن» اعىلشىندىق ءجۇرىستى تاڭدادى. شاحماتشىلار ماتچتىڭ 14-ءشى جۇرىسىنە دەيىن 2020 جىلى نەپومنياششي – كاردوزو اراسىندا وتكەن تارتىستى باسەكەنىڭ (سول كەزدەسۋدە يان جەڭىسكە جەتكەن بولاتىن) قادامدارىن قايتالاپ وتىردى. نەپومنياششي 14-ءشى جۇرىسكە كەلگەندە h4 ءجۇرىسىن جاساپ, ويىن بارىسىن باسقا ارناعا بۇرىپ جىبەردى. بۇل كەزدە دە ەكى ويىنشىنىڭ پوزيتسياسى تەڭ دارەجەدە تۇرسا دا, اق تاستاردىڭ پاتشاسى قاۋىپسىز ايماقتا ەدى. سوندىقتان ديندە ءبارىبىر بەلگىلى ءبىر دەڭگەيدە باسىمدىق بولدى.
بىراق ءارى قارايعى ءىز كەسۋ جۇرىستەرىندە ليجەن ءوز مۇمكىندىگىن پايدالانا الماي, شاحماتشىلار 45 جۇرىستەن كەيىن ءبىر-ءبىرىنىڭ قولىن الىپ, تەڭ ناتيجەگە كەلىستى. 10-پارتيا ءۇش ساعاتتان اسا ۋاقىت وينالدى.
ال ءبىر كۇننەن كەيىنگى 11-پارتيادا نەپومنياششي اق تاستارمەن ويناپ, ازىرشە وزىنە ءتيىمدى بولىپ تۇرعان تەڭ ناتيجەگە قول جەتكىزدى. دەگەنمەن 15 جۇرىسكە دەيىن رەسەيلىك شاحماتشى بىرنەشە پوزيتسيادا جاقسى مۇمكىندىكتەرگە يە بولىپ تۇرعان-دى. باسەكەنى جۇرگىزىپ وتىرعان شاحماتتان 15-ءشى الەم چەمپيونى ۇندىستاندىق ۆيشي اناند تا ياننىڭ پوزيتسياسىن جوعارى باعالاپ, «ەندى وعان ءارى قاراي ويناۋ جەڭىل بولادى», دەگەن ەدى. الايدا نەپومنياششي كەيىنگى جۇرىستەرىندە بۇل باسىمدىعىن پايدالانا المادى. كەزدەسۋدىڭ 39-شى جۇرىسىنە كەلگەندە ەكى شاحماتشى دا تەڭ ناتيجەگە رازى ەكەندىكتەرىن ءبىلدىرىپ, پارتيانى جالعاستىرۋدان باس تارتتى. ءبىر قىزىعى, 11-پارتيادا الەم چەمپيونى اتاعىنان ۇمىتكەرلەر نەبارى ەكى-اق ساعات وينادى. بۇل – بيىلعى الەم چەمپيوناتىنداعى ەڭ جىلدام وينالعان پارتيا جانە بىرىنشىلىكتەگى قاتارىنان ءتورتىنشى, ال جالپى التىنشى تەڭ ناتيجە بولدى.
الەمنىڭ ەڭ ۇزدىك شاحماتشىلارى اراسىنداعى جاھاندىق دودا كۇن وتكەن سايىن ءوز مارەسىنە تاياپ كەلە جاتقان سوڭ سوڭعى پارتيالاردا تەڭ ناتيجە ءجيى تىركەلىپ جاتاتىنى زاڭدىلىق. ويتكەنى بۇل كەزەڭدەگى ءاربىر ءجۇرىستى تاجىريبەلى گروسسمەيستەر «جەتى رەت ويلانىپ, ءبىر رەت جاساماسا», اقىر سوڭىندا وپىق جەپ قالۋى ابدەن مۇمكىن. سوندىقتان ولار سوڭعى پارتيالاردا اسا كوپ تاۋەكەلدەرگە بارا قويمايدى. اسىرەسە ەسەپتە الدا كەلە جاتقان رەسەيلىك شاحماتشى. وعان قازىر تەڭ ناتيجەنىڭ ءوزى دە جەڭىسپەن پارا-پار. ال دين ليجەن الەمنىڭ شاحمات ءتاجىن ءوز ەلىنە الىپ كەتكىسى كەلسە, ەندى سوڭعى ءۇش ويىندا بارىن سالىپ, جەڭىسكە جەتۋى كەرەك. ايتپەسە, باسەكە تاعدىرى نەپومنياششيدىڭ پايداسىنا شەشىلەتىنى انىق.
