بەس كۇنگە جالعاسقان باسەكەدە سپورتشىلار ەرلەر جانە ايەلدەر اراسىنداعى كوپسايىس جانە جەكەلەگەن بورەنە, ەركىن جاتتىعۋ, بيىكتىكتەگى قوسسىرىق, تىرەك سەكىرۋ سىندى جاتتىعۋلاردى ورىنداپ, ارقايسىسىنان ۇپاي جينادى. ءسويتىپ, ەڭ كوپ ۇپاي جيناعان سپورتشىلار سپارتاكيادا جەڭىمپازى اتاندى.
ماسەلەن, ەرلەر اراسىنداعى «سپورت شەبەرلەرى» ساناتىنداعى باسەكەدە توكيو وليمپياداسىنىڭ قاتىسۋشىسى, الەم كۋبوگى جارىستارىنىڭ جانە ازيا چەمپيوناتتارىنىڭ جەڭىمپازى مەن جۇلدەگەرى, ۇلتتىق قۇراما مۇشەسى الماتىلىق ميلاد كاريمي بارلىق سايىستا 169,700 ۇپاي جيناپ, ءوز مىقتىلىعىمەن دارالاندى. كەيىنگى ورىندارعا قازاقستان چەمپيوناتىنىڭ ءار جىلدارداعى جەڭىمپازدارى – يلياس ازيزوۆ (الماتى, 160,183 ۇپاي) پەن دياس تويشىبەك (شىمكەنت, 154,526) جايعاستى.
ال «سپورت شەبەرلىگىنە ۇمىتكەر» سپورتشىلار اراسىندا 150,800 ۇپاي جيناعان پاۆلودارلىق نۇرتان ىدىرىسوۆ توپ جاردى. ەكىنشى ورىن شىمكەنتتىك التىنحان تەمىربەككە (148,616) بۇيىرسا, ۇزدىك ۇشتىكتى تاعى ءبىر پاۆلودارلىق سپورتشى رومان حەگاي (145,000) تۇيىندەدى.
ال 6 جاتتىعۋدان تۇراتىن كوماندالىق كوپسايىستا ۇلتتىق قۇراما سپورتشىلارىنان جاساقتالعان الماتى قالاسى توپ جاردى. ولار بارلىعى 1031,812 ۇپاي جينادى. جەڭىمپازدان 16 ۇپايعا از جيناعان شىمكەنت قالاسىنىڭ گيمناستارى (1015, 579) ەكىنشى ورىنعا تابان تىرەسە, قولا مەدال پاۆلودار وبلىسىنا (942, 617 ۇپاي) بۇيىردى. جەكەلەگەن سىنداردا ۇلتتىق قۇراما مۇشەسى يلياس ازيزوۆ قارسىلاس شاق كەلتىرگەن جوق. ول 6 سناريادتىڭ تورتەۋىندە التىننان القا تاقتى.
ايەلدەر اراسىنداعى «سپورت شەبەرلەرى» باسەكەلەرى وتە تارتىستى ءوتىپ, جەڭىمپازدار تەك سوڭعى ساتتە عانا انىقتالدى. شەشۋشى تۇستا قاجەتتى ۇپايىن جيناپ ۇلگەرگەن الماتىلىق ارينا لەبەدەۆا (99,480 ۇپاي) از عانا ايىرماشىلىقپەن ءامينا حاليماردەننەن (استانا, 99,335) باسىم ءتۇسىپ, چەمپيون اتاندى. ۇزدىك ۇشتىكتى مەدينا كەنەنباي (الماتى, 98,530) تۇيىندەدى.
ال «سپورت شەبەرلىگىنە ۇمىتكەر» گيمناستار ىشىندە مەدينا قاپباسوۆا (قاراعاندى, 95,720 ۇپاي) ۇزدىك ونەرىمەن تورەشىلەر كوزىنە ءتۇسىپ, سپارتاكيادادا جەڭىسكە جەتسە, ودان كەيىنگى ورىن رادميللا تاراسوۆا (الماتى, 93,600) مەن امەلي مۋكۋشەۆاعا (استانا, 90,680) بۇيىردى.
قىزدار اراسىنداعى كوماندالىق كوپسايىستا دا الماتى قالاسىنىڭ گيمناستارىنا تەڭ كەلەر قارسىلاس تابىلمادى. ولاردىڭ ەنشىسىندە – 604,022 ۇپاي بار. كۇمىس جۇلدەگە استانا قالاسىنىڭ سپورتشىلارى يە بولسا (589,605), ۇزدىك ۇشتىكتى اباي وبلىسىنىڭ ورەندەرى (557, 698) تۇيىندەدى. ايتا كەتەيىك, كوماندالىق كوپسايىستا ءار ءوڭىردىڭ اتىنان 6 سپورتشىدان باق سىنادى.
«سپارتاكيادا كەزىندە ءبىراز گيمناست جاقسى ونەرىمەن كوزگە ءتۇستى. باستىسى, ولاردىڭ كومبيناتسيالارىنىڭ نەگىزى قالانعان. دەسە دە ولارعا ءالى كوپ جاتتىعىپ, تىڭعىلىقتى جۇمىس ىستەۋ كەرەك. كەي تۇستاردا ولارعا تاجىريبە جەتىسپەي تۇرعانى انىق بايقالدى. الداعى ۋاقىتتا تاعى دا شىڭدالا تۇسسە, ۇلتتىق قۇراما دەڭگەيىنە جەتە الادى. ۇزاق ۋاقىت كوش باستاپ جۇرگەن الماتى قالاسىنىڭ كومانداسىنا بۇل جولى اباي وبلىسى مەن استانا قالاسىنىڭ گيمناستارى اجەپتاۋىر قارسىلىق كورسەتتى. ەل ىشىندە باسەكەنىڭ بولعانى بارىمىزگە جاقسى. ۇلتتىق قۇراماعا كەلەر بولساق, وسى جارىستان كەيىن ءبىز بىردەن كايردە وتەتىن الەم كۋبوگى كەزەڭىنە اتتانامىز. ول جەردە گيمناستارىمىز تابىستى ونەر كورسەتىپ, جانكۇيەرلەردى قۋانتادى دەگەن سەنىمدەمىن», دەيدى سپورتتىق گيمناستيكادان قازاقستان قۇراماسىنىڭ باس باپكەرى ناديرا يۋنۋسوۆا.
